Gal 5 | AvaIBTNT | STEP | Эркенлъи щвезелъун тархъан гьаруна Масихӏица нилъ. Гьединлъидал гьеб эркенлъиги ккун чӏа, лагълъиялъул рукь нахъеги горбоде ккезе биччаге.

‏ Galatians 5

Къанунги эркенлъиги

1 Эркенлъи щвезелъун тархъан гьаруна Масихӏица нилъ. Гьединлъидал гьеб эркенлъиги ккун чӏа, лагълъиялъул рукь нахъеги горбоде ккезе биччаге. 2 Гьале дица, Павелица, абулеб буго нужеда: нужеца гьанже сунат гьабуни, нужее Масихӏидасан щибго пайда букӏине гьечӏо. 3 Цоги нухалъ лъазабулеб буго дица: сунат гьабулевщинав чияс тӏолабго Къанун цӏунизе ккола. 4 Къанун цӏуниялдалъун Аллагьасда цере ритӏухълъизе бокьарал нуж Масихӏидаса ратӏалъана. Баркаталдасаги тӏуна нуж. 5 Нилъер хьул буго Аллагьасда цере ритӏухълъилилан. Божулел ругелъулин нилъ гьелъухъ ралагьун чӏолел. 6 Масихӏидехун цолъаразе амрулъун кколаро сунат гьаби ялъуни гьабичӏого тей. Амма гьезие амру ккола цоцазе рокьиялдалъун загьирлъулеб божи-иман.

7 Нужер чу лъикӏго бекерулеб букӏана, – хӏакъабщиналда божизе лъицаха нужее квалквал гьабулеб бугеб? 8 Нуж жиндихъего ахӏарав Аллагьасдасан бачӏараб жо гуро нужер пикру хисизабизе гьез бахъулеб хӏаракат. 9 Гьитӏинаб ицица тӏубараб тӏимугъ кванала. 10 Амма дир ракӏчӏола, Тӏадегӏанав Гӏисадехунги цолъун, нужеца батӏияб пикру гьабиларилан. Нуж ита-таризе гьарулев чиясе, щив гьев вукӏаниги, Аллагьас суд гьабила.

11 Дирго рахъалъ абуни, вацал, дица цебе гӏадин малъулеб бугеб батани сунат гьабизе кколилан, щиб сабаблъунха дие гьанжеги гӏакъуба кьолеб бугеб? Гьеб гьедин букӏарабани, Масихӏ жинда тӏад вигъараб хъанчил хӏакъалъулъ дир вагӏзаялъ гьезул ццин бахъинабилароан. 12 Дие бокьилаан нуж итизе-таризе гьарулел ругел гьел гӏадамал, жидецаго жидерго лугбиги къотӏун, гӏайиблъизе!

13 Нуж руго, вацал, эркенго рукӏине Аллагьас тӏаса рищарал чагӏи. Амма гьеб эркенлъиялдаса нужеца пайда босуге нужерго напсалъул гьаваялда нахърилълъине. Цоцазде бугеб рокьиги тӏезе биччаге, вацал, цоцазул лагъзаллъунги рукӏа! 14 Тӏолабго Къануналъул магӏна буссун бугелъулха цохӏо амруялде: «Мунго дуего гӏадин вокье дуде гӏагарав чиги». 15 Нужго нужедаго хӏанчӏелел ва цоцаца кваналел ругони, цоцаца кванан лъугӏизе гурин нуж. 16 Гьале дица нужеда абулеб: нуж хьваде Рухӏалъ малъулеб бугеб куцалда, напсалъул гьаваялда хадур инаро нуж гьебмехалда. 17 Напсалъе бокьула Рухӏалъе тушманабщинаб, Рухӏалъеги бокьула напсалъе тушманабщинаб. Рухӏги напсги цоцалъ рагъулел ругелъул, рекӏее бокьараб гьабизе бажаруларо нужехъа. 18 Рухӏалъ малъараб гьабулеб бугони, Къануналъул кверщаликь рукӏунаро нуж. 19 Нилъеда лъала напсалъ гьабулебщинаб: хъахӏбалъи, хъублъи, пасалъи, 20 гьересиаллагьзабазе лагълъи гьаби, сихӏручилъи, тушманлъи, дагӏба-къец, ракӏквешлъи, ццидахин, чӏухӏун церекӏанцӏи, цоцазда гьоркьоб рикьи ккезаби, рикьалаби гӏуцӏи, 21 жахӏда, гьекъел-мехтел, пасатго лазат-кеп босизе данделъи ва гьезда релълъаралги. Дица цебеги абун букӏана ва гьанжеги лъазабулеб буго нужеда: гьединал ишал гьарулел гӏадамазе Аллагьасул Парччахӏлъи насиблъуларо.

22 Рухӏалъ инсанасе босун бачӏуна: рокьи, рохел, рекъел, сабру, лъикӏлъи, ракӏлъикӏлъи, божизе бегьи, 23 хӏалимлъи, жиндаго квелъ базе бажари. Гьел сабаблъун лъиениги тамихӏ гьабуларо. 24 Масихӏ Гӏисаде цолъараз, жидерго мунагьаб напс хъанчида тӏад бигъараб гӏадин, чорхол киналго лазаталги гьаваги къезаруна.

25 Нилъее гӏумру Рухӏалъ кьун бугелъул, нилъ хьвадизе ккела Рухӏалъ малъухъе. 26 Рачӏа нилъ рецц-бакъалда хадур лъугьинарин, цоцазул ракӏхвезабун къацандиларин ва нилъеца цоцаздехун жахӏдаги гьабиларин.