‏ 1 Chronicles 17

Натаанай дэмжэлгэ

(2 Хаан 7:1-17)

1Давид өөрынгөө ордондо ажаһуужа эхилхэдээ, лүндэншэ Натаанда иигэжэ хэлэбэ:

– Эзэнэй хэлсээнэй ханзын майхан соо табяатай байхада, би хуша модоор бариһан ордондо ажаһуунаб.

2Натаан Давидта харюусаба:

– Һанаһан юумэеэ бултыень үйлэдэгты, юуб гэхэдэ, Бурхан тантай хамта байна.

Бурхан дэмжэбэгүй

3Тэрэл һүниндөө Бурханай үгэ Натаанда иигэжэ дуулдаба:

4– Ябажа, минии зараса Давидта иимэ юумэ хэлэ. Эзэн иигэжэ айладхажа байна: «Минии оршон байха үргөө барижа үгэхэ хүниинь ши мүн юм гүш?! 5Израилиин арад зониие гаргаһан сагһаа хойшо энэ болотор Би үргөө соо байгаагүйб, майхан соол оршон, нэгэ газарһаа нүгөө газар хүрэтэр ябадаг байгааб. 6Израилиин арад зонтой хаанашье ябаа хадаа Өөрынгөө арадай удамаршадта Намда Ливаанай үнэтэ сэнтэ хуша модоор үргөө баригты», – гэжэ нэгэшье дахин айладаагүйб. 7Тиимэһээ мүнөө ши Минии богоол Давидта иигэжэ хэлэ: «Түмэн Сэрэгтэ Эзэн иигэжэ айладхажа байна. Өөрынгөө арад түмэн Израилиин захирагша болгохын тула Би шамайе бэлшээриһээ, хонин һүрэг харууһалжа байхадаш абаа һэм. 8Хаанашье ябахадаш Би шамтай байжа, хамаг дайсадыешни шинии хажууһаа усадхааб. Мүнөө дэлхэйн агууехэ зондол адли шамайе агууехэ болгон, нэрыешни алдаршуулхам. 9Би Израилиин арадые ажаһууха газартай болгохоб, тэрэнэй байдал батадхахаб, өөһэдынгөө газар дээрэ амгалан ажаһууха, тэдэнэр хэзээдэшье һамаргаанда орохоёо болихо. Энээнһээ хойшо тэрэниие хашаашад дахин харшалхагүй. 10Өөрынгөө арад түмэн Израилиие хүтэлхыень шүүбэрилэгшэдые табиһан сагһаа эхилжэ, Би бүхы дайсадһааш шамайе амаруулхаб, гэр бүлыеш батажуулхаб гэжэ Би шамда дуулганаб. 11Шинии наһа баража, үбгэ эсэгэнэртэеэ хамта мүнхэ нойроор нойрсоходош, Би шинии нэгэ хүбүүе хаан шэрээдэ һуулгажа, хаан түрыень бата болгохоб. 12Тэрэ Намда ордон бодхоохо, Би тэрэнэй уг удамда хаан шэрээ хэтэ мүнхэдөө эзэлүүлхэб. 13Би тэрэнэй эсэгэ боложо, тэрэ Минии хүбүүн болохо. Минии үршөөл хайра тэрээнтэй байха. Шинии урда зонхилогшоһоо буруу хаража, шамда энэрэл үзүүлһэндэл тэрээнһээ буруу хаража байхагүйб. 14Минии арадые, Минии хан түрые зонхилхын тула Би тэрэниие хэтэдээ табихаб. Хаан шэрээдэ һууха уг удамынь хэзээдэшье таһалдахагүй!»

15Натаан эдэ бүхы үгэнүүдые болон үзэгдэлые дууһан Давидта хөөрэжэ үгэбэ.

Давидай зальбаралга

(2 Хаан 7:18-29)

16Давид хаан ошожо, Эзэнэй урда һуун, иигэжэ зальбарба:

– Эзэн Бурхамни! Би хэн аад, баһа минии гэр бүлэ юун аад, Та намайе иитэрээ үргөө гээшэбта? 17Бурхан, энэшье Танда бага шэнгеэр һанагдаал! Өөрынгөө богоолой уг удамай ерээдүй тушаа үшөө айладхаат. Минии агууехэ хүн байһандал Та намайе анхарнат, Эзэн Бурхамни! 18Би, Давид, Өөрынгөө богоолые магтаһандатнай Танда энээнһээ үлүү үшөө юу хэлэхэбиб даа? Та Өөрынгөө богоолые мэдэнэ ха юмта. 19Айладаһанаа батадхажа, Өөрынгөө һанаагаар эдэ бүгэдые хэбэт. Богоолтнай болохо намда эдэ бүхы агууехэ хэрэгүүдээ Та мэдүүлбэт. 20Эзэн, Тандал адли хэншье байхагүй. Бидэнэй шагнаһаар-мэдэһээр, Танһаа бэшэ ондоо Бурхан байхагүй! 21Танай арад түмэн Израильдал адли үшөө ямар үндэһэтэн газар дээрэ байнаб? Та, Бурхан, Израилиие абаржа, Өөрын арад түмэн болгоод, Өөрынгөө нэрэ алдаршуулаа бэлэйт. Египедһээ гаргажа, ондоо арадуудһаа сүлөөлэн, арад түмэнэйнгөө түлөө Та агууехэ, һүрдэмөөр үйлэ хэрэгүүдые хээ бэлэйт. 22Израилиин арад зониие хэтэ мүнхэдөө Өөрын арад түмэн болгобот. Эзэн, Та тэдэнэй Бурхан болобот.

23Нам тухай болон минии уг удам тухай айладаһан үгэнүүдээ мүнөө хэтэдээ бэелүүлыт, Эзэн! Үгүүлһэнээ баталыт! 24Нэрэтнай хэтэ мүнхэдөө бата, агууехэ боложо, «Түмэн Сэрэгтэ Эзэн болбол Израилиин Бурхан» – гэжэ хэлэгдэхэнь болтогой! Минии, Давидай, уг удамһаа Танай энэрэл хайра бү һалаг лэ! 25Бурхамни! Юундэ Танда зальбархаяа зүрхэлөөбиб гэхэдэ, Та эдэ бүгэдые намда, Өөрынгөө богоолдо, мэдүүлээт, уг удамыемни хаан шэрээдэ хододоо байха гээд айладхаа бэлэйт. 26Эзэн, Та болбол Бурхан. Иимэ һайн юумэ намда, богоолдоо, дуулгабат. 27Танай богоол болохо минии уг удамые юрөөгыт, Танай үршөөл хайра тэрээнтэй хэтэ мүнхэдөө байг лэ! Эзэн, Танай юрөөлөөр минии уг удам хэтэ мүнхэдөө юрөөлтэй байхань болтогой!