1 Chronicles 19
Аммоонууд ба араамшуудые илан даралта
(2 Хаан 10:1-19)
1Нэгэ хэды сагай үнгэрһэнэй удаа аммоонуудай хаан Наһааш наһа бараба. Тэрэнэй орондо хүбүүниинь хаан шэрээдэ һууба ха. 2Тиихэдэнь Давид: «Эсэгынь намда үршөөл хайра үзүүлһэндэл би Наһаашай хүбүүн Хануунда тиимэ хайра үзүүлхэ юм байна», – гэжэ хэлээд, эсэгэ тухайнь шаналһанаа элирхэйлхэеэ өөрынгөө элшэнэрые тэрээндэ эльгээбэ. Шаналалаа мэдүүлхэеэ Давидай зарасанарай аммоонуудай газар руу ерэхэдэнь, 3аммоонуудай ноёд Хануунда иигэжэ хэлэбэ: – Давид танда шаналалаа мэдүүлхэеэ зониие эльгээхэдээ, эсэгытнай хүндэлһэндөө эльгээгээ гэжэ һанаа гүт? Үгы даа, энэ хотые тагнан хаража һандаргаахаяа Давид тан руу зоноо эльгээгээ. 4Тиихэдэнь Хануун Давидай зониие барижа, хюһаад, хубсаһыень ташаа хүрэтэрынь шуулажа таһалаад, һөөргэнь табиба ха. 5Тэдэнэй аян замдаа ябажа байхада, энэ ушар тушаа Давид дуулажа, тэдэ зонойнгоо урдаһаа хүнүүдые эльгээн, һахалайнгаа ургатар Ерихоондо байхыень, тиигээд һүүлдэнь бусахыень захиба. Ушар юуб гэхэдэ, тэдэ зон угаа доромжологдоод байгаа шуу. 6– 7Аммоонууд Давидай дайсад болоһоноо ойлгожо, Хануун болон аммоонууд Араам-Наһарааимһаа, Араам-Маһахааһаа ба Цобааһаа дайшалхы тэргэнүүдые сэрэгтэйнь хүлһэлэн асархаа нэгэ мянган талаант мүнгэ эльгээбэ. Тэдэ гушан хоёр мянган дайшалхы тэргэ сэрэгтэйнь, Маһахаа хааниие сэрэгтэйнь хүлһэлэн абаба. Тэдэнь ерэжэ, хотон хүреэнээр жагсан, Мэдэбаагай шадар зогсобод. Аммоонууд мүн өөһэдын хотонуудһаа сэрэг суглуулаад, дайнда бэлдэбэ. 8Давид энээниие дуулаад, Ёһаабые эгээл эрэлхэг сэрэгтэйнь хамта урдаһаань эльгээбэ ха. 9Аммоонууд гаража ерээд, өөрынгөө гол хото Раббаагай бартаануудай дэргэдэ байлдаанай жагсаалаар зогсобо. Туһалхаа ерэгшэ хаашуул амяараа талада тогтобо. 10Хоёр газарта тулалдаха хэрэгтэйе Ёһааб хараад, Израилиин бүхы шэлдэг эрэшүүлые шэлэн, араамшуудай урдаһаа табиба. 11Харин үлэһэн зоноо аммоонуудай урда жагсаахые тэрэ өөрын дүү Абишай гэгшэдэ даалгаба. 12Ёһааб иигэжэ хэлэбэ: – Хэрбээ араамшуудай намһаа үлүү хүсэтэй байгаа һаань, ши намда туһалхаш. Харин аммоонуудай шамһаа хүсэтэй байгаа хадань, би шамда туһалхаяа ерэхэб. 13Зоригтой бай! Арад түмэнэйнгөө түлөө, Бурханайнгаа хотонуудай түлөө эрэлхэг шангаар зогсоё. Эзэн хэхэ юумэеэ үйлэдэхэнь болтогой! 14Иигэжэ Ёһаабай болон тэрээнтэй хамта байһан сэрэг араамшуудтай тулалдаба, араамшууд зугадаба. 15Аммоонууд араамшуудай зугадахые хараад, өөһэдөө Абишайһаа зугадажа, хото руугаа оробо ха. Тиигээд Ёһааб аммоонуудта дайсахаяа болижо, Иерусалим руу ерэбэ. 16Араамшууд Израильда диилдэһэнээ хараад, хүнүүдые эльгээн, Евфрат мүрэнэй саада эрьедэ байһан араамшуудые асаруулба. Һадаад-Ээзэрэй сэрэгэй жанжин Шопаах тэдэние ударидан ябаа. 17Энээн тушаа Давидта мэдээжэ боложо, тэрэ бүхы Израилиие суглуулан, Иорданиие гаталба. Тэрэ араамшууд руу ерээд, сэрэгээ татаба. Давид араамшуудай урдаһаа сэрэгэй жагсаалаар зогсожо, байлдаан болобо. 18Араамшууд израильшуудһаа тэрьедэбэ. Давид тэдэнэй долоо мянган дайшалхы тэргэтэ сэрэг, дүшэн мянган ябаган сэрэг хюдажа, тэдэнэй сэрэгэй жанжин Шопаахые алаба. 19Һадаад-Ээзэрэй мэдэлдэ байгаа албатан Израильда илагдаһанаа ойлгожо, Давидай эрхэдэ орожо, энхэ тайбан ажаһууха тухай хэлсээ баталба. Араамшууд энээнһээ хойшо аммоонуудта туһалхаяа болёо һэн.
Copyright information for
BxrBBL2024