‏

Филемонихъе гьаб кагъат хъван буго гӏага-шагарго 60-абилел соназда, Павел чапар туснахъалъув вугеб заманаялда. Филемон вукӏана Колоссиялда бугеб иман лъуразул жамагӏаталъе бетӏерлъи гьабулезул цояв. Кагъат хъваялъе гӏиллалъунги ккана Филемонида аскӏоса лъутарав гьесул лагъ Онесим Рималда Павелида дандчӏвай ва, чапарасул вагӏза-насихӏат гӏадахъ босун, гьес Гӏисаде иман лъей.

‏ Philemon

Саламалъул рагӏаби

1Масихӏ Гӏисаде иман лъеялдалъун туснахъалъув тӏамурав Павелил ва нилъер вац Тимофейил салам буго нижер хирияв кумекчи Филемониде, 2нижер яц Апфияде, нилъер ишалъул къеркьохъан Архиппиде ва дур рокъоб данделъулеб иман лъуразул агьлуялде. 3Нилъер Эмен Аллагьасул ва Тӏадегӏанав Гӏиса Масихӏил баркатги саламги лъеги нужеда.

Филемонил божи-иманги иман лъуразде гьесул рокьиги

4Аллагьасе рецц гьабун, кидаго дица мун дирго дугӏабазулъ рехсола. 5Тӏадегӏанав Гӏисаде дур божи-иманалъулги ва киналго иман лъуразде бугеб рокьиялъулги хӏакъалъулъ рагӏана дида 6Масихӏиде цолъараб гӏумруялъулъ нилъее гӏемераб лъикӏабщинаб щвана. Гьеб дуда мухӏканго бичӏчӏиялде мун нилъер божи-иман цо букӏиналъ вачагиян гьарула дица. 7Дун вохана, вац, ва цӏакъ разилъана ниж дуе рокьулел рукӏинги иман лъуразул дуца ракӏбатизабулеб букӏинги лъайдал.

Павелица Онесимил рахъалъ гьарулеб буго

8Масихӏил диналъул вац вугелъул, дуца тӏубазабизе кколеб ишалъул рахъалъ дуе амру гьабизеги ихтияр буго дир. 9Амма дие мун вокьулелъул, дица – Павелица, Масихӏ Гӏисал вакилас, тӏадежоялъеги гьанже гьесие гӏоло туснахъалъув тӏамурав чияс – дуда гьарун толеб буго. 10Дир васлъун кколев Онесимил ▼

▼Онесим – грек мацӏалда «пайда бугев чи».

рахъалъ гьарулеб буго дица дуда. Рахсаз вухь-вухьун вугеб мехалъ дун гьесул эменлъун лъугьана. 11Цебе гьесдаса дуе пайда букӏинчӏо, амма гьанже дуеги диеги пайда буго гьесдаса. 12Дица гьев тӏадвуссун духъе витӏулев вуго, гьесда хадуб дирго ракӏ бахъун унеб бугониги. 13Дун туснахъалъув вугевгӏан заманаялъ, гьев гьанив тезе бокьун букӏана Рохалил хабар тӏибитӏизабиялъул ишалъулъ, мунги хисун, гьес дие кумек гьабизе. 14Амма дур изну гьечӏого щибго гьабичӏо дица, – зулмуялдалъун гуреб, мунго разилъун, гьеб лъикӏаб иш дуца гьабизе бокьун.

15Тӏубанго тӏадвуссун духъе вачӏинелъун ватила Онесим дагьабго заманаялъ дудаса ватӏалъун вукӏарав. 16Гьанже гьев гӏадатияв лагъ гуро, лагъасдасаги гӏемерго тӏадегӏанав чи вуго, хасго дие ва дагьавги цӏакъ дуеги вокьулев вац вуго. Лагълъун вугони щиб гьев, Тӏадегӏанав Масихӏида цеве дур вац вугелъул.

17Цинги, дуца дун нужер агьлуялъул чилъун къабул гьавулев ватани, дун гӏадин къабул гьаве дуца гьевги. 18Гьес мун сундалъунниги къварид гьавун ватани, яги гьесда налъи бугеб батани, дида тӏад хъвай гьеб. 19Гьале дица – Павелица дирго квералъ хъвалеб буго: дица гьеб налъи бецӏила. Дур гӏумругицин дие налъилъун бугиланги абиларо дица. 20Мунги диналъул вац вугелъул, Тӏадегӏанасе гӏоло гьеб гьари тӏубазабе. Гьедин, Масихӏие гӏоло, дир ракӏ гӏодобе биччазабе.

21Мун дихъ гӏенеккизе вукӏиналда ракӏчӏун хъвалеб буго дица гьаб. Дида лъала дица гьараралдасаги цӏикӏкӏун дуца гьабизе букӏин. 22Гьанже, вац, цо дие чӏезе бакӏги къачӏай гьениб. Нужер гьари-дугӏа къабул гьабун, Аллагьас дун нужехъе тӏадвуссинавизеги бегьула.

Цогидазулги саламал

23Масихӏ Гӏиса сабаблъун дида цадахъ туснахъалъув вугев Эпафрасил, 24гьединго дир кумекчагӏи Маркилги, Аристархилги, Демасилги, Лукалги салам буго дуде.

25Тӏадегӏанав Масихӏ Гӏисал баркат лъеги нужер рухӏазда!