Colossians 4
1Ле, лагъзадерил бетӏергьаби, нужеца нужерго лагъзадерида тӏад ритӏухъаб къагӏидаялъ кверщел гьабе гьел ратӏа гьаричӏого. Нужеда кӏочон тоге зобалазда нужерги Бетӏергьан вугевлъи. 2Рорчӏуда чӏа ва кидаго Аллагьасе рецц гьабун гьари-дугӏаялда рукӏа. 3Нижги дугӏадулъ рехсе. Масихӏилъ бугеб балъголъиялъул бицине нижер кӏалаздаса кӏулал ричӏейилан гьаре Аллагьасда. Гьеб сабаблъунин дун туснахъалъув вугев. 4Дида тӏадаб куцалда гьеб баянго бичӏчӏизабизе дие рес ккагийилан гьаре нужеца. 5Нужерго заман гӏадада хвеларедухъ гӏакъилго-цӏодорго гьоркьоблъи гьабе иман лъечӏезулгун. 6Тӏаде цӏам щвараб кваница гӏадин гӏадамал рази гьарулеб ва баркат бугеб букӏине ккола нужер калам. Суал кьуравщинасе жаваб кьезеги лъазе ккола.Тихикилги Онесимилги хӏакъалъулъ
7Дир хӏакъалъулъ нужеда бицина дир хирияв диналъул вац ва Тӏадегӏанав Гӏисал ишалъе хъулухъ гьабулев вугев Тихикица. 8Гьединаб мурад букӏунин дица гьев нужехъе витӏарав. Гьес нижер ахӏвал-хӏал нужеда бицина ва нужер ракӏбатизабила. 9Гьесда цадахъ вачӏина нижее вокьулев ритӏухъав вац Онесимги. Нужер чи вуго гьев. Гьез бицина нужеда гьаниб ккарабщиналъул хӏакъалъулъ.Гьудулзабазул саламалги цогидал насихӏаталги
10Нужеде салам буго дида аскӏов туснахъалъув вугев Аристархилги Маркилги (гьев Марк ккола Барнабал вацгӏал, гьесул хӏакъалъулъ ругьел битӏун букӏана нужехъе, гьениве вачӏани, гьесие гьоболлъи гьабеян). 11Юст абун тӏокӏцӏар бугев Гӏисалги буго нужеде салам. Аллагьасул Парччахӏлъиялъе гӏоло дида цадахъ хӏалтӏулел ругел дир кумекчагӏазда гьоркьор гьел гурони жугьутӏал гьечӏо. Кидаго дир рекӏее бигьалъи лъугьинабулел чагӏи руго гьел. 12Масихӏ Гӏисае хъулухъ гьабулев чи нужерго Эпафрасилги буго нужеде салам. Нужги рехсон, кидаго Аллагьасде кӏудияб гьари-дугӏаялда вуго гьев. Нуж камиллъагиян ва Аллагь разилъулебщинабги нужехъа лъугьагиян гьарулеб буго гьес. 13Лаодикеялда ва Иераполалда ругел иман лъуразеги нужееги гӏоло гьев хӏаракаталда хӏалтӏулев вукӏиналъе нугӏлъи гьабулеб буго дица. 14Нужеде салам битӏулеб буго Демасица ва нижер хирияв тохтир Лукацаги. 15Нижер салам бице Лаодикеялда ругел вацазда, гьединго Нимфада ва гьелъул рокъоб данделъулеб жамагӏаталда. 16Нужеца цӏалун бахъараб мехалъ, гьаб кагъат битӏе Лаодикеялда ругел вацазухъе, гьезги цӏализе букӏине. Доб Лаодикеялде битӏараб кагъат нужехъе бачӏинабе, нужецаги цӏализе. 17Архиппида абе Тӏадегӏанав Гӏисал тӏадкъай тӏубазабизе кколилан. 18Дица – Павелица – дирго квералъ хъвараб саламги битӏулеб буго нужеде. Дида рахсал ран рукӏин кӏочон тоге. Баркат лъеги нужеда!
Copyright information for
AvaIBTNT