Phili 1 | AvaIBTNT | STEP | Филиппиялда ругел киналго Масихӏ Гӏисаде цолъун иман лъуразде, нужер агьлуялъул бутӏрузде ва церехъабазде салам буго Масихӏ Гӏисае хъулухъалъе чӏарал Павелилги Тимофейилги.

‏ Philippians 1

Саламалъул рагӏаби

1 Филиппиялда ругел киналго Масихӏ Гӏисаде цолъун иман лъуразде, нужер агьлуялъул бутӏрузде ва церехъабазде салам буго Масихӏ Гӏисае хъулухъалъе чӏарал Павелилги Тимофейилги. 2 Нилъер Эмен – Аллагьасулги Тӏадегӏанав Гӏиса Масихӏилги баркатги саламги лъеги нужеда.

Аллагьасде гьари-дугӏа

3 Нуж ракӏалде щванщинахъе дица рецц гьабула дир хирияв Аллагьасе. 4 Нужеда киназдаго гурхӏагиян Аллагьасда гьарулебщинахъе дир рекӏелъе рохел лъугьуна, 5 дун тӏоцеве нужехъе вачӏараб къоялдаса жакъалъизегӏан Рохалил хабаралъе гӏоло гьабулеб хӏаракатчилъиялъулъ нужги гӏахьаллъидал. 6 Дир ракӏчӏола, нужелъе лъикӏлъи лъугьинабизе байбихьарав Аллагьас гьеб рагӏа-ракьанде щвезабилин Масихӏ Гӏиса вачӏараб къоялде абун. 7 Нужер хӏакъалъулъ гьединаб пикру букӏинарищ дир, кидаго дир рекӏелъ нужеде рокьи бугелъул. Нужедаги дидаги Аллагьасул баркат лъуна дун туснахъалъув вугеб мехалъги, Рохалил хабар тӏибитӏизабизе къеркьон, гьеб битӏараб букӏин чӏезабулеб мехалъги. 8 Аллагьасда лъала Гӏиса Масихӏил гӏадинаб урхъиялдалъун дун нужехъ киназухъго чӏалгӏун вугеб куц. 9 – 10 Дица Аллагьасда гьарула, бищунго лъикӏаб тӏаса бищизе нужеда лъазе, Масихӏ вачӏараб къоялде нуж, хъубаб тӏанкӏ лъечӏого, нухдаса таричӏого хутӏизе нужер рекӏелъ рокьи цӏикӏкӏагийилан, гӏакълуги цӏубайгийилан, цӏодорлъиги камиллъагийилан. 11 Нужер рацӏцӏалъиялъул гъотӏода пихъ гьарзаго бижила гьебмехалъ. Гьедин Гӏиса Масихӏидалъун Аллагьасул кӏодолъи загьирлъила ва гӏадамаз гьесие рецц гьабила.

Рохалил хабар дагьабги цӏикӏкӏун тӏибитӏана

12 Балагьея, вацал, дир гьаб ахӏвал-хӏалалъ дагьабги цӏикӏкӏун квербакъи гьабуна Рохалил хабар тӏибитӏиялъе, 13 кӏалгӏаялъур ругел киналго рагъухъабаздаги ва цогидал хутӏараздаги бичӏчӏана дида рахсал Масихӏ сабаблъун ран ругеблъи. 14 Дун жанив тӏами сабаблъун ккун, гӏемерисел иман лъуразул тавакал цӏикӏкӏинабуна Бетӏергьанас, гьединлъидал гьезги расги хӏинкъичӏого халкъалъухъе щвезабулеб буго Аллагьасул рагӏи.

15 Гьедин бугониги, цо-цояз Масихӏил хӏакъалъулъ бицунеб буго жидерго жахӏдаялъги хӏалхъублъиялъги тӏамун, цогидаз абуни, бицунеб буго лъикӏлъи бокьун. 16 Гьеле гьез Рохалил хабар тӏибитӏизабулеб буго, рокьиялъ гьесизарун ва Рохалил хабар цӏунизе тӏамурав чи дун вукӏинги лъан. 17 Дозин абуни гьеб гьабулеб буго квешал къасдазги диде бугеб жахӏдаялъги гьесизарун – гьезда ракӏалде кколеб буго туснахъалъуб дие бугеб квешлъи гьелдалъун дагьабги цӏикӏкӏинилан. 18 Биччанте! Рихьдае букӏаниги, ракӏ-ракӏалъ букӏаниги батӏалъи щиб, гьединги гьадинги Гӏисал хӏакъалъулъ хабар тӏибитӏулеб бугелъул. Дун гьелдаса вохун вуго ва вохизеги вуго.

19 Нужер гьари-дугӏаялдалъунги Гӏиса Масихӏил Рухӏалъул квербакъиялдалъунги дун хвасарлъизе вукӏин лъала дида. 20 Къезе цӏакъ бокьун гьечӏо дие, къеларилан хьулги буго. Кидаго гӏадин, хасго гьанже сункьаниги хӏинкъичӏого дица дир тӏолабго жан Масихӏ кӏодо гьавиялъе кьела – дун хваниги, чӏаго хутӏаниги. 21 Дир гӏумру Масихӏилъ буго, хвалилъги пайда буго дие! 22 Амма дун дуниялалда хутӏани, дир хӏаракатчилъиялъул хайирги буго. Лъаларо гьеб кӏиялъулго кинаб дие бокьилебали. 23 Дир ракӏ кӏибикьун буго: гьаниса вахъун, Масихӏида аскӏове инеги бокьун буго, гьеб гӏемерго лъикӏ букӏинилан ккун. 24 Амма нужее цӏакъ къваригӏун вугелъул, дуниялалда хутӏизеги кколев вуго. 25 Нужее къваригӏун вукӏиналда ракӏчӏун бугелъул, дида лъала дун нужеда киназдаго цадахъ хутӏилевлъи, нуж тӏоритӏизеги иманалъ нуж рохизаризеги. 26 Гьедин дун нужехъе тӏадвуссараб мехалъ, нужее цоги гӏилла букӏина, Гӏиса Масихӏидеги цолъун, дун сабаблъун ккун, чӏухӏизе.

Рохалил хабаралъ малъухъе хьваде!

27 Воре, Масихӏил Рохалил хабаралъ малъухъе хьваде. Дие рагӏизе бокьилаан, дун гьенив вугониги гьечӏониги, Рохалил хабаралда божиялъе гӏоло цо хӏал ккун чӏун цадахъго къеркьолел ругин нужилан. 28 Тушбабаздехун кидаго бахӏарчилъи бихьизабе. Гьеб гьезие буго хвалде иналъул гӏаламат, нужее буго тархъанлъиялъул гӏаламат. Аллагьасдасанлъидал гьеб бачӏунеб бугеб! 29 Масихӏидалъун нужехъе рещтӏун бугелъул, гьесде иман лъей гуребги, гьеб сабаблъун нужее кьезе бугеб гӏазаб-гӏакъубаги. 30 Дир гӏадинаб къеркьеялъулъ гӏахьаллъизе руго нуж. Нужеда гьеб доб мехалъ дилъ бихьана ва гьанже дилъ бугилан рагӏулебги буго.