‏ 1 Chronicles 21

Арад зоной тоо бүридхэл

(2 Хаан 24:1-25)

1Шолмос Израильда добтолжо, Израилиин улад зоной тоо бүридхэхыень Давидые баадхаба. 2Иигэжэ хаан Ёһаабта болон зоной бусад ударидагшадта захирба:

– Даанһаа Бэһээр-Шээбэ хүрэтэр Израилиин бүхы обогуудаар ябажа, зоной тоо бүридхэгты. Би тэдэнэй хэды байһые мэдэхэеэ һананаб.

3– Эзэн Израилиин арад зониие зуу дахин олошоруулхань болтогой! Эзэн хаамни, тэдэ бултадаа танай үнэн сэхэ албатан лэ, юундэ энээниие хэхэеэ һананабта? Израиль зэмэтэй болохол, – гэжэ Ёһааб асууба ха. 4Зүгөөр хаанай үгэ хуули болобо, Ёһааб бүхы Израиляар дууһан ябаад, Иерусалимаа бусажа ерэбэ.

5Тиигээд Ёһааб уласай хүн зониие тоолон бүридхэһэн данса хаанда үгэбэ. Дайн дажарта ябажа шадаха нэгэ сая зуун мянган эрэшүүл Израильда, дүрбэн зуун далан мянган хүн Иудада байба. 6Левидүүд, Бэньямиинэй үри һадаһад Ёһаабаар тоологдоогүй, Ёһааб хаанай захиралтые һайшаагаагүй шуу.

7Бурхан энэ хэрэгыень зүбшөөбэгүй. Тэрэ энэ ушараар Израилиие хэһээхэ гэжэ шиидэбэ. 8Давид Бурханда иигэжэ хандаба:

– Би энэ юумэ хэжэ, ехэ нүгэл үйлэдэбэб. Өөрынгөө зарасын зэмые хүлисыт гэжэ гуйнаб. Би ухаагүй юумэ хээб.

9Эзэн Давидай мэдэлшэн Гаадта иигэжэ дуулга гэбэ: 10Давидта ошоод иигэжэ хэлэ:

– Эзэн иигэжэ дамжуулна: «Би шамда гурбан хэһээлтэ дурадханам; ши тэдэнэй нэгыень шэлэхэш, тиигээд тэрэниие шамда эльгээхэб».

11– 12Гаад Давид руу ошожо, асууба:

– Эзэн иигэжэ айладана: Юу шэлэхэбши? Гурбан жэл үлэсхэлэн хооһон байдал тохёолдог гү? Үгы һаа, дайсадтнай таниие мүрдэн мүшхэжэ, та тэдэнэй һэлмэһээ гурбан һарын туршада тэрьедэн байха гүт? Үгышье һаа, Израилиин бүхы нютагаар Эзэнэй Эльгээмэл Эзэнэй һэлмэ далайжа, орон нютагтатнай гурбан үдэрэй туршада тахал үбшэн дэлгэрхэнь гү? Энээн тушаа бодоод, намайе эльгээһэн Бурханда минии ямар харюу бусаахые хэлээрэйгты.

13Давид Гаадта харюусаба:

– Ехэ гай тодхорто би орооб. Би зонһоо хэһээлтэ амасахаяа һананагүйб. Эзэнэй үршөөл хайра агууехэ, тиимэһээ Тэрэ Өөрөө маанадта хэһээлтэ шэлэг лэ даа.

14Тиигэжэ Эзэн Израильда тахал үбшэн тараажа, далан мянган зон наһа бараба. 15Бурхан Эльгээмэлээ Иерусалимые һандаргаха даабаритай эльгээбэ. Тэрэ Эльгээмэлэй хотые усадхажа эхилхэдэ, Эзэн гай гасалан тушаа шаналан, зониие һалгаажа байһан Эльгээмэлдэ:

– Хүрөө! Боли! – гэжэ захирба.

Эзэнэй Эльгээмэл тэрэ үедэ евүүс хүн Арнаанай гүмнөө дээрэ байгаа. 16Давидай нюдөө нээн харахадань, газар тэнгэри хоёрой хоорондо Иерусалим руу һэлмэ далайһан Эзэнэй Эльгээмэлые хараба; гашуудалай хубсаһа үмдэһэн Давид болон тэрэнэй аха захатан һүгэдэн мүргэбэд. 17Давид Эзэндэ зальбарба:

– Арад зониие тоолохо тухай захиралта би үгөөб! Нүгэл үйлэдэн, буруу зүйл хэһэн хүн бил гээшэб. Харин эдэ зон хонид мэтэ, ямар муу юумэ хээ юм? Та намайе болон минии гэр бүлые хэһээгыт. Харин арад түмэнөө тахал үбшөөр бү һалгыт.

Давид үргэлэй шэрээ бодхооно

(2 Хаан 24:18-25)

18Эзэнэй Эльгээмэл Давидта дуулгахыень Гаадта иигэжэ захирба: «Ябажа, евүүс хүн Арнаанай гүмнөө дээрэ Эзэндэ зорюулжа, үргэлэй шэрээ бодхоогты». 19Давид Эзэнэй захиралта дүүргэжэ, Гаадай хэлэһээр тиишээ ошобо. 20Арнаан таряа хадажа байтараа эрьежэ харахадаа, Элшые обёорбо. Арнаанай дүрбэн хүбүүдынь хоргодошобо. 21Давид Арнаанда ерэбэ. Арнаан Давидые хаража, гаража ерээд, газар хүрэтэр хаанда мүргэбэ. 22Давид Арнаанда иигэжэ хэлэбэ:

– Гүмнөөгөө намда худалдыш. Зонһоо гай гасалан һалгаахын тула шинии гүмнөө дээрэ Эзэндэ үргэлэй шэрээ бодхоохо һанаатайб. Дүүрэн үнэ сэнгээрнь намда худалда.

23Арнаан Давидта иигэжэ харюусаба:

– Миинтээр абыт. Эзэн минии хаан, һанаһаараа юумэ хэгты. Харагты, эндэ түгэс шатаалта үргэлдэ хэрэгтэй эбэртэ бодо мал байна. Таряа үйрүүлдэг хабтанууд бии, талхан үргэлдэ таряан бии. Эдэ бүхы юумэ би танда баринаб.

24– 25Харин Давид хаан Арнаанда иигэжэ хэлэбэ:

– Үгы, би заабол үнэ сэнгээрнь шамһаа худалдажа абахаб. Юуб гэхэдэ, би үныень түлөөгүй зүйлөөр Эзэн Бурхандаа түгэс шатаалта үргэл үргэхэгүйб.

Тиигээд Давид энэ газарые зургаан зуун шээкэл мүнгөөр худалдан абаба. 26Иигээд Давид тэндэ Эзэндэ үргэлэй шэрээ барижа, түгэс шатаалта болон амгалан байдалай түлөө үргэлнүүдые үргэбэ. Тэрэ Эзэндэ зальбарба, Эзэн энэ гуйлтыень дуулаад, түгэс шатаалта үргэлэй шэрээдэ огторгойһоо гал эльгээбэ. 27Эзэн Эльгээмэлдэ иигэжэ захирба: «Һэлмэеэ доошонь таби».

28Евүүс Арнаанай гумнөө дээрэ Эзэн өөртэнь харюу үгэбэ гэжэ Давид мэдээд, тэндэ үргэлнүүдээ бэелүүлбэ. 29Моисейн сүл губида байхадаа хүүлэһэн Эзэнэй майхан һүмэ, түгэс шатаалта үргэлэй шэрээ Гибэһооной үндэртэ тэрэ үедэ байгаа. Эзэнэй Эльгээмэлэй һэлмэһээ һүрдэһэн Давид Бурханда мүргэхын тула тиишээ ошохо аргагүй бэлэй.30