‏ 1 Chronicles 11

Давидай бүхы Израилиие толгойлон хүтэлбэрилгэ

(2 Хаан 5:1-3, 6-10; 23:8-39)

1Удаань бүхы израильшууд Хэброон руу, Давидта сугларан ерээд хэлэбэ:

– Бидэ танай мяха шуһанай таһардаһан бэлэйлди. 2Урид Саулай манай хааншье байха үедэ та Израилиин арад зониие байлдаануудта ударидажа ябаат. Тиигээд Өөрынь арад түмэн болохо Израилиие танай ударидаха, удамаршан болохо тухай Эзэн Бурхантнай танда найдуулан айладхаһан бэлэйл.

3Иигэжэ Израилиин бүхы аха захатан Хэброон руу хаанда ерэжэ, Давид хаан тэндэ Эзэнэй урда тэдэнтэй хэлсээ баталба. Тиигээд тэдэ Давидые Израилиин хаан болгон, тоһо түрхин ёһолбо. Иигэжэ Самуилаар дамжуулан Эзэнэй найдуулһаниинь бэелбэ.

Давид Иерусалимые эзэлнэ

(2 Хаан 5:6-10)

4Давид болон бүхы израильшууд Иерусалим гэхэ гү, али Евүүстэ ошоо. 5Тэндэ ажаһуугша евүүсүүд Давидта иигэжэ хэлэбэ:

– Ши иишээ орожо шадахагүйш.

Гэбэшье Давид Сионой хэрэм эзэлэн абаба. Энэнь Давидай хото болобо. 6Тиигээд Давид иигэжэ хэлэбэ:

– Евүүсүүдтэ түрүүлэн орогшо хүн толгойлогшонь, сэрэгэй дарга болохо.

Хэнһээшье түрүүн Цэруяагай хүбүүн Ёһааб байжа, толгойлогшонь болобо.

7Иигэжэ Давид тэрэ хэрэмдэ байрлажа, тиимэһээ тэрэ Давидай хото гэжэ нэрлэгдээ бэлэй. 8Бүхы хотые, Миллооһоо эхилээд саашань, Давид шэнэ хэрэм ханаар хүреэлбэ. Ёһааб хотын нүгөө талые үргэлжэлүүлбэ. 9Түмэн Сэрэгтэ Эзэнэй өөртэйнь хамта байһан ушарһаа Давид улам хүсэтэй боложол байгаа.

Давидай эрхим сэрэгшэд

10Эзэнэй айладаһанай ёһоор, Давидай сэрэгэй ноёд ударидалгынь үедэ тэрэниие дэмжэжэ, хаан шэрээ эзэлхэдэнь бүхы израильшуудтай хамта тэрээндэ туһалба. 11Давидай алдар суута сэрэгшэдэй нэрэнүүд гэбэл, иимэ: гурбан мэдээжэ эрэшүүл сооһоо эгээл суутайнь Хахмониигай хүбүүн Яшобаам. Тэрэ гурбан зуун хүн тээшэ жадаа үргэжэ, нэгэ удаа бултыень һалгаагаа. 12Тэрэнэй удаа Ахоохой аша, Додоогой хүбүүн Эльазаар. Тэрэ хадаа гурбан сэрэгшэдэй нэгэн болоно. 13Нэгэтэ тэдэнэй Пас-Даммиимда Давидтай хамта байхада, пилиштүүд тулалдахаяа сугларһан байгаа бэлэй. Тэндэ ешмээн таряатай һэн. Сэрэг пилиштүүдһээ зугадаба. 14Тиихэдэнь тэдэ гурбан сэрэгшэ таряалангай дунда зогсон, талмайе хамгаалжа, пилиштүүдые алаа. Иигэжэ Эзэн агууехэ илалта үршөөгөө бэлэй.

15Пилиштүүдэй бүлэг сэрэг Рэпаиимэй хүндыдэ хотон хүреэнээр тогтоод байха үедэ гушан удамаршын гурбаниинь Адуллаамай агын хажуудахи хабсагай руу Давидта ерээ һэн. 16Давид тиихэдэ хэрэм соо, харин пилиштүүдэй бүлэг Бэтлэһээмдэ байгаа. 17Давид ундаа ехээр хүрөөд хэлэбэ:

– Бэтлэһээмэй гол үүдэнэй дэргэдэхи худагһаа хэн уһа асаржа уулгахаб?

18Тэдэ гурбан сэрэгшэ пилиштүүдэй хотон хүреэ нэбтэ гаража, Бэтлэһээмэй хаалгын дэргэдэхи худагһаа уһа удхажа, Давидта асараа бэлэй. Гэбэшье Давид уунгүй, Эзэндэ адхажа үргэбэ. 19Тиигээд тэрэ иигэжэ хэлэбэ:

– Эзэн, намайе хамгаалыт, би энээниие уужа шадахагүйб. Ами наһандаа аюултайгаар ябажа ерэһэн зоной шуһые ууха гэһэнтэй жэшээтэй бэшэ гү?

Эдэ гурбан алдар суутай сэрэгшэд энэ мэтын хэрэгүүдые хэдэг бэлэй.

20Цэруяагай хүбүүн, Ёһаабай дүү Абишай тэдэ гурбанай толгойлогшо байгаа. Тэрэ жадаар гурбан зуун хүниие алажа, тэдэ гурбантай хамта сууда гараһан гээшэ. 21Тэрэ гушанһаа эгээл алдартайнь байгаа, тиигээд тэдэнэй ноён болоо. Гэбэшье сэрэгэй гурбан жанжинай тоодо ороогүй.

22Кабцээлэй хүн, Ёядаагай хүбүүн Бэнайяа эрэлхэг зоригтой хүн бэлэй. Тэрэ олон баатарлиг үйлэ хэрэгүүдые хээ, Моһаабай арсалан мэтэ хүсэтэй хоёр сэрэгшые алаа. Мүн саһатай нэгэ үдэр уһа суглуулдаг нүхэн руу орожо, тэндэ арсалангые алаһан юм. 23Тэрэ баһа табан тохой үндэртэй, Египедэй нэгэ абарга эрые хюдаа бэлэй. Тэрэ египет хүн гартаа томо гэгшын жадатай байгаа. Харин Бэнайяа һаба модотой ерэжэ, египет хүнэй гарһаа жадыень буляан абаад, тэрэ жадаарнь өөрыень алаа һэн. 24Ёядаагай хүбүүн Бэнайяа гэгшэ иимэрхүү баатаршалгануудые хэдэг бэлэй. Тэдэ гурбантай хамта тэрэ ехэ сууда гараа. 25Гушан зоной дунда тэрэ суурхабашье, тэдэ гурбан жанжинай тоодо ороогүй. Давид тэрэниие өөрын бэе хамгаалагшадай толгойлогшо болгоо һэн.

26Тэдэ баатарнуудай дунда хэд байгааб гэбэл: Ёһаабай дүү Асаһээл; Бэтлэһээмһээ Додоогой хүбүүн Элханаан; 27Һароорһоо Шаммоот; Пэлоонһоо Хээлэц; 28Тэкооһаһаа Иккээшэй хүбүүн Ираа; Анатоодһоо Абиээзэр; 29Хушааһаа Сиббэхай; Ахоохһоо Илай; 30Нэтопааһаа Маһарай; Нэтопааһаа Баһанаагай хүбүүн Хээлэд; 31Бэньямиинэй Гибаагай Рибай гэгшын хүбүүн Иттай; Пиратоонһоо Бэнайяа; 32Нахалээ-Гааһашһаа Хурай; Арабааһаа Абиһээл; 33Бахаруумһаа Азмаавэт; Шаһалбоонһоо Эльахбаа; 34Гизооной Һашээмэй хүбүүд, Һараарһаа Шагээгэй хүбүүн Ёнатаан; 35Һараарһаа Сахаарай хүбүүн Ахиһаам; Үүрэй хүбүүн Элипаал; 36Махэраа нютагай Хээпэр; Пэлоон хотын Ахияа; 37Кармээлһээ Хэцроо; Эзбайн хүбүүн Наһарай; 38Натаанай аха Ёһээл; Һагриин хүбүүн Мибһаар; 39Аммоонһоо Цээлэг, Бээроот нютагай, Цэруяагай хүбүүн Ёһаабай дайнай зэбсэг үргэгшэ Нахрай; 40Итраа нютагай Ираа ба Гарээб; 41Урияа гэдэг хээт хүн; Ахлайн хүбүүн Забаад; 42Шизаагай хүбүүн Адинаа Рэүбээнэй обогой, обогойнгоо удамарша, тэрээнтэй хамта гушан хүн; 43Маһахаагай хүбүүн Ханаһаан; Митаан хотын Ёшапаат; 44Аштэраат нютагай Узияа; Ароһээр нютагай Хотаамай хүбүүд Шамаа ба Еиһээл; 45Шимриин хүбүүн Едиаһээл, тэрэнэй дүү, Тициин Ёхаа; 46Маһаабай Элиээл ба Элнаамай хүбүүд Ерибай, Ёшаабия; Моһаабай Итмаа; 47Элиээл, Обээд, Мэцобаагай Яасиһээл гэгшэд болоно.