‏ 1 Chronicles 23

Левидүүд

1Давид үндэр наһатай болоод, ажаһуудалай утые гаталжа садахадаа, өөрынгөө хүбүүн Соломоониие Израилиин хаанаар табиба. 2Израилиин бүхы тайжануудые, санаартадые, левидүүдые суглуулба; 3гушан наһанһаа дээшэ левидүүд тоологдобо; тэдэнэй энэ тоо гушан найман мянган хүн болобо. 4Тэдэнһээ Эзэнэй гэртэ алба хэхээр томилогдоошод – хорин дүрбэн мянган, хинадаг дарганар болон зарга шүүгшэд – зургаан мянган, 5мүн харуулшад дүрбэн мянган, хүгжэмэй элдэб зэмсэгүүд дээрэ Эзэниие магтан дуулагшад – дүрбэн мянган, 6Давид тэдэниие Левиин Гэршооной, Кэһаадай, Мэрариин бүлэгүүд болгон таһалба.

7Гэршоонһоо Лаадан ба Шимэй. 8Лааданай хүбүүд: ахань Ехиһээл, Зэтаам, Ёһээл гурбан; 9Шимэйн хүбүүд: Шэломоот, Хазиһээл, Һараан гурбан. Тэдэнэр Лааданай обогой гулбаанууд. 10Шимэйн үшөө хүбүүд: Яахат, Зинаа, Еһүүш ба Бэрияа. Шимэйн хүбүүд дүрбэн: 11Яахат ахань, хоёрдохинь Зинаа, Еһүүш Бэрияа хоёр үсөөн хүбүүдтэй тула эсэгынгээ гэртэ тэдэнэр нэгэ тоодо ороо. 12Кэһаадай хүбүүд: Амраам, Ицһаар, Хэброон, Үззиһээл дүрбэн.

13Амраамай хүбүүд: Аһароон ба Моисей. Аһароон хамагай нангин бүтээлнүүдтэ зорюулагдан абтаа, тэрэ, мүн тэрэнэй хүбүүд хэтэдээ Эзэнэй шарайн урда алба бэелүүлхэ, Тэрэнэй нэрэһээ үреэлдэ хүртөөхэ, Тэрээндэ алба хэхэ уялгатай. 14Харин Моисей Бурханай хүн, тэрэнэй хүбүүд левиин обогто оруулагданхай. 15Моисейн хүбүүд: Гэршоом ба Элиээзэр. 16Гэршоомой ехэ хүбүүн Шэбүһээл. 17Элиээзэрэй хүбүүн – Рэхабияа. Элиээзэр ондоо хүбүүгүй байгаа. Харин Рэхабияа олон хүбүүдтэй байһан. 18Ицһаарай ехэ хүбүүн Шэломоот. 19Хэброоной хүбүүд: Ерияа, хоёрдохинь Амарияа, гурбадахинь Яхазиһээл, дүрбэдэхинь Екамэһаам. 20Үззиһээлэй хүбүүд: ехэнь Михаа, хоёрдохинь Ишшияа. 21Мэрариин хүбүүд: Маһлии ба Мушии. Маһлиин хүбүүд: Эльазаар ба Кииш. 22Эльазаар наһа бараа, тэрэ хүбүүгүй, харин басагадтай байгаа; тэдэнэй дүү Киишэй хүбүүд тэдэниие өөртөө абаа. 23Мушиигай хүбүүд: Маһлии, Эдээр, Ерэмоот гурбан.

Левидүүдэй уялганууд

24Левиин эдэ хүбүүд гэрнүүдээрээ, эсэгэнэрэйнгээ отогуудай гулбаануудаар бүхыдөө тоологдоод, хорин наһанһаа, мүн тэрэнһээ дээшэ наһатай хүнүүдые Эзэнэй гэртэ алба хэхээр ябуулдаг һэн. 25Давидай хэлэһэнэй ёһоор:

– Израилиин Эзэн, Бурхан өөрынгөө арадта амгалан байдал үршөөжэ, тэрэниие Иерусалимда хэтын хэтэдэ түбхинүүлээ, 26левидүүд майхан һүмэ, мүн эдээндэ хабаатай хэрэгсэлнүүдые үргэлхэ ёһогүй байһан.

27Давидай һүүлшын заабариин ёһоор, Левидүүд хорин наһатайһаа, мүн тэрэнһээ дээшэ наһатай хүнүүд бүридхэлдэ абтаа, 28Эзэндэ алба хэхын тула Аһарооной хүбүүдэй хажууда байжа, Бурханай гэрэй дэргэдэ элдэб алба бэелүүлхын, мүргэлэй нангин Һүмэ, хашаа, мүн тэрээндэ хабаатай элдэб барилганууд соохи ариг сэбэрые сахиха, 29хилээмэнэй үргэлэй шэниисын гурилай, дурадхалай хилээмэнэй, эһээбэригүй, болгоһон, шараһан хилээмэнэй хэмжүүрнүүдые, шэгнүүрые сахин адаглаха, 30Эзэндээ үглөө, үдэшэ бүри баяр хүргэжэ, алдар соло дуулалгые заншалта болгон хинаха, 31дүримүүдэй гуримаар Эзэнэй урда хододоо бэелүүлэгдэдэг гарагай долооной, шэнэ һарын эхинэй, тоогой ёһоор һайндэрнүүдтэ Эзэндэ зорюулагдаһан түгэс шатаалта бүхы үргэлнүүдые бэелүүлхэ, 32Эзэнэй гэртэ алба хэхэдээ, өөһэдынгөө аха, дүүнэрые, Аһарооной хүбүүдые, майхан һүмэ, харууһалха уялгануудынь эдэ мүн.