Revelation of John 10
Малаикасухъ букӏараб гьитӏинабго тӏехь
1Цинги дида вихьана цогидав цӏакъ кутакав малаик зобалаздасан рещтӏунев; накӏкӏал рукӏана гьесда тӏад жемун, ботӏрода тӏад нурги чӏун букӏана, гьумер букӏана бакъ гӏадинаб, бохдул рукӏана цӏадул хӏубал гӏадинал. 2Гьес рагьун хъатикь ккун букӏана гьитӏинабго тӏехь. Кваранаб бох гьес ралъдада лъуна, квегӏаб бох ракъдада лъуна. 3Гъалбацӏалъул гъулгъулиялда релълъараб кутакаб гьаракьалдалъун ахӏдезе лъугьана гьев. Гьев ахӏдолеб мехалда рагӏана анкьго нухалда зоб гъугъараб гӏадинаб гьаракь. 4Анкьго нухалда зоб гъугъараб гӏадинаб гьаракь рагӏидал, гьеб хъвазейилан лъугьана дун. Амма зодисан ахӏулеб рагӏана: «Анкьго нухалда зоб гъугъаялдалъун дуда бицараб жо балъго те, гьеб хъваге дуца». 5Ва ралъдадаги ракъдадаги чӏун дида вихьарав малаикас жиндирго кваранаб квер зодобехун битӏана. 6Жив абадияв-даимасул, зобалги гьениб бугебщинабги, ракьги гьениб бугебщинабги, ралъадги гьениб бугебщинабги жинца бижарасул цӏар рехсон гьев гьедана кватӏичӏого лъугӏизе бугилан. 7Анкьабилев малаикги ссуралъубе пуйзе лъугьина. Гьеб къоялъ лъугьина Аллагьас жиндирго лагъзадерида – аварагзабазда Рохалил хабар бицун лъазабун букӏараб балъгояб иш. 8Зодисан дида рагӏун букӏараб гьаракь гьанжеги дидехун кӏалъана: «Ралъдадаги ракъдадаги чӏарав малаикас рагьун хъатикь ккураб доб тӏехь босизе а», – ян. 9Малаикасда аскӏове ун, дица гьесда абуна гьеб гьитӏинаб тӏехь дихъе кьейилан. Гьес дида абуна: «Босун кванай гьеб. Дур чохьониб гьеб кьогӏлъила, амма дур кӏалдиб гьеб гьоцӏогӏанги гьуинаб букӏина» 10Малаикасда кодоса босун, кванана гьеб гьитӏинаб тӏехь. Дир кӏалдиб гьеб гьоцӏогӏанги гьуинаб букӏана, амма чохьониб гьеб кьогӏлъана. 11Цинги дида абуна: «Гӏемерал халкъазе, миллатазе, мацӏазе ва парччахӏзабазе хадубккун щиб лъугьине бугебали нахъе-нахъеги бицине ккезе буго дуца».
Copyright information for
AvaIBTNT