Rev 19 | AvaIBTNT | STEP | Гьелдаса хадуб кӏудияб руккелалъул гӏадинаб гьаракьалдалъун зодисан ахӏулеб рагӏана дида: «Гьаллелуя! Нижер Аллагьасухъ буго хвасарлъиги, цӏар-реццги, къудратги,

‏ Revelation of John 19

Аллагьасе реццилан ахӏулеб рагӏана

1 Гьелдаса хадуб кӏудияб руккелалъул гӏадинаб гьаракьалдалъун зодисан ахӏулеб рагӏана дида: «Гьаллелуя! ^{▼▼«Аллагьасе рецц!» абураб магӏна буго жугьутӏ мацӏалда гьеб рагӏул.} Нижер Аллагьасухъ буго хвасарлъиги, цӏар-реццги, къудратги, 2 гьесул хӏукму ритӏухъабги хӏакъабги бугелъул. Хъахӏбалъиялдалъун гьаб ракь хъублъизабурай хъахӏбаялъе гьес судги гьабидал! Ва Аллагьасул лагъзадерил бидухъ гьелдаса къисасги босидал!» 3 Цоги нухалъ ахӏулеб рагӏана: «Гьаллелуя! Гьелъул кӏкӏуй абадул абадиялъго эхеде ине буго!» – ян.

4 Къоло ункъавго хӏакимасги ункъабго рухӏчӏаголъиялъги кӏалагъоркье речӏчӏун сужда гьабуна тахида тӏад гӏодов чӏарав Аллагьасе. Гьез абуна: «Амин! Гьаллелуя!» – ян.

5 Тах бугеб рахъалдасан цо гьаракьалъ ахӏулеб рагӏана: «Гьесул киналго лагъзадерица, гьесукьа хӏинкъулелщиназ – гӏисиназги чӏахӏиязги – рецц гьабе нилъер Аллагьасе!» – ян.

6 Кӏудияб руккелалъул гӏадинаб яги кутакаб чвахелоялъул гӏадинаб гьаракьалдалъун ахӏулеб рагӏана дида: «Гьаллелуя! Нилъер къудратав Бетӏергьан Аллагь парччахӏ вугелъул! 7 Нилъ роха-хинлъун разиго рукӏина ва гьесие рецц гьабила, Кьагӏрил бертадул къо тӏаде щун бугелъул ва гьесул бахӏарайги къачӏа-кӏатӏан йигелъул!» 8 Гвангъараб ва бацӏцӏадаб тӏеренаб дарайдул ретӏел кьун буго гьелъие. (Гьеб дарай ккола Аллагьасул халкъалъул ритӏухъал ишал.)

9 Довго малаикас дида абуна: «Хъвай: гьардарал гурелдай гьеб Кьагӏрил берталъе ахӏарал гӏадамал», – ан. Цоги гьес абуна: «Гьаб буго Аллагьасул хӏакъаб рагӏи!» – ян.

10 Гьесул хӏатӏазда цеве кӏалагъоркье речӏчӏун, гьесие сужда гьабизехъин букӏана дица. Гьес дида абуна: «Гьеб бегьуларебха! Гӏисае нугӏлъи гьабулел дур вацазулги дурги гьалмагъ вуго дун. Аллагьасе гьабе дуца сужда. Гӏисае нугӏлъи гьабиги Аллагьасул рагӏудасан бачӏараб бугебха!»

Хъахӏаб чу рекӏарав

11 Зоб рагьун бачӏун бихьана дида. Гьале хъахӏаб чу; гьелда рекӏун вуго Ритӏухъавиланги Хӏакъавиланги жинде абулев, битӏараб хӏукмуги къотӏулев, рагъдаги бергьунев чи. 12 Цӏадул мацӏал гӏадинал руго гьесул берал, гьесул ботӏрода гӏемерал тажалги руго, жиндаго гьесда гурони, лъиданиги лъалареб цӏарги хъван буго гьесул надалда. 13 Гьесда буго бидулъ ччураб ретӏел; гьесда цӏарги – Аллагьасул рагӏи. 14 Хъахӏал чуяздаги рекӏун, малаикзабазул боял рачӏунел руго гьесда хадур. Гьезда тӏад буго чӏухӏараб ва бацӏцӏадаб хъахӏаб ретӏел. 15 Гьесул кӏалдиса къватӏибе бачӏунеб рагӏиги релълъуна халкъаздаса бергьине хьвагӏулеб рекӏараб хвалченалда. Гьес гьел маххул тӏилица рехъаде рачине руго. Къудратав Аллагьасул ццидалги жазаялъулги чаналъуб чагъир гьабизе цӏибил мерхьина гьес. 16 Гьесул ратӏлидаги хьолбодаги: «Парччахӏзабазулги Парччахӏ, тӏадегӏаназулги Тӏадегӏанав», – абун цӏар хъван буго.

17 Дида вихьана бакъуда тӏад чӏарав малаик. Зоб бакьулъан роржун унел киналго хӏанчӏазде гьес ахӏана: «Аллагьасул кӏудияб кванде рачӏа киналго цадахъ: 18 парччахӏзабазулги, рагъул церехъабазулги, къо-асс бугезулги, чуязулги, гьезда рекӏаразулги, киналго уздензабазулги лагъзадерилги – гӏисиназулги чӏахӏиязулги гьан кваназе!» – ян.

19 Дида рихьана данделъун, чода рекӏарасдаги гьесул боялдаги данде рагъизе къачӏан, жанаварги, дуниялалъул парччахӏзабиги, гьезул боялги. 20 Жанавар асирлъун ккуна, гьелдаго цадахъ ккуна, гьеб жанавар бугеб бакӏалда гӏаламатал рихьизарун, жинца гӏадамал къосинарурав гьересиаварагги. Гьес къосинарулаан жанаваралъул гӏуж лъурал ва гьелъул сураталъе сужда гьабурал гӏадамал. Жанаварги гьересиаварагги чӏагого рехана цӏадулги чӏабтӏилги хӏоринире. 21 Цогидал чӏвана чода рекӏарасул кӏалдисан бачӏараб хвалчаца. Ва киналго хӏанчӏаз гӏорцӏизегӏан кванана гьезул гьан.