2Th 3 | AvaIBTNT | STEP | Ахиралдаги, вацал, нужеца Аллагьасда гьаре Тӏадегӏанасул хӏакъалъулъ хабар хехго тӏибитӏизабизеги, нужер гьенибго гӏадин, машгьурлъуледухъ гьеб хабар гӏадамаз къабул гьабизеги нижее квербакъеян.

‏ 2 Thessalonians 3

1 Ахиралдаги, вацал, нужеца Аллагьасда гьаре Тӏадегӏанасул хӏакъалъулъ хабар хехго тӏибитӏизабизеги, нужер гьенибго гӏадин, машгьурлъуледухъ гьеб хабар гӏадамаз къабул гьабизеги нижее квербакъеян. 2 Киналго гурелъул божулел ругел, – пасатал ва квешал гӏадамаздаса ниж цӏунейиланги гьаре.

3 Кьураб рагӏи кколев Аллагьас нужер ракӏал къвакӏизарила ва квешлъиялдаса цӏунила. 4 Тӏадегӏанас нижерги ракӏчӏезабулеб буго нижеца малъарабщинаб нужеца гьабулеб букӏиналдаги хадубккун гьабизе букӏиналдаги. 5 Аллагьас нужер рекӏелъе лъугьинабеги жиндирго гӏадинаб рокьиги ва Масихӏил гӏадинаб сабруги.

6 Тӏадегӏанав Гӏиса Масихӏил цӏаралдалъун нижеца нужеда лъазабулеб буго, вацал, кӏвахӏалалщинал ва нижеца гьениб малъарабщинабги босичӏел нужер агьлуялъул чагӏаздаса рикӏкӏад чӏайилан. 7 Нужедаго лъалелъул нижедаса мисал босун хьвадизе кколеблъи. Ниж гьенир ругеб мехалъ нижер кӏвахӏаллъи бихьичӏогури нужеда. 8 Чияр хинкӏ-чедалде ккун рукӏинчӏо ниж гьенир, къаси-къад чӏечӏого хӏалтӏана нужер лъиданиги раччун рукӏинарилан. 9 Нужеца хьихьейилан абизе ихтияр букӏаниги, ниж гьедин хьвадана, нижедасан мисал босизе букӏине. 10 Ниж гьенир ругеб мехалъ нижеца абулаангури нужеда: хӏалтӏизе бокьуларев чи кваначӏого чӏайилан. 11 Нижеда рагӏидалха гьенир ругин кӏвахӏалал ва кколарелъуре раккун квалквал гьабулел цо-цо гӏадамал. 12 Тӏадегӏанав Гӏиса Масихӏил вакиллъиялдалъун гьединал чагӏазда гӏайибги чӏван, нижеца лъазабулеб буго: нужерго квералъ бетӏербахъиги гьабун, гӏодоре риччан чӏайилан.

13 Цинги, вацал, лъикӏлъи гьабун свакаге нуж. 14 Гьаб кагътида нижеца хъваралъухъ гӏенеккуларев чиясдеги кӏвар кьечӏого тоге. Живго намуслъизе, гьесулгун гьоркьоблъи гьабуге. 15 Амма тушманлъи лъазабичӏого, вацасе гӏадин, бадибчӏвай гьабе гьесие.

Кагътил ахир

16 Нилъ ракълиде рачарав Тӏадегӏанас ракълида таги нуж кидаго ва сундулъго.

Биччанте Тӏадегӏанав нужеда киназдаго цадахъ вукӏине.

17 Дирго квералъ хъвалеб буго: Павелил рахъалдасан салам буго нужеде. Гьадин чанго рагӏи хъвала дица щибаб кагътида, гьанибги хъвалеб буго.

18 Нилъер Тӏадегӏанав Гӏиса Масихӏил баркат лъеги нужеда киназдаго!