Tit 1 | AvaIBTNT | STEP | Аллагьасул лагъ ва Гӏиса Масихӏил чапар Павелица хъвалеб буго. Тӏаса рищаразулъ божи-иман щулалъизабизе ва муъминлъиялде рачунеб хӏакъаб нух гьезда бихьизабизе витӏун вукӏана дун.

‏ Titus 1

Саламалъул рагӏаби

1 Аллагьасул лагъ ва Гӏиса Масихӏил чапар Павелица хъвалеб буго. Тӏаса рищаразулъ божи-иман щулалъизабизе ва муъминлъиялде рачунеб хӏакъаб нух гьезда бихьизабизе витӏун вукӏана дун. 2 Гьеб нухдасан ун, нилъее абадияб гӏумру насиблъиялде хьул буго. Жеги замана бижилелдего Аллагьас къотӏи гьабун букӏана нилъ абадияб гӏумруялде рачине. Аллагьасул рагӏи хвезе рес гьечӏо! 3 Нилъ хвасар гьарулев Аллагьас, жинцаго болжал цӏараб заманаялда гьебги загьир гьабун, дида гьелъул бицине тӏадкъана.

4 Божи-иманалъулъ дунгун цолъун, хӏакълъунго дие васлъун лъугьарав Тит, Эмен – Аллагьасул ва нилъ хвасар гьарурав Масихӏ Гӏисал баркатги гурхӏелги рещтӏаги дуде.

Иман лъуразул агьлуялъул бетӏер кинав вукӏине кколев?

5 Дица мун Криталда тун вуго гьениб жеги лъугӏичӏого хутӏун букӏараб иш лъикӏ гӏуцӏизе ва дица дуда лъазабун букӏараб къагӏидаялъ щибаб шагьаралда иман лъуразул агьлуялъул бетӏерги тӏамизе. 6 Гьев вукӏине ккола жинда гӏайибги чӏваларев, цохӏо гурони лъадиги ячинчӏев чи, гьесул рукӏине ккола пасалъиялъулги мутӏигӏлъунгутӏиялъулги рахъалъ кӏалухъ рахъичӏел муъминал лъимал. 7 Аллагьасул ишазул тӏалаб гьабун тарав чи вугелъул, иман лъуразул агьлуялъул бетӏер вукӏине ккола жинда гӏайиб чӏваларев, чӏухӏи-пахрулъи гьечӏев, ццин бахъунарев, гьекъезе бокьуларев, вагъизе гӏедегӏуларев ва хъантӏи гьечӏев чи. 8 Вукӏине ккола гьобол хирияв, лъикӏлъи бокьулев, тӏокӏал жал гьаруларев, ритӏухъав, Аллагьасда цеве вацӏцӏадав ва жиндаго квелъ базе кӏолев чи. 9 Жинда малъараб ва божизе бегьулеб рагӏудаса кьуризе бегьуларо гьев. Гьес насихӏат гьабизе кколелъул бацӏцӏадаб диналъул рахъалъ ва гьелда дандечӏаралги ритӏизаризе кколелъул.

Мутӏигӏлъуларезул кӏал къазе ккола

10 Гӏемер ругелъулха мутӏигӏлъуларел, чӏанда бицунел ва гӏадамал гуккулел чагӏи, хасго жугьутӏазул гӏадатал цӏунулезда гьоркьор. 11 Гьезул кӏал къазе ккола. Жидерго инжитаб хъантӏиялъ гьез тӏубарал хъизанал, малъизе бегьуларебги малъун, руссине-сверизе гьарулел ругелъул. 12 Жидерго шагӏирасги гьезул хӏакъалъулъ гьадин абун буго: «Криталъул гӏадамал – кидаго гьерсихъаби, ццидалал жанаварал, кӏвахӏалал чохьокал!» 13 Хӏакъал рагӏаби руго гьел. Гьединлъидал дуца гьезие бадибчӏвай гьабе, нужер божи-иман загӏиплъизе тогеян, 14 ягьудиязул маргьабаздаги божугеян ва хӏакъикъат мекъи сверизабулезухъги гӏенеккугеян.

15 Жалго рацӏцӏадазейин кинабгоги хӏалалаб бугеб. Амма хъубазе ва божи-иман гьечӏезе щибгоги хӏарамаб буго. Гьезул гӏакълу-пикруги яхӏ-намусги хъублъун бугелъулха. 16 Жидеда Аллагь лъалилан чӏаниги, жидерго ишаздалъун гьесдаса инкар гьабулеб буго гьез. Гьел руго нахъегӏанал, мутӏигӏлъуларел ва щибниги лъикӏлъи гьабизе жидехъа бажаруларел гӏадамал.