Heb 1 | AvaIBTNT | STEP | Цебе заманалда чанго нухалъ ва батӏи-батӏияб къагӏидаялъ кӏалъана Аллагь нилъер умумуздехун жиндирго аварагзабиги ритӏун.

‏ Hebrews 1

Аллагь нилъедехун кӏалъана, жиндирго васги витӏун

1 Цебе заманалда чанго нухалъ ва батӏи-батӏияб къагӏидаялъ кӏалъана Аллагь нилъер умумуздехун жиндирго аварагзабиги ритӏун. 2 Гьаб дуниялалъул ахир гӏагарлъараб заманалдайин абуни, гьев нилъедехун кӏалъана жиндирго васги витӏун. Васасе щвезе буго Аллагьас бижанщинаб, гьесдалъун бижана дуниял-гӏалам. 3 Васасулъ загьирлъула Аллагьасул Нур. Гӏицӏго гьев васасулъ буго Аллагь гӏадамазда вихьизавизе кӏолеб сипат-сурат. Васасул къудратаб рагӏиялъ ккун буго тӏолабго дуниял-гӏалам. Гӏадамазул мунагьалги чуризарун, Къудратав Аллагьасул кваранаб рахъалда гӏодов чӏана гьев зобалазда.

4 Малаикзабазулаздаса кигӏан тӏадегӏанаб цӏар Аллагьас гьесие кьураб батаниги, гьебго даражаялда малаикзабаздаса тӏадегӏанлъизавуна гьес жиндирго вас. 5 Цониги малаикасда абурабищ Аллагьас:

«Мун дир Вас вуго.

Жакъа дун дур Эменлъун лъугьана», – ян?

Цониги малаикасул хӏакъалъулъ абичӏо Аллагьас:

«Дун гьасул Эменлъун лъугьина,

Гьавги дир Васлъун лъугьина», – ян.

6 Жиндирго тӏоцеве гьавурав Вас ракьалде витӏулеб мехалъ, гьес абуна:

«Аллагьасул киналго малаикзабаз гьасие сужда гьабизе буго», – ян.

7 Малаикзабазул хӏакъалъулъ абун буго:

«Аллагьас рижарал малаикзаби гьурал гӏадинал руго, гьесул рагьтӏателалги цӏадул мацӏал гӏадинал руго».

8 Васасул хӏакъалъулъ абун буго:

«Абадул-абадиялъго букӏина дур парччахӏлъи!»

Цогиги:

«Ритӏухъаб ханлъи гьабила, я Бетӏергьан,

дуца дурго халкъалъе.

9 Ритӏухълъи дуе хирияб буго,

квешлъи дуе цӏакъ рихараб буго.

Гьединлъидалин, я дир Парччахӏ,

дур Аллагьас мун тӏаса вищарав,

парччахӏлъун вукӏинеги мустахӏикълъарав.

Дур гьалмагъзабазеялдаса цӏикӏкӏараб рохелги хӏурматги насиблъана дуе».

10 Цоги абун буго:

«Дуца тӏоцебе ракь бижана, я Бетӏергьан,

Дуца зобалги рижана.

11 Гьел щущан ина, амма мун нахъе хутӏила.

Ретӏел-кун гӏадин хохон ина гьел киналго.

12 Тӏимугъ гӏадин гура-сурун рехила дуца гьел,

Гурде-тӏажу гӏадин, хис-хисила гьел,

Амма мун киданиги хисиларо.

Дуе ахир гьечӏо».

13 Аллагьас цониги малаикасда киданиги абурабищ:

«Дир кваранаб рахъалда гӏодов вукӏа,

дица дур тушбаби дур хӏатӏал лъураб бакӏалда цере чӏезаризегӏан»?

14 Малаикзаби щал кколел? Гьел руго Аллагьасе хъулухъалъе чӏарал ва хвасарлъи ирсалъе щолезе кумек гьабизе гьес ритӏулел рухӏал.