‏ 1 Chronicles 27

Сэрэгэй дарганарай тушаалта хүнүүдэй уялганууд

1Жэлэй алишье үедэ, һара бүри Израилиин хүбүүдэй отогуудай гулбаанууд, мянганай, зуунай дарганар, бэшэшье тушаалтад хаандаа элдэб олон албануудта хүдэлмэрилдэг байһан. Тэдэнэй таһаг бүридэ хорин дүрбэн мянган хүн хүдэлмэрилдэг һэн. 2Забдиһээлэй хүбүүн Яшобаам нэгэдэхи һарын нэгэдэхи таһагай дарга байгаа; тэрэнэй таһагта хорин дүрбэн мянган хүн. 3Тэрэ Пээрэцэй хүбүүдэй нэгэн, нэгэдэхи һарада сэрэгэй бүхы даргануудай ахамадынь байһан. 4Хоёрдохи һарын бүлэгэй дарга Ахоох нютагай Додай байба; тэрэнэй таһагта Миклоот тайжа байгаа, бүлэгтэнь хорин дүрбэн мянган. 5Гурбадахи һарын гурбадахи сэрэгэй ахмад дарга санаартан Ёядаагай хүбүүн Бэнайяа, тэрэнэй бүлэгтэ хорин дүрбэн мянган: 6Бэнайяа хадаа суута гушан эрэлхэг баатарнуудай нэгэн, тэдэнэй дарга, тэрэнэй таһагта Аммизабаад хүбүүниинь алба хэһэн. 7Дүрбэдэхи һарын дүрбэдэхинь Ёһаабай дүү Асаһээл, удаань тэрэнэй хүбүүн Зэбаадьяа, таһагтань хорин дүрбэн мянган. 8Табадахи һарын табадахинь Израахия нютагай Шамһуут тайжа, бүлэгтэнь хорин дүрбэн мянган. 9Зургаадахи һарын зургаадахинь Тэкооһа нютагай Иккээшэй хүбүүн Ираа, тэрэнэй бүлэгтэ хорин дүрбэн мянган. 10Долоодохи һарын долоодохинь Эпрааимай хүбүүдһээ Пэлоон нютагай Хээлэц, бүлэгтэнь хорин дүрбэн мянган. 11Наймадахи һарын наймадахинь Зээрах обогой Хушаа нютагай Сиббэхай, тэрэнэй таһагта хорин дүрбэн мянган. 12Юһэдэхи һарын юһэдэхинь Бэньямиинэй хүбүүдһээ Анатоот нютагай Абиээзэр, тэрэнэй бүлэгтэ хорин дүрбэн мянган. 13Арбадахи һарын арбадахинь Зээрах обогой Нэтопаа хотын Маһарай, тэрэнэй таһагта хорин дүрбэн мянган. 14Арбан нэгэдэхи һарын арбан нэгэдэхинь Эпрааимай хүбүүдһээ Пиратоон нютагай Бэнайяа, таһагтань хорин дүрбэн мянган. 15Арбан хоёрдохи һарада арбан хоёрдохинь Отниһээл обогой Нэтопаа нютагай Хэлдай, тэрэнэй таһагта хорин дүрбэн мянган хүн тоологдодог һэн.

Израилиин отогуудай удамаршад

16Израилиин отогуудай ноёд: Рэүбээнэй ахамад дарга Зихриигэй хүбүүн Элиээзэр, Симеоной – Маһахаагай хүбүүн Шэпаатияа, 17Левиин – Кэмүһээлэй хүбүүн Хашаабияа, Аһарооной – Цадоок, 18Иудын – Давидай аха, дүүнэрэй Элиааб; Иссахаарай – Михаээлэй хүбүүн Омрии; 19Зэбүлүүнэй – Обадияагай хүбүүн Ишмаайя; Напталиигай – Азриһээлэй хүбүүн Еримоот; 20Эпрааимай – Азаазияагай хүбүүн Һошээ; Мэнашшээгэй хахад үеын – Пэдаяагай хүбүүн Ёһээл; 21Галаадтахи Мэнашшээгэй хахад үеын – Захарияагай хүбүүн Иддоо; Бэньямиинэй – Абнээрэй хүбүүн Яасиһээл; 22Даанай – Ероһаамай хүбүүн Азарээл. Израилиин отогуудай толгойлогшонор эдэ мүн. 23Давид хори хүрөөгүйшүүлые бүридхэлдэ абаагүй, юундэб гэхэдэ, Эзэн тэрээндэ иигэжэ хэлээ: «Би Израилиие тэнгэриин одод мэтэ олон болгохоб». 24Цэруяагай хүбүүн Ёһааб тооложо эхилһэн аад, тиигээд дүүргээгүй. Энэ хэрэгэйнь түлөө Бурхан Израильда ехээр сухалдаа. Давидай угай бэшэгтэ тоо бүридхэлдэ тиигээд оруулагдаагүй юм.

Хаанай түшэмэлнүүд

25Адиһээлэй хүбүүн Азмаавэт хаанай баялигуудые харууһалдаг байһан; харин Уззияагай хүбүүн Ёнатаан хотонууд болон тосхонуудтахи, тусхай түхеэрэлгэнүүд соохи таряаланһаа абтаһан ургасануудай нөөсэнүүдые харууһалдаг; 26Хэлүүбэй хүбүүн Эзрии таряалан дээрэхи хүдэлмэринүүдые, газарай ажал харадаг; 27Рамаа нютагай Шимэй үзэмэй модоной ургаса, харин Шапаам нютагай Забдии үзэмэй дараһан архиин нөөсэнүүдые; 28голнуудта ургадаг тоһото модоной ургасануудые Гээдэрэ нютагай Бааһал-Ханаан; харин тоһоной нөөсэнүүдые Ёһааш; 29Шароондо бэлшэдэг эбэртэ бодо малай түлөө энэ нютагай Шитрай; харин Шитрай голой мал – Адлайн Шапаат; 30тэмээнүүдые – Ишмаһээл нютагай Обиил; элжэгэнүүдые – Мэроноот нютагай Эхдэяа; 31жэжэ малнуудые – Һагаар нютагай Язииз. Эдэ бултадаа Давид хаанай газар нютагуудай дарганууд мүн.

Давидай зүблэгшэд

32Давидай абга Ёнатаан ехэ сэсэн хүн бэшээшэнь, зүбшэлэгшэнь байгаа; Хахмониигай Ехиһээл хаанай хүбүүдэй дэргэдэ; 33хаанай зүбшэлэгшэ Ахитоопэл; хаанай дүтынь нүхэр Архэй нютагай Хушай; 34Ахитоопэлэй һүүлээр Бэнайяагай хүбүүн Ёядаа, Абиатаар; харин Ёһааб хаанай сэрэгэй ехэ дарга байгаа.