Col 3 | AvaIBTNT | STEP | Масихӏида цадахъ чӏаголъана нужги. Гьединлъидал Аллагьасул кваранаб рахъалда Масихӏ гӏодов чӏун вугел зобалазда бугелъулин нужеца пикру гьабизе кколеб.

‏ Colossians 3

Цӏияб гӏумруялъул хӏакъалъулъ цоги нухалъ

1 Масихӏида цадахъ чӏаголъана нужги. Гьединлъидал Аллагьасул кваранаб рахъалда Масихӏ гӏодов чӏун вугел зобалазда бугелъулин нужеца пикру гьабизе кколеб. 2 Ракьалда бугелъул гьабичӏого, зобалазда бугелъул гьабе пикру. 3 Гьаб дуниялалъе нуж хвана. Масихӏил гӏумру гӏадин, нужер гӏумруги гьаб дуниялалдаса босун, жиндилъго бахчана Аллагьас. 4 Амма Масихӏ дуниялалъе загьирлъизе вуго. Гьев вуго нужер гӏумру – гьединлъидал гьев загьирлъаравго, гьесул машгьурлъи щвела нужееги.

5 Гьаб дуниялалъулалщинал жал: хъахӏбалъи, хъублъи, чорхол гьава, квешал къасдал къинаре нужелъго ва гьересиаллагьлъун кколеб къарумлъиялъе лагълъиги гьабуге! 6 Аллагьасул ццин бахъине буго гьел гӏамалал ккурал гӏадамазда. 7 Гьел рехсарал гӏамалаз нуж къосинарулел рукӏараб заманаялда, нужги хьвадулаан гьездаго релълъун. 8 Амма гьанже нуж рикӏкӏалъизе ккола ццидадаса, гьалаглъиялдаса, квешлъиялдаса; цоцаздасан какдезеги цоцазда квешал рагӏаби абизеги бегьуларо. 9 Цоцазе гьереси бицунге. Басрияб ретӏел гӏодобе рехулеб гӏадин, гьанже нужеца инкар гьабизе ккола цебе нужер букӏараб гӏумруялдасаги гӏамал-хасияталдасаги. 10 Нужее щвана цӏияб ретӏел – цӏияб гӏумру. Нуж Рижарасда релълъинелъун ва Аллагь цӏикӏкӏун лъазелъун буго гьеб нужер гӏумру цӏилъулебго цӏилъулеб. 11 Гьанже чиясул батӏалъи гьечӏо – грек вукӏаниги, жугьутӏав вукӏаниги, сунат гьабурав яги гьабичӏев вукӏаниги, апараг вукӏаниги, скиф ^{▼▼Скифал – Чӏегӏер ралъдадаса севералдехун гочарулеб букӏараб некӏсияб халкъ.} вукӏаниги, лагъ яги узден вукӏаниги. Вуго цохӏо Масихӏ! Гьев киназулъго вуго, кинабголъунги вуго! 12 Гӏаламалда гьоркьоса Аллагьас жиндиего бокьулеб агьлулъун лъугьинабизе тӏаса рищана нуж. Гьединлъидал нужее цӏияб ретӏеллъун букӏине биччанте гӏадамаздехун бугеб гурхӏел-рахӏмуги, лъикӏлъиги, хӏеренлъи-хӏалимлъиги ва сабруги. 13 Нужеца цоцазда гьоркьоб сабру цӏунизе ккола ва цоцазул гӏайиб-хатӏаялда тӏасалъугьинеги ккола – Бетӏергьан нужеда тӏасалъугьана, нужги цоцазда тӏасалъугьа. 14 Бищунго аслияб жо – нуж цоцазе рокьизе ккола. Рокьи буго кинабгоги цолъизабулеб ва камиллъизабулеб таж. 15 Масихӏидалъун нужее щвараб рекъелалъ кверщел гьабизе биччай нужер ракӏазда. Аллагьас тӏаса рищун нужее кьуна гьеб – гьедин цолъун, цого черх гӏадин лъугьана нуж. Аллагьасе рецц гьабе гьелъухъ! 16 Масихӏил рагӏул тӏолабго хазинаги рекӏелъ цӏунун, малъе цоцазда ва цоцазе гӏакълаби кье, туркаби ва Аллагь веццарал назмаби ахӏе, ракӏ-ракӏалъго Бетӏергьанасе рецц гьабе. 17 Тӏадегӏанав Гӏиса Масихӏил цӏар рехсон гурони щибго гьабуге, щибго абуге. Гьесул цӏарги рехсон нилъер Эмен – Аллагьасе реццги гьабе.

Агьлу-хъизаналъулги лагъзадерилги хӏакъалъулъ

18 Руччаби росабазе мутӏигӏлъе. Гьеб буго Тӏадегӏанав Гӏисаде иман лъуразул нух. 19 Росабазе лъудби рокье ва гьездехун хъачӏлъуге. 20 Лъималаз эбел-инсул малъараб гьабе сундулъго, гьеб буго Тӏадегӏанав Гӏиса разилъулеб гӏамал. 21 Эбел-инсуца лъимал къварид гьаруге, гьел пашманлъизе гурин. 22 Лагъзал сундулъго мукӏурлъе гьаб ракьалда ругел жидерго бетӏергьабазе. Гьел ругеб бакӏалда жалго лъикӏ рихьизе гуребги, гьел гьечӏеб бакӏалдаги мукӏурлъе кидаго, ракӏ-ракӏалъго ва Тӏадегӏанасукьа хӏинкъун. 23 Гӏадамазе гӏоло гуреб, Тӏадегӏанав Гӏисае гӏоло гьабулеб бугеб гӏадин щибгоги ракӏ-ракӏалъго тӏубазабе. 24 Хӏакъикъаталда нужеца лагълъи гьабулеб буго Тӏадегӏанав Масихӏие. Жиндирго халкъалъе цӏунун бугеб хазинаялъул бутӏа шапакъатлъун кьела Тӏадегӏанас нужее нужер киналго ишазухъ. Гьеб лъай нужеда. 25 Нужеда лъай квешлъи гьабуразе тамихӏ букӏине бугеблъи, – квешал ишазухъ киналго гӏадамазе тамихӏ цого къагӏидаялъ гьабизе буго.