1Ch 18 | BxrBBL2024 | STEP | Тэрэнэй удаа Давид пилиштүүдые илажа, номгоруулба. Тэрэ Гаат хотые тойроод байгаа һууринуудтайнь тэдээнһээ буляан абаба.

‏ 1 Chronicles 18

Давид дайсадаа илаба

(2 Хаан 8:1-18; 20:23-26)

1 Тэрэнэй удаа Давид пилиштүүдые илажа, номгоруулба. Тэрэ Гаат хотые тойроод байгаа һууринуудтайнь тэдээнһээ буляан абаба. 2 Давид моһаабуудые бута сохибо. Иигэжэ моһаабууд Давидай засаг мэдэржэ, ясаг түлэдэг болобо.

3 Цобаагай хаан Һадаад-Ээзэр Евфрат мүрэнэй нюруугаар өөрынгөө засаг түрые батадхаяа ошожо ябаа. Давид тэрэниие Хамаат хүрэтэр бута сохибо. 4 Давид нэгэ мянга дайшалхы тэргэ, долоон мянган морин сэрэг, хорин мянган ябаган сэрэг олзолон абаба. Тэргын моридойнь шүрбэһые тэрэ отолбо, харин зуун тэргэдэ хүрэхөөр моридые мэндэ үлөөгөө һэн. 5 Цобаагай хаан Һадаад-Ээзэртэ туһалхаяа Дамааскын араамшуудай ерэхэдэнь, Давид хорин хоёр мянгыень алаба. 6 Тиигээд Дамааскын араамшуудые зонхилхо өөрын сэрэг дээрэнь табиба, араамшууд богоолынь боложо, ясаг түлэдэг болоо һэн. Давидай ябаһан газар бүхэндэнь Эзэн туһалжа байгаа. 7 Һадаад-Ээзэрэй зоной алтан номо һаадагуудые Давид буляан абажа, Иерусалим руу асарба. 8 Һадаад-Ээзэрэй хотонууд болохо Тибхаат болон Күүнһээ Давид угаа ехэ гуулин түмэр мүн лэ дээрмэдэн абаа һэн. Соломоон тэрээгээр гуулин далай, баханануудые, элдэб амһартануудые дархалан бүтээлгээ бэлэй. 9 Цобаагай хаан Һадаад-Ээзэрэй хамаг сэрэгые Давидай бута сохиһон тухай Хамаадай хаан Тооһу гэгшэ дуулаад, 10 тэрэниие мэндэшэлхын, һайе хүргэхын тула Һадораам хүбүүгээ эльгээбэ. Ушарынь хадаа Һадаад-Ээзэр Тооһутай ходо дайлалдажа байгаа бшуу. Һадораам ерэхэдээ, алтан, мүнгэн, гуулин эд зүйлнүүдые асарба. 11 Давид хаан диилэгшэ бүхы уласуудһаа абаһан алта, мүнгэнтэй хамта тэрээнииеньшье Эзэндэ зорюулба. Тэдэ ямар уласуудһааб бэ гэхэдэ, эдоом, моһааб, аммоон, пилишт, амалээг.

12 Цэруяагай хүбүүн Абишай Дабһата хүндыдэ арба найман мянган эдоомуудые хюдаба. 13 Тэрэ Эдоомдо өөрын сэрэг ноёдые һуурижуулба. Эдоомшууд бултадаа Давидай богоолнууд болобо. Давидай ябаһан газар бүхэндэнь Эзэн туһалан байгаа.

Давидай дүтын туһамаршад

14 Иигэжэ Давид бүхы Израилиин хаан түрэ барижа, арад түмэнөө зүб шударгыгаар зонхилжо байгаа. 15 Цэруяа эхэтэй Ёһааб сэрэгэй дарга, Ахилүүдэй хүбүүн Ёшапаат түүхэ бэшээшэ, 16 Ахитуубай хүбүүн Цадоок болон Абиатаарай хүбүүн Абимээлэх санаартад, Шавшаа бэшээшэ, 17 Ёядаагай хүбүүн Бэнайяа Давидай бэе аршалагша хэрээдүүдэй ба пэлидүүдэй ноён һэн. Давидай хүбүүд хаанай туһамаршад байгаа.