Heb 8 | AvaIBTNT | STEP | Гьале нижее гьанже абизе бокьараб жо: Къудратав Аллагьасул тахалъул кваранаб рахъалда зобалазда гӏодов чӏарав бищунго кӏудияв кашиш вуго нилъер.

‏ Hebrews 8

Аллагьас цӏияб Къотӏи гьабуна

1 Гьале нижее гьанже абизе бокьараб жо: Къудратав Аллагьасул тахалъул кваранаб рахъалда зобалазда гӏодов чӏарав бищунго кӏудияв кашиш вуго нилъер. 2 Бищунго кӏудияв кашишас гӏадин, Гӏисаца хъулухъ гьабулеб буго, инсанас гуреб, Бетӏергьанас чӏвараб унго-унгояб чадиралъуб бугеб Мукъадасаб бакӏалда.

3 Бищунго кӏудияв кашиш тӏамула Аллагьасе къурбаналги сайигъаталги гьаризе. Нилъер бищунго кӏудияв кашишасги гьединго цо щибниги жо къурбанлъун гьабизе кколеб букӏана. 4 Гьев ракьалда вукӏаравани, кашишлъунцин вукӏинароан. Ракьалда ругелъул Къануналда рекъон Аллагьасе къурбанал гьарулел кашишзаби. 5 Гьез жаниб хъулухъ гьабулеб чадир ккола зобалазда бугеб мукъадасаб чадиралъул рагӏадлъунги суратлъунги. Гьединго ккана Мусалги: Мусаца мукъадасаб чадир чӏвазе кколеб букӏараб мехалда, Аллагьас гьесда абуна: «Доба магӏарда дуда бихьизабун букӏараб зобалазул чадиралъул сураталда рекъон гьабе кинабго». 6 Гьале гьанже Гӏисае щвана кашишлъиялъул хъулухъ, – цере рукӏарал кашишзабазулалдаса гӏемерго тӏадегӏанаб. Гьединго тӏадегӏанаб буго Аллагьасдаги гьесул халкъалдаги гьоркьоб Гӏисадалъун лъугьараб Къотӏи. Лъикӏабщиналъе кьураб рагӏул кьучӏалда гьабураб бугелъул, цӏакъго лъикӏаб Къотӏи буго гьеб.

7 Доб тӏоцебесеб къотӏи камилаб букӏарабани, кӏиабизеги къотӏи гьабизе ккелароан. 8 Гӏадамазда гӏайиб чӏвазе гӏилла ккедал, Аллагьас гьадин абуна:

«Тӏаде щолеб буго, – ян абулеб буго Бетӏергьанас, –

Исраилил халкъалъулгун ва Ягьудал халкъалъулгун дица цӏияб къотӏи гьабулеб заман.

9 Доб къоялъ, квер ккун рачун, Мисриялдаса къватӏире лъугьинарулаго, гьезул умумузулгун дица гьабун букӏаралда релълъараб букӏинаро гьеб Къотӏи.

Гьабураб Къотӏиялъе ритӏухълъи цӏуничӏелъул, дица гьел рехун тана», – ян абулеб буго Аллагьас.

10 «Гьале дица Исраилил халкъалъулгун хадусеб заманалъе Къотӏи гьабулеб буго, – ян абулеб буго Бетӏергьанас.

Дица дирго амруял гьезул гӏакълуялъулъе лъугьинарила.

Гьезул ракӏазда хъвала дица гьел.

Дун вукӏина гьезул Аллагьлъун,

Гьел рукӏина дир халкълъун.

11 Гьезул лъицаниги мадугьаласе гӏакълу кьеларо

Ва диналъул вацасдаги лъицаниги абиларо:

„Дурго Бетӏергьан щивали лъазаве“, – ян.

Гӏисиназдаги чӏахӏияздаги –

киназдаго дун лъазе вугелъул!

12 Гьезул мунагьаздаса дун тӏасалъугьина,

гьезул гъалатӏ-хатӏаги тӏокӏаб ракӏалде щвезабиларо».

13 Цӏияб Къотӏиялъул бицунаго, Аллагьас доб тӏоцебесеб Къотӏи басралъизабулеб буго. Басралъарабщинабги херлъарабщинабги хехго хола, тӏагӏуна.