Gal 2 | AvaIBTNT | STEP | Цинги анцӏила ункъо соналдасан Барнабада цадахъ нахъеги Иерусалималде ана дун, Титги цадахъ вачана.

‏ Galatians 2

Иерусалималда чапарзабигун дандчӏвана дун

1 Цинги анцӏила ункъо соналдасан Барнабада цадахъ нахъеги Иерусалималде ана дун, Титги цадахъ вачана. 2 Аллагьас айилан лъазабидал, ана дун гьениве. Батӏи-батӏиял халкъазда лъазабураб Рохалил хабар дица къо-асс бугелилан рикӏкӏунел гӏадамазда бицана, батӏаго гьелгун дандчӏван. Гӏадада ккечӏодай дир чодул кӏанцӏи, пайда бахинадай гьанже кӏанцӏиялъулгиян абуна дица гьезда.

3 Дида цадахъ вукӏарав Титцин, гьев грекав вукӏаниги, сунат гьабизе лъицаниги тӏамичӏо гьенив. 4 Амма цо-цо «гьересиго вацал» дагьа-дагьалккун нижеда гъорлъе рорчӏулел рукӏана, Масихӏ Гӏисадасан щвараб нижер эркенлъи кинаб бугебали жасуслъи гьабизе ва ниж лагъзаллъун ккезаризеги бокьун. 5 Рохалил хабаралъул хӏакъаб магӏна нужелъ хутӏизелъун цо лахӏзаталъгицин мутӏигӏлъичӏо ниж гьезие.

6 Амма къо-асс бугелилан рикӏкӏунел гьел гӏадамаз, – дие батӏалъи гьечӏо гьел щал рукӏун ратаниги, гьурмахъ балагьун иш гьабуларелъулха Аллагьас, – къо-асс бугелилан рикӏкӏунел гьел гӏадамаз щибго тӏаде жубачӏо дица лъазабулеб букӏаралде. 7 Гьелъул гӏаксалда, гьезда бихьана, жугьутӏазда Рохалил хабар лъазабизе Пётрие изну кьун букӏарабго гӏадин, цогидал халкъазда гьеб лъазабизе Аллагьас диеги изну кьун букӏин. 8 Жугьутӏазда Рохалил хабар бицунеб мехалда Пётрилъ букӏараб Рухӏ дилъги букӏиндалха цогидал халкъазда Рохалил хабар бицунеб букӏараб мехалда. 9 Цинги дие щвараб баркатги лъан, дихъеги Барнабахъеги, нилъ цолъун рукӏинилан, квер бегьана иман лъуразул агьлуялъул бутӏруллъун рикӏкӏунел рукӏарал Якъубица, Кефаца ва Иоанница. Хӏукму ккана ниж цогидал халкъазухъе ине, гьел жугьутӏазухъе ине. 10 Гьез цохӏо жо гьарана нижеда, жидер мискинзаби кӏочон тогеян, – гьелъиени дица кидагоги хӏаракат бахъула!

Антиохиялда Пётрида дандечӏун кӏалъана дун

11 Амма Пётр Антиохиялде вачӏараб мехалъ, гӏадамазда цеве гьесда дандечӏун кӏалъазе вахъана дун, гьениб гьес гьабидалха гӏайиб чӏвазе ккараб иш. 12 Якъубица ритӏарал гӏадамал гьенире рачӏиналде гьев кваналаан мажусиязда гьоркьоса иман лъуразда цадахъ гӏодовги чӏун. Гьел рачӏун хадуса гьес байбихьана, жугьутӏазда гьоркьоса иман лъураз жиндаго гӏайиб чӏвалилан хӏинкъун, дозда аскӏоса ватӏалъизе. 13 Гьесда цадахъ гьебго жо хӏазе лъугьана цогидал жугьутӏалги. Хӏатта Барнабагицин лъугьана гьезухъего хӏазе! 14 Рохалил хабаралъул хӏакъикъияб нухдаса гьел кьурулел рукӏин бихьидал, киналго ругеб бакӏалда дица Кефада абуна: «Жугьутӏав вугониги, мун цогидал халкъазул гӏадамал гӏадин хьвада-чӏвадулев вуго. Дуца цогидал халкъазул гӏадамал щай тӏамулел ругел жугьутӏазухъего хьвадизе?» – ян.

Масихӏиде иман лъеялдалъун ритӏухълъула гӏадамал

15 «Мунагьазул цӏурал мажусияллъун» гурел, жугьутӏаллъун рижун руго ниж. 16 Амма нилъеда лъала Аллагьасда цеве инсан, Къанун цӏуниялдалъун гурев, цохӏо Гӏиса Масихӏиде бугеб божи-иманалдалъун ритӏухълъулевлъи. Нилъеца Гӏиса Масихӏиде иман лъуна, – Къануналъ малъухъе хьвадиялдалъун гуреб, Масихӏиде иман лъеялдалъун Аллагьасда цере ритӏухълъизе бокьун. Къануналъ малъухъе хьвадиялдалъун цониги инсан ритӏухълъуларо. 17 Масихӏидеги цолъун, Аллагьасда цере ритӏухълъизе нилъеца хӏаракат бахъулеб бугониги, нилъ мунагьал гьарулел чагӏилъун лъугьунел ругони, – Масихӏги мунагьалъул рахъалда вугин абураб магӏна кколебищ гьелъул? Гьайгьай, кколаро! 18 Дицаго биххизабунщинаб жо цӏидасан гьабизе лъугьани, Мусал Къанун хвезабурав такъсирчилъун лъугьинавила дица дунго. 19 Къануналда рекъон дун хварав чи ккола. Къануналъ дун чӏвана Аллагьасе гӏоло дица гӏумру гьабизе. Масихӏида цадахъ хъанчида варав чийин дунги. 20 Гьединлъидал дун тӏокӏалъ чӏаго гьечӏо, амма дилъ Масихӏ чӏаго вуго. Гьабсагӏат дир бугеб гӏумру – гьеб буго Аллагьасул Васасде иман лъеялдалъун щвараб гӏумру. Гьесие дун вокьана ва жиндирго гӏумруги гьес дие кьуна. 21 Аллагьасул баркаталдаса дица инкар гьабуларо. Къануналъ малъухъе хьвадиялдалъун Аллагьасда цеве ритӏухълъизе инсанасда кӏолеб бугони, Масихӏил хвел гӏададисеб буго!