2Th 2 | AvaIBTNT | STEP | Тӏадегӏанав Гӏиса Масихӏ вачӏине вукӏиналъул ва нилъ гьесда аскӏоре данделъизе рукӏиналъул рахъ босани, дица нужеда гьарулеб буго, вацал,

‏ 2 Thessalonians 2

«Вачӏина кӏудияб квешлъи гьабизе бугев чи»

1 Тӏадегӏанав Гӏиса Масихӏ вачӏине вукӏиналъул ва нилъ гьесда аскӏоре данделъизе рукӏиналъул рахъ босани, дица нужеда гьарулеб буго, вацал, 2 лъилниги кашпу-караматалдалъун, яги вагӏза-насихӏаталдалъун, яги нижеца битӏарабилан абулеб кагътидалъун гьениб нужехъе хабар щвани Тӏадегӏанасул къо тӏаде гӏунтӏун бугилан, нуж рихха-хочуге ва гьедигӏан бигьаго къосинеги къосунге. 3 Лъицаниги кингоги гуккизе чӏоге нуж.

Гьеб къо тӏаде щвелалде гӏадамал Аллагьасда данде питнаялъе рахъина. Ракьалде вачӏина кӏудияб квешлъи гьабизе бугев ва хвалде иналъе хӏалтӏизе вугев чи. 4 Гьев чи дандечӏезе вуго гӏадамаз Аллагьлъун рикӏкӏунесдеги, гьез тӏагӏат-гӏибадат гьабулебщиналдеги. Жив гьездасаги тӏадегӏанав вугилан чӏела. Хӏатта Аллагьасул Мукъадасаб рокъов гӏодов чӏун, жив Аллагь вугиланги лъазабила гьес.

5 Дун гьенив вугеб мехалъ гьеб киналъулго хӏакъалъулъ бицун букӏанагури дица, нужеда ракӏалда гьечӏищ гьеб? 6 Гьанже нужеда лъала, гьев вачӏине мех щвезегӏан, сунца ккун чӏезавун вугевали. 7 Бахча-хьван жиндирго иш гьанжего гьабулеб буго гьеб квешлъиялъ. Амма гьеб ккун чӏезабун бугев нухдаса нахъе вачинегӏан, квешлъи загьирлъиларо. 8 Гьеле гьебмехалъ загьирлъила дов кӏудияб квешлъи гьабизе бугев чи. Тӏадегӏанав Гӏисаца тӏаде пун иш лъугӏизабила гьесул, Гӏиса вачӏиналъул кӏодолъиялъ хвезавила гьев. 9 Вачӏун гьев чияс, илбисалъул къуваталдалъун, батӏи-батӏиял гьересиял мугӏжизаталги гӏаламаталги рихьизарила. 10 Батӏи-батӏияб хӏилла-рекӏкӏалдалъун гуккила жидедаго тӏаде тамихӏ цӏалеб бугел гӏадамал. Гьедин ккела жиндалъун хвасарлъизе рукӏараб хӏакъабщинаб гьезие бокьуларелъул ва гьез гьебги нахъчӏвалелъул. 11 Гьеб сабаблъунин Аллагьас гьезухъе битӏулеб гьел къосинарулеб къуват ва гьересиялда гьел божизарулел. 12 Гьедин хӏакъабщиналдаги божичӏого, квешабщиналдаса лазат-кеп босаразе тамихӏ гьабила!

Павелил насихӏатал

13 Тӏадегӏанасе рокьулел нуж сабаблъун ккун нижеца кидаго Аллагьасе рецц гьабула, вацал, тӏоцере хвасарлъулеллъун Аллагьас нуж тӏаса рищун ругелъул. Нуж хвасарлъила – Илагьияб Рухӏалъ нуж рацӏцӏалъизаридал ва хӏакъабщиналда божидал. 14 Аллагьас нуж тӏаса рищана, нижеца бицараб Рохалил хабаралъухъ гӏенеккидал. Тӏадегӏанав Гӏиса Масихӏил машгьурлъи нужехъеги щвезейин нуж тӏаса рищарал. 15 Гьединлъидал, вацал, нуж къвакӏун чӏа ва вагӏза-насихӏатаздаги кагътидаги нижеца малъараб хӏакъабщинаб кьуричӏого ккве.

16 Тӏадегӏанав Гӏиса Масихӏица ва жиндие нилъги рокьарав, къин гьечӏеб къвакӏиги щулияб хьулги нилъее жиндирго баркатгун кьурав нилъер Эмен – Аллагьасги 17 нужер ракӏал къвакӏизареги ва лъикӏал ишазулъги рагӏабазулъги нужее квербакъаги.