1Ch 10 | BxrBBL2024 | STEP | Пилиштүүд Израильтай дайлалдан, Израилиин зон пилиштүүдһээ тэрьедэжэ, Гилбооһа уулада алдалан унаба.

‏ 1 Chronicles 10

Саулай эсэсэй үдэрнүүд, наһа баралга

(1 Хаан 31:1-13)

1 Пилиштүүд Израильтай дайлалдан, Израилиин зон пилиштүүдһээ тэрьедэжэ, Гилбооһа уулада алдалан унаба. 2 Пилиштүүд Саулые болон тэрэнэй хүбүүдые хүсэжэ, Саулай Ёнатаан, Абинадааб, Малхишууһа хүбүүдые алаба.

3 Саулые тойроод ехэ байлдаан бужаганажа, һурша ном харбагшад тэрэниие харбажа, хүндөөр шархатуулба. 4 Тиихэдээ Саул өөрынь зэр зэбсэгые үргэгшэдэ:

– Ши һэлмэеэ һугалаад, намайе хадхажа ала. Бэлгэеэ отолуулаагүй эдэ хүнүүд ерэжэ, бэеымни доромжолхол, – гэбэ.

Теэд зэр зэбсэгынь үргэгшэ ехэ айжа, тэрэ захиралтыень дүүргэжэ шадабагүй. Саул һэлмэ абажа, дээрэнь унашаба. 5 Зэбсэг баригшань Саулай үхэһые үзөөд, өөрынгөө һэлмэ дээрэ унажа үхэбэ. 6 Иигэжэ Саул гурбан хүбүүдтэеэ, бүхы зарасанартаяа хамта гээгдэбэ. 7 Нюруу газарта байһан Израилиин бүхы зон сэрэгэй тэрьедэһэн, Саулай болон хүбүүдэйнь үхэһые мэдээд, хотонуудаа орхижо, зугадаба. Пилиштүүд ерэжэ, тэндэ байрлаа бэлэй.

8 Үглөөдэрынь пилиштүүд алагдаһан зониие тонохоёо ерэхэдээ, үхэһэн Саулай болон тэрэнэй гурбан хүбүүдэй бэенүүдые Гилбооһа уула дээрэ олобо. 9 Тэдэ Саулай толгой отолжо, хуяг, дуулгыень тайлан абажа, зэбсэгыень абажа, өөһэдынгөө шүтээнүүдтэ, арад зондо мэдээ дуулгахаяа элшэнэрые Пилиштын бүхы нютагуудаар эльгээбэ. 10 Саулай сэрэгэй зэбсэгые тэдэ өөһэдын бурхадай һүмэ соо табижа, толгойень Дагооной һүмэ соо үлгэбэ.

11 Ябээш-Галаадай ажаһуугшад пилиштүүдэй Саулда юу хэһые дуулаад, 12 бүхы сэрэгшэдынь ошожо, Саулай болон тэрэнэй хүбүүдэй бэенүүдые абажа, Ябээштэ асарба. Тиигээд яһыень Ябээшдэхи сарса модон доро хүдөөлүүлбэ. Тэдэ долоон хоног масаглаа һэн.

13 Эзэндэ үнэн сэхэ байгаагүй, Эзэнэй үгэ дуулаагүй, үхэһэн зоной һүнэһэ дуудагшада хандаһанайнгаа түлөө Саул иигэжэ наһа бараба. 14 Эзэниие тэрэ хүндэлөөгүй. Эзэн тэрэниие хороожо, Ишайн хүбүүн Давидта хан түрэ дамжуулба.