1Ch 28 | BxrBBL2024 | STEP | Давид Иерусалимда Израилиин бүхы тайжануудые, обог үенүүдэй гулбаануудые, хаанда алба хэдэг таһагуудай даргануудые, мянганай, зуунай даргануудые, нютагуудай ноёдые, адууһа малнуудай түлөө харюусагшадые, һамгадайнгаа харуулшадые, сэрэгэй даргануудые, эрэлхэг бүхы эрэшүүлые суглуулба.

‏ 1 Chronicles 28

Давидай гэрээд үгэ

1 Давид Иерусалимда Израилиин бүхы тайжануудые, обог үенүүдэй гулбаануудые, хаанда алба хэдэг таһагуудай даргануудые, мянганай, зуунай даргануудые, нютагуудай ноёдые, адууһа малнуудай түлөө харюусагшадые, һамгадайнгаа харуулшадые, сэрэгэй даргануудые, эрэлхэг бүхы эрэшүүлые суглуулба. 2 Давид тэдэнэй урда хүл дээрээ бодоод, сугларагшадта иигэжэ хэлэбэ:

– Минии аха, дүүнэр, мүн минии арад түмэн, намайе шагнагты! Эзэнэй хэлсээнэй ханза хадаглаха гэр бодхоохо хүсэлөө зүрхэндөө хадуун абажа ябааб. Бурханда хэрэгтэй энэ барилгые бэелүүлгэдэ хамагые түгэс бэлдээб. 3 Зүгөөр Бурхан намда иигэжэ дуулгаа һэн: «Ши намда зорюулагдаһан гэр бү бодхоо, юуб гэхэдэ, ши дайшалхы замтай, ехээр шуһа адхаһан хүн байнаш». 4 Зүгөөр Эзэн, Израилиин Бурхан минии эсэгын гэр сооһоо Израилиин хан шэрээ эзэлхээр намайе шэлээл, юуб гэхэдэ, Тэрэ Иудые тайжаар һунгаа, харин минии эсэгын хүбүүд сооһоо намайе шэлэжэ, бүхы Израилиин хаанаар үршөөн табяал; 5 Эзэн намда олон хүбүүдые үршөөн үгөөл, зүгөөр минии бүхы хүбүүд сооһоо Тэрэ минии хүбүүн Соломоониие Эзэнэй Израилиин хан шэрээдэ шэлэн һуулгаал. 6 Тиигээд намда иигэжэ хэлээл: «Намда хэрэгтэйе бүтээн бариха, юундэб гэхэдэ, Би тэрэниие Өөрынгөө хүбүүн болгон шэлээб, Би тэрээндэ Эсэгэнь болохоб; 7 хэрбэеэ тэрэ Минии захяануудые, Минии заабаринуудые дүүргэн, хатуу зоригтой энэ үдэр шэнгеэр ябаа һаань, тэрэнэй хан түрые хэтэдэнь баталхаб». 8 Харин мүнөө бүхы израильшуудай Эзэнэй суглаанай урда өөрынгөө Бурханда хандан иигэжэ захинаб: таанад энэ газарые эзэлэн, өөһэдынгөө Бурханай, Эзэнэй бүхы захяануудые наринаар бэелүүлжэ ябагты. 9 Ши, минии хүбүүн, Соломоон, өөрынгөө эсэгын Бурханиие мэдэрэ, үнэн зүрхэнһөө, хамаг сэдьхэлһээ Тэрээндээ алба хэжэ яба, Эзэн сэдьхэлыш, һанаан бодолыень мэдэжэ байха. Хэрбэеэ Тэрэниие бэдэрээ һааш, Тэрэниие олохош; харин Тэрэнээ мартабалшни, Тэрэ шамайе хэтын хэтэдэ орхихо. 10 Мэдэжэ яба, Эзэн нангин гэр барилгаар шамайе шэлээ, хүсэлөө зоримгойгоор бэелүүлэ.

11 Давид өөрынгөө хүбүүн Соломоондо баруун үүдэнэй, тэрэнэй гэрэй, юумэ хадагалдаг газарай, тэрэнэй таһалгын, тэрэнэй досоо таһалгануудай ханзын гэрэй түхэл зурагуудые үгэбэ, 12 тэрэ сэдьхэлдээ наринаар абажа ябаһанаа хэлэжэ, бүхы таһалгануудай, Эзэнэй гэрэй хорёогой түхэл зурагуудые Бурханай гэрэй баялигууд, тэрээндэ зорюулагдаһан үнэтэ зүйлнүүд, 13 Эзэнэй гэртэхи элдэб амһартануудай болон нангин ябуулгануудта хэрэгтэй амһартануудай, левидүүдэй таһалгануудай түхэл зурагууд, 14 элдэб тахилда хэрэглэгдэхэ амһартануудай хэмжүүрэй тамгатай алтан, мүн иимэ амһартануудта мүнгэлгэбэ. 15 Дэнгүүдэй алта үгэбэ, тэрэнэй тус бүхэниинь шэгнүүрэй тамгатай байха ёһотой, мүн тэрэ дэнгүүдэй тус бүхэниинь ямар тахилда яагаад хэрэглэгдэхэ ёһотойб гээд заагданхай, мүнгэн амһартанууд шэгнүүрэй тамгатай байха ёһотой; 16 мүн дурасхалай хилээмэнэй алтан шэрээ бүхэндэ алта, мүнгэн шэрээ бүхэндэ мүнгэ; 17 һэрээнүүдтэ, аягануудта, сүршэдэг түхеэрэлгэнүүдтэ сэбэр (сула) алта үгэбэ. Алтан, мүнгэн табагууд хэмжүүрэй тамгатай байха ёһотой, 18 хэмжүүрэй тамгатай үргэлэй уталгын амһарта сэбэр алтан, хүрдэ дээрэ херүүбүүдэй далинуудаар Эзэнэй хэлсээнэй ханза хушаха, энэнь сэбэр алтан байха. 19 «Тэрэ эдэ бүхы барилгануудые бүтээлгэдэ намда заабари үгөө, эдэ заабаринууд Эзэнһээ», – гэжэ Давид хэлэбэ. 20 Давид Соломоондоо иигэжэ хэлэбэ:

– Эрэлхэг зоримгой шанга яба, юунһээшье бү ай, зүрхэ бү алда, юуб гэхэдэ, Эзэн Бурхан, Минии Бурхан хододоо шамтай байха, Эзэнэй гэрэй бүхы заабаринуудыень дүүргээд байбалшни, Тэрэ шамһаа холо болохогүй, шамайе хэзээдэш орхихогүй, 21 Бурханай гэртэхи элдэб албангуудые бэелүүлхэ левидүүдэй болон санаартадай таһалганууд эдэ мүн. Шинии бүхы захиралтануудые дүүргэхээр бэлэн арад түмэн, мүн хамаг уран ямаршье ажалнуудые дүүргэхэ уран дархашуул шамда түгэс бии.