1Ch 15 | BxrBBL2024 | STEP | Давид өөрынгөө нэрэтэ хотодо ордонгуудые барижа, Бурханай ханзада тусхай байра бодхоогоод, тэрээндэ гэһэн майхан һүмэ түхеэрбэ.

‏ 1 Chronicles 15

Ханза Иерусалим асаралга

1 Давид өөрынгөө нэрэтэ хотодо ордонгуудые барижа, Бурханай ханзада тусхай байра бодхоогоод, тэрээндэ гэһэн майхан һүмэ түхеэрбэ. 2 Давид иигэжэ хэлэбэ:

– Левидүүдһээ бэшэ хэншье Бурханай ханза зөөхэ ёһогүй; юуб гэхэдэ, Эзэн бултан сооһоо тэдэниие шэлэжэ, Өөртэнь хэтын хэтэдэ алба хэхыень уялгалаа. 3 Давид бэлдэһэн байрадаа Эзэнэй ханза оруулхын тула бүхы израильшуудые Иерусалимда суглуулба. 4 Давид Аһарооной хүбүүдые, левидүүдые суглуулба: 5 Кэһаадай хүбүүдһээ Үриһээлые даргаар, мүн тэрэнэй аха дүүнэрые – зуун хорин хүн; 6 Мэрариин хүбүүдһээ Асайяае даргаар, мүн тэрэнэй аха дүүнэрые – хоёр зуун хорин хүн; 7 Гэршоомой хүбүүдһээ Ёһээлые даргаар, мүн тэрэнэй аха дүүнэрые – зуун гушан хүн; 8 Элицапаанай хүбүүдһээ Шэмаяае даргаар мүн тэрэнэй аха дүүнэрые – хоёр зуун хүн; 9 Хэброоной хүбүүдһээ Элиээлые даргаар, мүн тэрэнэй аха дүүнэрые – наян хүн; 10 Үззиһээлэй хүбүүдһээ Амминадаабые даргаар, мүн тэрэнэй аха дүүнэрые зуун арбан хоёр хүн.

11 Давид Цадоок, Абиатаар санаартадые, мүн Үриһээл, Асайяа, Ёһээл, Шэмаяа, Элиээл, Амминадааб гэһэн левидүүдые дуудаба. 12 Тиигээд тэрэ иигэжэ хэлэбэ:

– Левидүүдэй обогой гулбаанууд таанад! Өөһэдыгөө, өөһэдынгөө аха дүүнэрые арюудхан сэбэрлээд, минии бэлдэһэн газарта Израилиин Эзэн Бурханай ханза залан оруулха болобот. 13 Манай Эзэн Бурханай заабаринуудые дүүргээгүй байһанаймнай түлөө маниие хэһээгээл.

14 Израилиин Эзэн Бурханай ханзые үргэжэ, байрадань табихын тула левидүүд, санаартад бэеэ арюудхан сэбэрлэбэд. 15 Эзэнэй айладаһанай, Моисейн захирһанай ёһоор левидүүдэй хүбүүд Бурханай ханза ута урганууд дээрэ табяад, мүр дээрээ үргэн оруулба.

16 Левидүүдэй даргануудта өөһэдынгөө аха дүүнэрэй дундаһаа хүгжэмэй зэмсэгүүд дээрэ псалтирнууд, цитранууд, кимвалнууд дээрэ наадажа, баяр баясхалангай оршон байдал байгуулха гэһэн захиралта Давид үгэбэ. 17 Тиигээд энэ хэрэгтэ левидүүд табигдаба гэбэл: тэрэнэй аха дүүнэрһээ Ёһээлэй хүбүүн Һэмааниие, тэрэнэй аха дүүнэрһээ Бэрэхияагай хүбүүн Асаапые, харин тэдэнэй аха, дүүнэрэй Мэрариин хүбүүдһээ Кушаяагай хүбүүн Этаан; 18 мүн тэдэнэртэй хамта тэдэнэрэй хоёрдохи үеын аха, дүүнэрые үүдэнүүдэй харуулшадаар: Захарияа, Бээн, Язиһээл, Шэмирамоот, Ехиһээл, Уннии, Элиааб, Бэнайяа, Маашэяа, Маттитияа, Элипэлээһү, Микнэйяа, мүн Обээд-Эдоом, мүн Еиһээл гэгшэд табигдаа. 19 Һэмаан, Асаап, Этаан гэгшэд зэд кимвалнууд дээрэ шангаар наадаба; 20 харин Захарияа, Азиһээл, Шэмирамоот, Ехиһээл, Уннии, Элиааб, Маашэяа, Бэнайяа гэгшэд псалтирнууд дээрэ нариихан абяа гарган наадабад. 21 Эдэ бүгэдые эхилхын урда Маттитияа, Элипэлээһү, Микнэйяа, Обээд-Эдоом, Еиһээл, Азаазияа гэгшэд цитранууд дээрэ наадабад. 22 Левидүүдэй дарга Хэнаанияа хүгжэмэй багша байһан тула, мэргэжэлдээ эгээл шадамар бэрхэ байһан юм. 23 Бэрэхияа, Элканаа гэгшэд ханзын дэргэдэхи харуулшад байгаа. 24 Шэбааньяа, Ёшапаат, Нэтанээл, Амасай, Захарияа, Бэнайяа, Элиээзэр Бурханай ханзын урда бүреэнүүдые үлеэгээ, Обээд-Эдоом Ехияа хоёр ханзын дэргэдэхи харуулшад байгаа.

Давидай хотодо ханза оруулга

(2 Хаан 6:12-19)

25 Давид, Израилиин аха захатан, мянганай дарганууд Обээд-Эдоомой гэрһээ Эзэнэй хэлсээнэй ханза баяртай гаргаба. 26 Бурханай хэлсээнэй ханза үргэн ябаһан левидүүдтэ Бурхан туһалан байгаа. Тэдэ Тэрээндэ үргэл болгон, долоон тугал, долоон хурьга үргэбэ. 27 Давид маалинга хубсаһа үмдэбэ, ханза үргэжэ ябаһан левидүүд, дуушад, тэдэнэй дарга Хэнаанияа тон иимэ хубсаһатай байбад. Давид энэ хубсаһан дээрэ маалинга эфод үмдэбэ 28 Бүхы израильшууд шаг шууяа татан, эбэр бүреэ дуугарган, бүреэнүүдэй, хэнгэрэгэй хүгжэм доро, хуур, арфа дээрэ наадан, Эзэнэй хэлсээнэй ханза тэлэн абаашаха замдань дууряан ябаба.

29 Эзэнэй хэлсээнэй ханзые Давидай хотодо оруулха үедэ Саулай басаган Михаал сонходо байгаад, хатаран, баясан ябаһан Давидые харажархиба, тиигээд тэрэниие шоо үзэбэ.