‏ 1 Chronicles 29

Баян бардамай уряа

1Давид хаан бүхы сугларааша зондо иигэжэ хэлэбэ:

– Бурханай шэлэһэн минии хүбүүн үшөөл залуу, хүсэ багатай, харин бэелүүлхэ хэрэгынь агууехэ, энэ гэр хүндэ зорюулагдаһан бэшэ, харин Эзэн Бурханда. 2Би бүхы наһаараа Бурханай гэртэ хэрэгтэй алтанай зүйлнүүдтэ хүрэхэ алта, мүнгэнэй зүйлнүүдтэ хэрэгтэй мүнгэ, хүсэд хүрэхэ зэд, түмэр, олон зүйлэй модо, оникс (хюмһан) шулуу, шэмэглэлэй элдэб янзын олон үнгын, үнэтэ шулуунуудые, хэмжүүргүй ехээр улаан шулуу (гранит); 3мүн эдэ бүгэдэһөө гадуур өөрынгөө Бурханай нангин гэртэ зорюулан, минии мэдэлдэ байһан алта, мүнгэнэй, мүн бусадшье баялигуудые зорюулан үргэнэб: 4гэрэй ханануудые шэмэглэхэ гурбан мянган талаант алта, Опиирой алта, долоон мянган талаант сэбэр мүнгэн, 5алташа, мүнгэшэ дархашуулай бүтээхэ элдэб янзын бүтээлнүүдтэ, дархашуулда түлэхэ мүнгэн гээд шэглүүлэгдэхэ. Эзэндээ зорюулан, хэн мүнөө эдэ бүгэдые үргэл болгон үргэхэб?

6Израилиин обог, үенүүдэй эсэгэнэрэй дарганууд, мянганай, зуунай дарганууд, хаанай мэдэлэй газарнуудай дарганууд үргэл үргэбэд. 7Бурханай гэртэ хэрэгтэй табан мянган талаант, арбан мянган драахма алта, арбан мянган талаант мүнгэ, арбан найман мянган талаант зэд, зуун мянган талаант түмэр үргэл болгон үргэбэд. 8Үнэтэ шулуутай хүнүүд Эзэнэй гэрэй баялиг болгон, Гэршоон нютагай Ехиһээлэй мэдэлдэ дамжуулбад. 9Тэдэнэй оролдолго хэшээлдэ арад түмэн урмашан баясабад, юуб гэхэдэ, тэдэнэр үнэн сэдьхэлһээ Эзэндээ үргөө бшуу, мүн Давид хааншье соёрхон баясаба.

Давидай мүргэл

10Давид хаан суглаанай урда Эзэнээ юрөөн алдаршуулба, тиигээд Давид иигэжэ хэлэбэ:

– Хэтын хэтэдэхи маанадай эсэгэ Израилиин Эзэн Бурхан, Та үреэл магтаалда хүртэн байхат! 11Танай Эсэгэ, мүн тэнгэри, газар дээрэхи алдар суу, алдар хүсэн, алдар соло, эдэ бүхыдөө Танайл: Минии Бурхан Хамагые эзэмдэгшэ мэтэ бултанһаа эрхимынь Та гээшэт, хан түрэ, Бурхан, Танайл. 12Баялиг, алдар соло Танһаал, Та хамагые Эзэмдэгшэт, Танай гарта агуу хүсэн, хамагые батадханат, хамагые алдаршуулнат, засаг түрэшье Танайл. 13Бидэ мүнөө өөрынгөө Бурхан Тандаа соло дууданабди, Танайнгаа алдар нэрые магтанабди. 14Юрэдөө би хэнбиб, минии арад хэн бэ, ушараа ойлгоһон дээрэһээ үргэл үргэнэ бэшэ гүбди? Эдэ бүхы Танһаал, Танай гарһаа абаһанаа Тандаал үргэл болгон үргэнэлди, 15юундэб гэхэдэ, бидэ Танай урда юрын аяншадбди, мүн манай эсэгэнэр айлшад байгаал, газар дээрэхи үдэрнүүд һүүдэр мэтэл, юуншье мүнхэ бэшэл. 16Манай Эсэгэ Бурхан! Гэр барилгада бэлдэһэн эдэ бүхыгөө Танай нангин нэрэдэ зорюулан, Танһаа хүртэлгэ, эдэ бүхыдөө Танһаал. 17Минии Бурхан мэдэнэб, Та үнэн зүрхэнһөө дурланат, сэдьхэлһээ туршанат; би сэбэр сэдьхэлһээ эдэ бүхые үргэнэб, минии хараһаар Танай арад Тандаа баясан, үргэл үргөөл. 18Манай эсэгэнэрэй, Абраһаамай, Исаагай, Израилиин Эсэгэ Бурхан. Өөрынгөө арадай зүрхэ сэдьхэл, ухаан бодолой мэдэрэлые хэтын хэтэдэ үршөөн байгыт, тэдэнэй зүрхэ сэдьхэлые өөртөө шэглүүлэн ябыт. 19Гэр бодхоохо талаар минии бэлдэһые сүм дэмжыт, Танай дүримүүдые, Танай захяануудые бэелүүлхынь тула минии хүбүүн Соломоондо хүсэ зориг заяагыт.

20Давид өөрынгөө суглаанда иигэжэ хэлэбэ:

– Өөһэдынгөө Эзэн Бурханиие үреэн магтагты.

Өөһэдынгөө эсэгэнэрэй Эзэн Бурханиие суглаан үреэн ёһолбод. Бурхандаа, хаандаа һүгэдэн мүргэбэд. 21Үглөөдэрынь Эзэнһээ үргэлнүүдые, Эзэндээ түгэс шатаалта үргэл үргэбэд, эдэниие бэелүүлгэдэ бүхы Израилиин үмэнэһөө мянган тугал, мянган түлэгэ, мянган хурьга зальбаран үргэбэд. 22Тэрэ үдэр Эзэнэй урда урма баяртайгаар эдеэлбэ, ундалбад; үглөөдэрынь Давидай хүбүүн Соломоониие хан шэрээдэ залан һуулгабад, Эзэнэй урда тэрэниие зонхилогшоор томилон тоһоор түрхибэ, ахамад санаартанаар Цадоогые һунгабад.

Соломоониие хан шэрээдэ һуулгалга

23Соломооной өөһэдынгөө эсэгэ Давидай орондо хаан болон, Эзэнэй хан шэрээдэ һуухадань, бүхы Израиль урма баяр түрүүлэн, мэдэлээ мэдүүлбэд. 24Ороной бүхы дарганууд болон хүсэ ехэтэн, Давид хаанай бүхы хүбүүд Соломоон хаанай мэдэлдэ оробод. 25Эзэн Соломоониие бүхы Израилиин урда дээрэ үргэн алдаршуулба, энээнһээ урда Израилиин нэгэшье хаан иимэ үндэр хайрада хүртөөгүй юм.

Давидай наһа баралга

(3 Хаан 2:10-12)

26Ишайн хүбүүн Давид бүхы Израилиин хан түрэ эзэлһэн түүхэтэй. 27Тэрэ дүшэн жэлэй туршада Израилиин хаан байгаа: долоон жэл соо Хэброондо, гушан гурбан жэл – Иерусалимда. 28Үндэр наһа наһалаа, баян ажабайдал, үнэр дэлгэр, алдар соло ехэтэй байһан; тэдэнэй орондо Соломоон хүбүүниинь хан түрэ эзэлбэ.

29Давид хаанай түрүүшын болон һүүлэй үеын ажал ябуулгые лүндэншэн Самуилай дэбтэр соо бэшэгдэнхэй. Лүндэншэ Натаанай, үзэлшэ Гаадай тэмдэглэлнүүд соо, 30хамаг ажал ябуулгань, тэрэнэй хан түрэ, тэрэнэй эрэлхэг зориг, элдэб ушаралта ябадалнууд, тэрэнэй болон Израилиин үйлэ хэрэгүүд, газар дэлхэйн хан түрэнүүд тэрээн соо бэшэгдэнхэй.