Rev 13 | AvaIBTNT | STEP | Дида бихьана ралъдалъа къватӏибе лъугьун бачӏунеб жанавар. Гьелъул букӏана анцӏго лълъарги анкьго бетӏерги. Гьелъул лълъурдузда тӏад букӏана анцӏго таж. Бутӏрузда хъван рукӏана Аллагьасдехун гӏасилъи бихьизабулел цӏарал.

‏ Revelation of John 13

Ралъдалъа къватӏибе лъугьун бачӏараб жанавар

1 Дида бихьана ралъдалъа къватӏибе лъугьун бачӏунеб жанавар. Гьелъул букӏана анцӏго лълъарги анкьго бетӏерги. Гьелъул лълъурдузда тӏад букӏана анцӏго таж. Бутӏрузда хъван рукӏана Аллагьасдехун гӏасилъи бихьизабулел цӏарал. 2 Гьеб дида бихьараб жанавар цӏиркъалда релълъараб букӏана; цидул гӏадинал квачӏалги рукӏана гьелъул, гъалбацӏалъул гӏадинаб кӏалги букӏана. Аздагьоялъ гьелъие кьун букӏана жиндирго къуватги, жиндирго тахги ва бокьараб гьабизе ихтиярги. 3 Жанаваралъул цо бетӏералда хвалил ругъун бугилан кколеб букӏана, амма гьеб хвалил ругъун сахлъана. Ва тӏолабго дуниял хӏайранлъун букӏана гьеб жанаваралъухъ балагьун. 4 Гӏадамаз аздагьоялъе сужда гьабулеб букӏана, гьелъ гьеб жанаваралъе хӏалкӏолъи кьедал. Жанаваралъе суждаги гьабун, гьез абулеб букӏана: «Гьаб жанаваралда релълъараб щибниги гьечӏогури ракьалда! Гьабгун вагъизе лъида кӏолеб?»

5 Аллагьасда дандечӏарал ва чӏухӏарал рагӏаби абизе кӏалги кьун букӏана гьелъие ва кӏикъоялда кӏиго моцӏалъ бокьараб гьабизе ихтиярги кьун букӏана. 6 Аллагьасул цӏарги, гьев чӏараб бакӏги ва зобалазда ругелалги инжит-хӏакъир гьарун, гӏасиял жал рицине кӏал ричӏана гьелъ. 7 Гьелъие хӏалкӏолъи кьун букӏана Аллагьасул халкъалда данде багъизе ва гьел къезаризе. Киналго наслабазда, халкъазда, мацӏазда ва миллатазда тӏад хӏалкӏолъи кьун букӏана гьелъие. 8 Хъун букӏараб Кьагӏрихъ бугеб гӏумруялъул тӏехьалда дуниял бижараб мехалдаго жидер цӏарал хъван рукӏинчӏел гӏадамалги руго гьаб ракьалда. Гьез киназго сужда гьабила жанаваралъе.

9 Гӏундул ругезда рагӏизе биччанте: 10 «Асирлъуде ккезе хъван бугев чи асирлъуде ккечӏого хутӏуларо. Хвалчаца чӏван хвезе хъван бугев чи хвалчаца чӏван хвечӏого хутӏуларо».

Аллагьасул халкъалъул сабруги божи-иманги букӏине кколеблъи бичӏчӏулеб буго гьел рагӏабаздасан.

Ракьалдаса къватӏибе лъугьун бачӏараб жанавар

11 Дида цоги жанавар бихьана ракьалдаса къватӏибе лъугьун бачӏунеб. Кьагӏрил гӏадаб кӏиго лълъар букӏана гьелъул, амма аздагьо гӏадин кӏалъалеб букӏана. 12 Доб тӏоцебесеб жанаваралда аскӏоб бугеб мехалъ, гьелъухъги букӏана долъулго гӏадаб хӏалкӏолъи; тӏолабго дуниялги дуниялалда тӏад ругелщиналги гьелъ тӏамулел рукӏана жиндир бетӏералда букӏараб хвалил ругъун сахлъараб доб тӏоцебесеб жанаваралъе сужда гьабизе. 13 Гьелъ чӏахӏиял ва хӏикматал мугӏжизатал рихьизаруна, гӏадамазда бихьун, зодисан ракьалде цӏагицин бачӏана. 14 Доб жанавар бугеб бакӏалда мугӏжизаталги рихьизарун, ракьалда ругелщинал гуккулел рукӏана. Гьелъ гьезие амру гьабулеб букӏана, хвалчадул ругъун лъуниги чӏаго хутӏараб тӏоцебесеб жанаваралъул сурат гьабеян. 15 Гьелъие хӏалкӏолъи кьун букӏана тӏоцебесеб жанаваралъул сураталда рухӏ лъезабизе, хӏатта гьелда кӏал-мацӏ бижизабизегицин. Хӏалкӏолъи кьун букӏана гьеб сураталъе сужда гьабизе бокьичӏел гӏадамал чӏвазаризеги. 16 Киналго гӏадамазул – гӏисиназулги чӏахӏиязулги, бечедазулги мискиназулги, уздензабазулги лагъзадерилги – кваранаб квералда яги надалда гӏуж лъезабуна гьелъ. 17 Жанаваралъул цӏар яги гьелъул цӏар бихьизабулеб тарих хъвараб гьеб гӏуж гьечӏесе ихтияр букӏунаро щибниги бичизе яги бичун босизе.

18 Гьеб бичӏчӏизе ккани, гӏакълу къваригӏуна. Гӏакълу бугес, хӏисаб гьабун, балагье гьеб жанаваралъул цӏар бихьизабулеб тарих, – гьеб бугелъулха инсанасул цӏаралъулги тарих. Гьелъул цӏаралъул тарих – 666.