Heb 2 | AvaIBTNT | STEP | Гьединлъидалин нилъеда рагӏараб Аллагьасул калам щулаго кквезе кколеб, хӏакъаб нухдаса нилъго тарунгутӏизе.

‏ Hebrews 2

Хӏакъабщинаб къахӏан ккве

1 Гьединлъидалин нилъеда рагӏараб Аллагьасул калам щулаго кквезе кколеб, хӏакъаб нухдаса нилъго тарунгутӏизе. 2 Малаикзабиги ритӏун нилъер умумузухъе Аллагьас рещтӏинабураб рагӏигицин щулияб букӏана, гьелъие мукӏурлъичӏезе яги гьелъухъ гӏенеккичӏезе ритӏухъаб тамихӏги гьабуна. 3 Гьанже загьирлъараб цӏакъго кӏудияб хвасарлъиялде мугъ рехани, кинха нилъ хвасарлъилел? Тӏадегӏанас жинцаго тӏоцебе лъазабуна нилъеда гьеб хвасарлъиялъул хӏакъалъулъ, гьесухъ гӏенеккаразги бихьизабуна гьеб хӏакъаб букӏин. 4 Батӏи-батӏиял мугӏжизаталги гӏаламаталги рихьизарун ва батӏи-батӏияб къагӏидаялъ Илагьияб Рухӏги жиндиего бокьухъе гӏадамазде рещтӏинабун, Аллагьас жинцагоги нугӏлъи гьабуна гьелъие.

Нилъ хвасарлъиялде рачунев Масихӏ

5 Гьеб нилъеца бицунеб бугеб цӏияб дуниялалъул кверщел малаикзабазухъе гуро Аллагьас кьураб. 6 Тӏухьдузда буго гьадин хъвараб бакӏ:

«Гӏадан щиб жо кколеб, я Аллагь,

дуца гьесул пикру гьабизе ккани?

Инсанасул тӏалаб щай дуца гьабулеб?

7 Малаикзабазулалдаса дагьабго гӏодобегӏанаб даража кьуна дуца инсанасе,

Цӏарги реццги насиблъизабуна дуца гьесие,

8 Бижанщиналъул кверщелги кьуна гьесухъе».

«Бижанщиналъул кверщел кьунин» инсанасухъейилан абулеб буго, гьесул кверщаликь гьечӏеб жо щибниги хутӏичӏеблъиги бичӏчӏулеб буго. Бугониги – бижанщиналъул кверщел гьанже инсанасухъ бихьулеб гьечӏо нилъеда.

9 Амма нилъеда вихьулев вуго Аллагьасул рахӏму-цӏобалдалъун нилъ киназего гӏоло хвезе дагьабго заманаялъе «малаикзабазулалдаса дагьабго гӏодобегӏанаб даража кьурав» Гӏиса. Нилъеда бихьулеб буго, жинца хӏехьараб хвел сабаблъун, гьанже гьесие «цӏарги реццги насиблъун букӏин». 10 Кинабго сундуего ва жинцаго бижарав Аллагьас Гӏиса гӏазаб-гӏакъубаялдалъун камиллъизави ритӏухълъараблъи бихьана нилъеда, – гӏемерал лъималазе гьесул цӏар-реццалъул бутӏа щвана. Гӏисацалъидалин гьел хвасарлъиялде рачунел!

11 Гьеслъидал гӏадамал рацӏцӏалъизарулел. Жинца гӏадамал рацӏцӏалъизарулевги ва жал рацӏцӏалъизарулелги Цохӏо вугесдасан рачӏарал руго. Гьединлъидалин Гӏиса намуслъуларев гьел жиндир вацал ругин абизе. 12 Гьес Аллагьасда абулеб буго:

«Дица дирго вацазул жамагӏаталда жанив мун кӏодо гьавила,

гьезул данделъиялда рецц гьабила дица дуе».

13 Цоги гьес абулеб буго:

«Гьесдейин дир хьул букӏинеб».

Цоги гьес абулеб буго:

«Гьале дунги дие Аллагьас кьурал лъималги».

14 Лъималилан гьес гӏадамазда абулеб бугелъул, гьелго гӏадинав гьанги биги чорхолъ бугев инсанлъун лъугьана Гӏисаги. Гьедин гьабуна гӏадамал хвезаризе кӏолеб илбис жиндир хвалидалъун хвезабизе бокьун. 15 Гьедин Гӏисаца тархъан гьаруна гӏумруялъго хваликьа хӏинкъун рукӏарал гӏадамал. 16 Малаикзабазе хӏалае гуро гьев вахъунев. Гьев хӏалае вахъуна Ибрагьим аварагасул зурияталъе.

17 Гьедин Гӏиса сундулъго жиндирго вацазда релълъине кколаан. Гьезда гурхӏулев ва ритӏухъав бищунго кӏудияв кашишлъун лъугьана ва, гӏадамазул мунагьал чурун, Аллагьасул амру тӏубазабуна гьес. 18 Илбисалъ гьабураб хӏалбихьиялъул гӏакъуба жинцагоги хӏехьедал, гьанже Гӏисада кӏола гьелъ хӏалбихьулеб бугезе кумек гьабизе.