‏ 1 Chronicles 16

Ханзын дэргэдэхи дуушадай уялга

(Псал 104:1-15; 95:1-13; 105:1, 47-48)

1Иигэжэ тэдэ Бурханай ханзые асаржа, Давидай зорюута тэрээндэ гэжэ бодхооһон майханай дунда залаба. Бурханда түгэс шатаалта болон амгалан тайбан байдалай үргэлнүүдые үргэбэ. 2Тэрэ түгэс шатаалта ба амгалан байдалай үргэлнүүдые үргэжэ дүүргээд, Эзэнэй нэрээр арад зониие юрөөбэ. 3Тиигээд тэрэ бүхы израильшуудта, эрэшүүл болон эхэнэрнүүдтэ нэгэ-нэгэ зүһэм хатааһан огноо жэмэсээр бариһан хилээмэ, нэгэ-нэгэ зүһэм шараһан мяха, үзэмэй нэгэ баглаа үгэбэ.

4Эзэнэй ханзын урда Израилиин Бурхан, Эзэнээ магтан алдаршуулхын, соло дуудалгын албанда левидүүдэй заримыень томилбо гэбэл: 5ахалагшаар Асаапые, тэрэнэй удаа хоёрдохииень Захарияае, Иеиэлиие, Шэмирамоодые, Ехиһээлые, Маттитияае, Элиаабые псалтирнууд ба цитранууд дээрэ, мүн Бэнайяае Обээд-Эдоомые, мүн Еиһээлые, мүн Асаапые кимвалнууд дээрэ, 6харин Бэнайяае, Яхазиһээлые, санаартадые Бурханай хэлсээнэй ханзын урда бүреэнүүдые ходо үлеэжэ байхаар томилбо.

7Тэрэ үдэр Давид Эзэндээ эгээл түрүүшын магтаал Асаапаар, мүн тэрэнэй аха, дүүнэрээр зорюулгын, дуулал үнгэргэбэ:

Давидай баяр баясхалангай дуун

8– Эзэниие магтан дуулагты, нэрыень дурдан дуудагты.
Арадуудта хэрэгүүд тушаань дуулгагты;
9Эзэн тушаа дуулагты, магтаал үргэгты,
гайхамшагта үзэгдэлнүүд тушаань зар тунхаг тараагты.
10Нангин нэрыень магтан дуулагты.
Эзэндэ эрмэлзэгшэ зоной зүрхэ сэдьхэл баясан байг лэ!
11Эзэниие болон хүсыень бэдэрэгты,
Тэрээн руу хододоо шармайгты,
12Тэрэнэй хэһэн гайхамшагта хэрэгүүдые,
бэлгэ тэмдэгүүдые,
айладхаһан шиидхэбэринүүдыень һаныт.
13Абраһаамай үри һадаһад, Тэрэнэй зарасанар,
Тэрэнэй шэлэн һунгаһан Яковай үхибүүд таанар!
14Тэрэ бол манай Эзэн Бурхан,
бүхы дэлхэйгээр зарга шүүбэри үйлэдэдэг.
15Мянгаад үеын туршада үргэлжэлэгшэ
Тэрэнэй хэлсээе һанажа ябагты.
16Энэ хадаа Абраһаамтай баталһан хэлсээниинь,
Исаагта үгэһэн тангаригынь юм.
17Тэрэниие Яковта хуули болгон,
Израильда хэтэ мүнхын хэлсээн гэжэ баталһан юм.
18«Таанадай уг залгамжалан дамжуулха зүйл
болгон Ханаһаанай газар дайда үгэхэб» –
гэжэ Тэрэ айладхаһан бэлэй.
19Тиихэдэ тэдэ тоогоор үсөөн, угаа үсөөн болон
хариин газарта ерүүл зон байгаа.
20Тэдэ үндэһэтэнһээ нүгөө үндэһэтэн руу,
элдэб хан түрэһөө нүгөөдэ руу тэнэжэ-түншэжэ ябаа.
21Тэрэ тэдэниие харшалхые хэндэшье зүбшөөгөөгүй,
тэдээн тушаа хаашуулдашье зарлиг үгөө:
22«Тоһолон шэлэһэн зондомни гар бү хүрэгты,
лүндэншэдтэмни муу юумэ бү хэгты!»
23Эзэндэ дуу дуулагты,
бүхы дэлхэй, Эзэндэ дуулагты.
Абарһан тухайнь үдэрһөө үдэртэ дуулгагты!
Тэрэнэй алдар солые үндэһэтэдэй дунда,
24Тэрэнэй гайхамшагта хэрэгүүдые
бүхы арадуудай дунда тунхаглагты!
25Юуб гэбэл, Эзэн агууехэ, угаа магтагдаха,
бүхы бурхадһаа үлүү Тэрээнһээ аймаар.
26Юуб гэбэл, бусад арадуудай бурхад – хооһон шүтээнүүд,
харин Эзэн огторгой бүтээһэн юм.
27Нэрэ хүндэ болон һүр жабхалан урдань,
хүсэ шадал ба үзэсхэлэн байдал нангин газартань оршодог.
28Арад зоной обогууд, Эзэниие магтагты,
Эзэнэй алдар соло ба хүсэ шадал магтагты!
29Эзэндэ нэрынь шанараар алдар соло дуудагты!
Үргэл асаржа, урдань ерэгты.
Гэгээн солынь үзэсхэлэн соо Эзэндэ һүгэдэн мүргэгты!
Бүхы дэлхэй, Тэрэнэй урда шэшэрэн байгты!
30«Эзэн бол Хаан!» гэжэ үндэһэтэдэй дунда хэлэгты.
Юртэмсэ нээрээ бата бэхи тогтоогдонхой, ганхахагүй.
31Огторгой баясаг, газар дэлхэй хүхиг!
32«Эзэн ударидана!» гэжэ арадуудай дунда хэлсэг!
Тэнгис далай болон досоонь байгаа бүхы юумэн нэерэг лэ!
33Тала газар болон дээрэнь байгааша бүхы юумэн баярлана,
ойн модод бултадаа баясан дуулана,
Эзэнэй урда!
Юуб гэбэл, Тэрэ заларан ерэжэ байна,
газар дэлхэйе шүүбэрилхээр заларжа байна.
34Эзэндэ магтаал үргэгты, юуб гэбэл, Тэрэ һайн,
энэрэл хайрань хэтэ мүнхэдөө!

35Дуудагты: «Абарагша Бурхамнай, маанадые абарыт,
бидэниие суглуулыт, хариин арадуудһаа зайлуулыт,
Танай нангин нэрые магтаха боломжо бидэндэ үгыт,
Танай алдар солоор бахархахамнай болтогой!»
36Израилиин Эзэн Бурхан хэтын хэтэдэ магтагдахань болтогой!

Бүхы зон «Болтогой!» гэжэ хэлээ, Эзэниие магтаа.

37Давид Эзэнэй хэлсээнэй ханзын урда Асаапые, мүн тэрэнэй аха, дүүнэрые үлөөжэ, ханзын урда хододоо, үдэр бүри алба хэхыень уялгаба. 38Обээд-Эдоомые, мүн тэрэнэй аха, дүүнэрые, бүхыдэнь жаран найман хүн Едүтүүнэй хүбүүн Обээд-Эдоомые, мүн Хосаае, үүдэнэй харуулшанаар, 39харин Гибэһооной үндэртэ оршодог Эзэнэй байрын урда Цадоок санаартаниие, тэрэнэй аха, дүүнэрые, 40Тэрэнэй Израильда захиһанай, Эзэнэй хуули соо бэшэгдэһэнэй ёһоор Эзэндэ зорюулагдаһан үглөөнэй болон үдэшын түгэс шатаалта үргэлэй шэрээ дээрэ үргэл бэелүүлхын түлөө; 41Тэрэнэй үршөөл хайра хэтын хэтэдэ оршоно гэжэ Эзэниие магтан алдаршуулхын тула Һэмаан Едүтүүн хоёр болон бусад шэлэгдэжэ, тэдээнтэй хамта байгаа. 42Һэмаан Едүтүүн хоёр бүреэнүүд, кимвалнууд болон хүгжэмэй бусадшье зэмсэгүүд дээрэ наадажа байгаа; Едүтүүнэй хүбүүдые үүдэнэй дэргэдэ табиба.

43Бүхы хүн зон гэр гэртээ харибад; Давидшье өөрынгөө гэрые үреэн адислахаяа ошобо.