Gal 6 | AvaIBTNT | STEP | Я дир вацал, цо чияс кинаб бугониги мунагь гьабун букӏин лъани, Рухӏалъ малъухъе хьвадулел ругелъул нуж, хӏалимго-хӏеренго битӏараб нухде ваче нужеца гьев. Вореха, нужгоги къосине гурин.

‏ Galatians 6

1 Я дир вацал, цо чияс кинаб бугониги мунагь гьабун букӏин лъани, Рухӏалъ малъухъе хьвадулел ругелъул нуж, хӏалимго-хӏеренго битӏараб нухде ваче нужеца гьев. Вореха, нужгоги къосине гурин. 2 Цоцазул раччи бачче нужеца ва гьедин Масихӏил къанунги цӏуне. 3 Цо лъиданиги ракӏалде кколеб бугеб батани, щивго гурев жоги вукӏаго, жив щивнигийилан, гьес живго гуккулев вуго. 4 Щивав чияс хал гьабизе ккола жиндирго ишазул. Гьел ишал лъикӏал ругони, цогидазул ишазул пикруги гьабичӏого, гьездаса разилъизе бегьила гьев. 5 Щивас жиндирго гьир баччизе кколелъулха! 6 Аллагьасул рагӏи тӏалаб гьабулев вугев чияс жиндиего щвараб боцӏи-рикъзи бикьун кьезе ккола гьеб малъулев насихӏатчиясеги.

7 Къосине чӏоге нуж: лъиданиги кӏоларо Аллагь гуккизе! Бекьараб гурони хуриб бижуларо. 8 Напсалъе бокьулеб бекьарасе напсалъул хуриб хвел бижула; Рухӏалъе бокьулеб бекьарасе Рухӏалъул хуриб абадияб гӏумру бижула. 9 Лъикӏлъи гьабулаго нилъ ракӏ гӏодоб чӏван рукӏинарин. Тӏадчӏун хӏалтӏани, нилъер хуриб хӏалухъен жиндир заманалда бижила. 10 Гьанже, рес букӏаго, лъикӏлъи гьабилин, хасго нилъерго диналъул агьлуялъе.

Эркенлъиги Масихӏил хъанчги

11 Балагье дирго квералъ гьел рагӏаби кигӏан чӏахӏиял хӏарпаздалъун нужехъе хъван ругелали. 12 Гӏадамазда жалго лъикӏ рихьизе бокьулез нуж сунат гьабизе тӏамизе хӏаракат бахъулеб буго, Масихӏил хъанчидалъун жидее гӏазаб-гӏакъуба щунгутӏизелъун. 13 Сунат гьабиялъул рахъ кколез жидецагоги тӏубазабуларо Къануналъ абулебщинаб. Гьезие бокьун буго нуж сунат гьабизе тӏамизе, балагье нужги напсалъе мутӏигӏлъулел ругилан чӏухӏдаризе гӏоло. 14 Диени киданиги сундасаниги чӏухӏизе бокьиларо, нилъер Тӏадегӏанав Гӏиса Масихӏил хъанчидаса гурони! Гьеб хъанчида тӏад бигъун хвана дие гӏаламги гӏаламалъе дунги. 15 Сунат гьабиялъулъ яги гьабунгутӏиялъулъ гуро иш бугеб, цӏияб вижиялдалъун вижун вукӏиналъулъин. 16 Гьеб амруялда рекъон хьвадулелщиназде рекъелги баркатги рещтӏаги ва Аллагьас тӏаса бищараб тӏолабго халкъалдеги рещтӏаги.

Кагътил ахир

17 Гьанжеялдаса нахъе лъицаниги кьоге дие гӏакъуба, дир черхалда ругелъулха Гӏисада лъурал ругънал! 18 Нилъер Тӏадегӏанав Гӏиса Масихӏил баркат лъеги, вацал, нужер рухӏазда. Амин!