Rev 20 | AvaIBTNT | STEP | Дида вихьана зодисан рещтӏунев цо малаик; гьесухъ букӏана тӏину гьечӏеб кӏкӏалахъе бугеб нуцӏил кӏулги кӏудияб рахасги.

‏ Revelation of John 20

Азарго сон

1 Дида вихьана зодисан рещтӏунев цо малаик; гьесухъ букӏана тӏину гьечӏеб кӏкӏалахъе бугеб нуцӏил кӏулги кӏудияб рахасги. 2 Илбислъунги шайтӏанлъунги кколеб аздагьо – некӏсияб борохь, – кквезеги ккун, рахсида бухьана гьес, азарго соналъ гьелдаса борчӏилареб куцалъ. 3 Азарго соналъ халкъал къосинаричӏого теледухъ, нуцӏаги рахан, гьелда мугьруги чӏван, кӏкӏалахъе рехана малаикас гьеб. Цинги гьеб дагьабго заманаялъ рахсидаса бичун биччазе буго.

4 Дида рихьана тахбакӏал, гьезда тӏад гӏодор чӏун рукӏана суд гьабизе тарал гӏадамал. Гӏисал хӏакъалъулъ хабар тӏибитӏизабунилан ва Аллагьасул рагӏи тӏубазабунилан бутӏрул къотӏаразул рухӏалги рихьана. Рихьана жанаваралъе ва гьелъул сураталъе сужда гьабичӏел, жидер надалда яги кверда гӏуж лъечӏел гӏадамалги. Гьел чӏаголъун рукӏана, ва гьез Гӏисада цадахъ азарго соналъ парччахӏлъи гьабулеб букӏана. 5 Гьедин чӏаголъана тӏоцере гӏадамал. Цогидал хварал чагӏи гьеб азарго сон инегӏан чӏаголъичӏо. 6 Гьардарал гурелдай гьел тӏоцере чӏаголъаразда гъорлъе ккарал гӏадамал. Кӏиабилеб хвел гьезда хъваларо. Ва гьел лъугьина Аллагьасулги Масихӏилги кашишзабилъун, ва гьесда цадахъ азарго соналъ парччахӏлъи гьабила гьез.

Илбисалъе тамихӏ гьабула

7 Азарго сон индал, илбис туснахъалъуса къватӏибе биччала. 8 Дуниялалъул ункъабго рахъалде ун, халкъал къосинарила гьелъ, гӏажуж-мажужалъул боял данде ракӏарун, рагъде рахъинарила. Ралъдал рагӏалда салигӏанги гӏемер рукӏина гьел. 9 Тӏолабго ракь цӏун букӏана гьел бояз, ва гьез сверун ккуна иман лъуразул ордуги Аллагьасе хирияб шагьарги. Амма зодисан цӏа бачӏун рухӏана гьел. 10 Гьел къосинарураб илбис рехана цӏадулги чӏабтӏилги хӏоринибе. Гьеб хӏоринир абадул абадиялъго къасиги-къадги гӏазаб-гӏакъубаялда гьелда цадахъ рукӏина жанаварги гьересиаварагги.

Хваразе суд гьабула

11 Гьебмехалда дида бихьана цӏакъго кӏудияб хъахӏаб тах, вихьана гьелда гӏодов чӏаравги. Гьесдаса лъутун ана зобги ракьги, ва гьезие чӏезе бакӏ батичӏо. 12 Ва дида рихьана хварал чагӏи – гӏисиналги чӏахӏиялги – тахида цере чӏун. Рагьун лъун тӏахьалги рукӏана. Цоги тӏехьги букӏана рагьун – гӏумруялъул тӏехь буго гьеб. Гьел тӏахьазда хъварал ишазухъ балагьун гьабулеб букӏана хваразе суд. 13 Ралъдацаги кьуна жиндихъго рукӏарал хварал чагӏи. Хвалицаги хваразул улкаялъги кьуна жидехъго рукӏарал хварал чагӏи. Ва гьезул ишазухъ балагьун, щивав чиясе судги гьабуна. 14 Цинги хвелги хваразул улкаги цӏадул хӏоринибе рехана. Гьеб цӏадул хӏор ккола кӏиабилеб хвел. 15 Гӏумруялъул тӏехьалда цӏар хъван батичӏел чагӏи цӏадул хӏоринире рехана.