Rev 22 | AvaIBTNT | STEP | Гьес дида бихьизабуна маулхӏаяталъул лъадал гӏор. Бацӏцӏадаб цӏер гӏадаб гьеб гӏор чвахун бачӏунеб букӏана Аллагьасулги Кьагӏрилги тахида цебесан.

‏ Revelation of John 22

Маулхӏаяталъул лъадал гӏор

1 Гьес дида бихьизабуна маулхӏаяталъул лъадал гӏор. Бацӏцӏадаб цӏер гӏадаб гьеб гӏор чвахун бачӏунеб букӏана Аллагьасулги Кьагӏрилги тахида цебесан. 2 Шагьаралъул къватӏ кӏийиде бикьизабун чвахулеб букӏана гьеб. Гӏумруялъул гъотӏол – анцӏила кӏиго нухалъ жинца пихъ кьолеб ва щибаб моцӏалъ тӏад пихъги бижулеб гъотӏол гӏаркьалаби гӏунтӏун ругоан гӏурул кӏиябго рагӏалалде. Гьеб гъотӏол тӏамахги халкъазе дару буго. 3 Гьеб шагьаралда тӏокӏаб киданиги хӏарамаб жо букӏинаро. Гьениб букӏина Аллагьасулги Кьагӏрилги тах, ва жиндирго лагъзадерица гьесие хъулухъги гьабила. 4 Гьезда гьесул гьумер бихьила, ва гьезул надалдаги лъугьина гьесул цӏаралъул гӏуж. 5 Сордо гьениб тӏокӏаб киданиги букӏине гьечӏо; Бетӏергьан Аллагьас жиндирго нуралдалъун кьела гьезие канлъи, ва абадул абадиялъго парччахӏлъиги гьабила гьез.

6 Гьес дида абуна: «Гьал рагӏаби ритӏухъал ва хӏакъал руго. Илагьияб Рухӏ аварагзабазухъе рещтӏинабулев Бетӏергьан Аллагьас чапар витӏана кватӏичӏого ккезе бугебщинаб жиндирго лагъзадерида бихьизабизе».

Масихӏ хехго вачӏина

7 «Гьале кватӏичӏого тӏаде щвела!» – ян абуна Масихӏица. Гьардарав гуревдай хадубккун лъугьине бугебилан гьаб тӏехьалда хъварал рагӏаби рехун течӏев чи.

8 Дида – Иоаннида – бихьана ва рагӏана гьеб кинабго. Гьеб бихьараб ва рагӏараб мехалда дун кӏалагъоркье ккана дида гьеб бихьизабурав малаикасул хӏатӏазда цеве. Дица гьесие сужда гьабизехъин букӏана. 9 Гьес дида абуна: «Гьеб бегьуларебха! Дурги, дур вацал – аварагзабазулги, гьаб тӏехьалъул рагӏаби рехун течӏелщиназулги гьалмагъ вуго дун. Цохӏо Аллагьасе гьабе сужда».

10 Цинги гьес абуна: «Болжал тӏаде щолеб бугебин, воре, хадубккун лъугьине бугелъул хӏакъалъулъ гьаб тӏехьалда ругел рагӏаби рахчун тоге. 11 Квешав цевего гӏадин квешлъи гьабулев вукӏаян абе, хъубавги хъублъи гьабулев вукӏаян абе, ритӏухъавги ритӏухъабщинаб гьабулев вукӏаян абе ва вацӏцӏадавги цевего гӏадин бацӏцӏадабщинаб гьабулев вукӏаян абе.

12 Гьале дун кватӏичӏого тӏаде щвела. Дихъ буго щивасул ишазда рекъон кьезе шапакъат. 13 Дун вуго Алипги Яги, Тӏоцевесевги Тӏарамагъадисевги, Авалги Ахирги!

14 Гьардарал гурелдай гӏумруялъул гъотӏодаса пихъ кваназейилан ва шагьаралда жанире кавудухъан лъугьинейилан ретӏел чурун бацӏцӏад гьабурал гӏадамал. 15 Къватӏирехун руго гьабиги, сихӏручагӏиги, хъахӏбабиги, чӏвадарухъабиги, гьересиаллагьзабазе гӏибадат гьабулелщиналги, гьереси бокьулелщиналги, гьересиябщинаб жидеца гьабулелги.

16 Дица – Гӏисаца – дирго чапар витӏана нужехъе, – гьалъул хӏакъалъулъ жамагӏатазда лъазабейилан. Дун вуго Давудил кьибилги ва гьесул кьолбол васги. Дун вуго гвангъараб рогьалил цӏва».

17 Илагьияб Рухӏалъги бахӏаралъги абула: «Вачӏа!» – ян. Вачӏайилан абизе биччанте гьеб рагӏарасги. Гьекъезе бокьарав вачӏайилан абе, ва бокьанщинас маулхӏаяталъул лъим чӏобого босейилан абе.

18 Хадубккун лъугьине бугелъул хӏакъалъулъ гьаб тӏехьалда ругел рагӏабазухъ гӏенеккун ругезда лъазабун толеб буго – гьел рагӏабазда тӏаде лъицаниги щибниги жубани, гьесда тӏаде Аллагьасги журала гьаб тӏехьалда рехсарал балагьалги гӏазабалги. 19 Хадубккун лъугьине бугелъул хӏакъалъулъ гьаб тӏехьалда ругел рагӏабазда тӏаса лъицаниги щибниги босани, Аллагьас гьесда тӏасаги босила гӏумруялъул гъветӏалдаги мукъадасаб шагьаралдаги гьесул букӏараб бутӏа, – гьаб тӏехьалда жиндир хӏакъалъулъ рехсон бугеб бутӏа.

20 Гьел рагӏаби ритӏухъ гьарулев Масихӏица абулеб буго: «Битӏараб буго. Дун хехго вачӏина!» – ян.

Амин! Вачӏа, Тӏадегӏанав Гӏиса! 21 Нилъер Тӏадегӏанав Гӏиса Масихӏил баркат лъеги киназдаго! Амин!