‏ 1 Corinthians 1

Павелай амаршалга

1– 2Коринф хотын һүзэглэгшэдэй бүлгэм, Иисүүс Христоостой нэгэдэн Бурханда зорюулагдаһан зон, Бурханай хүнүүд болохоор дуудуулагдаһан зон, манай Эзэн Иисүүс Христоосто, тэдэнэй болон манай Эзэндэ газар бүхэндэ зальбарагша бүгэдэ зон, Бурханай эрхэ мэдэлээр Христоос Иисүүсэй элшэн болохоор дуудуулагдаһан Павел, мүн һүзэглэгшэ Сосфен таанадта бэшэнэ. 3Манай Эсэгэ Бурхан ба Эзэн Иисүүс Христоос таанадта хайраяа болон амгалан тайбаниие үршөөг лэ!

4Та бүхэнэй түлөө, Христоос Иисүүсээр дамжуулан таанадта үгтэһэн абьяас бэлигүүдэй түлөө би Бурханда үргэлжэ баяр баясхалан хүргэдэгби. 5Христоостой нэгэдэхэдээ, таанад алишье талаһаа баяжабат, зондо Бурханай мэдээсэл дуулгахадаашье, тэрэниие ойлгоходоошье эрхим һайн болобот. 6Тиигэжэ Христоос тухай гэршэлһэнэймнай үнэн зүб байһаниинь таанадта баталагдаба. 7Тиимэһээ манай Эзэн Иисүүс Христоосой ерэхые хүлеэхэ үедээ таанад ямаршье абьяас бэлигээр дуталданагүйт. 8Манай Эзэн Иисүүс Христоосой ерэхэ үдэр ямаршье гэмгүй байхынтнай тула Тэрэ таанадые һүүл хүрэтэрнь батадхажа байхал. 9Өөрынгөө Хүбүүтэй, манай Эзэн Иисүүс Христоостой харилсахаар таанадые дуудаһан Бурхан найдабаритай юм.

Һүзэглэгшэдэй бүлгэмэй хубааралга

10Аха дүүнэр, хоорондоо хубааралдажа байхагүйн тула һаналаа нэгэдүүлжэ байгты, нэгэ һанал бодолтой, нэгэ зорилготой байгты гэжэ Манай Эзэн Иисүүс Христоосой нэрэ түрөөр та бүхэндэ гуйн ханданаб. 11Юундэ тиигэжэ хэлэнэбиб гэхэдэ, та аха дүүнэрэй хоорондо арсалдаан гарана гэжэ намда Хлоягай гэр бүлынхид дуулгаа. 12Таанад бэе бэедээ иигэнэт: нэгэ заримантнай «Бидэ Павелые даханабди», нүгөөдэтнай «Бидэ Аполлосые даханабди», үшөө нүгөөдэтнай «Бидэ Пётрые даханабди», заримантнай «Бидэ Христоосые даханабди» гэлдэнэ. 13Тиихэдээ Христоос хубаараа гү? Тиихэдээ Павел таанадай түлөө хэрээһэн дээрэ саазалуулагдаа гү? Али Павелай нэрэ алдараар таанад уһаар арюудхагдаа гүт?

14Криисп Гай хоёрһоо ондоо бэшэ хэнииетнайшье уһаар арюудхаагүй байһандаа би Бурханда баяр хүргэнэб. 15Минии нэрэ алдараар уһаар арюудхагдааб гэжэ нэгэнтнайшье хэлэхэ аргагүй. 16Ай, мартааб, үшөө Стефанай гэр бүлые уһаар арюудхаа һэм. Үшөө хэниие уһаар арюудхаһанаа мүнөө һананагүйб. 17Христоос намайе уһаар арюудхахын тула эльгээгээ бэшэ, харин сэсэрхэһэн уран үгэнүүдые хэрэглэнгүйгөөр Һайн Мэдээсэл номнохыемни эльгээгээ. Хэрбээ сэсэрхэһэн уран үгэнүүдые хэрэглэбэлни, Христоосой үхэл удхагүй дэмы болохо һэн.

Христоос болбол Бурханай һүр хүсэ, эрхэ засаг мүн

18Христоосой хэрээһэн дээрэ үхэһэн тухай мэдээсэл хосорогшодто ямаршье удхагүй тэнэг юм, харин абарагдажа байһан бидэндэ тэрэ мэдээсэл Бурханай һүр хүсэн болоно. 19Нангин Бэшэг соо: «Сэсэн мэргэшүүлэй ухаан һүнөөхэб, ухаатай зоной ухаан бодолыень буруушаахаб», – гэжэ хэлэгдэнэ. 20Тиимэһээ сэсэн мэргэн зон хаанаб? Али эрдэмтэйшүүл хаанаб? Али энэ дэлхэйн уран арсалдагшад хаанаб? Энэ дэлхэйн сэсэн мэргэнэй тэнэг байһыень Бурхан харуулаа бэшэ аал?

21Энэ дэлхэйн зоной өөһэдынгөө ухаагаар Бурханиие мэдэрхын аргагүй байхыень Бурхан Өөрөө оюун ухаагаараа заяагаа, тиигээд «тэнэг» гэгдэдэг мэдээсэлээр һүзэглэгшэ зониие абарха гэжэ шиидээ. 22Хэрбээ иудейнүүд гайхамшагта үйлэ хэрэгүүдээр юумэнүүдэй баталагдахые хүлеэдэг байбалнь, бусад арадууд сэсэн мэргэнээр юумэнүүдэй баталагдахые хүлеэдэг юм. 23Харин бидэ саазалуулагдаһан Христоос тухай, еврейнүүдэй дурые гутаадаг, бусад арадуудта, ямаршье удхагүй байдаг мэдээсэлые номнонобди. 24Харин еврейнүүдэйшье, бусад арадуудайшье дундаһаа Бурханай дуудаһан хүнүүдтэ энэ мэдээсэл – Бурханай һүр хүсэн, Бурханай оюун ухаан болохо Христоос гээшэ. 25Бурханай тэнэг гэжэ һанагдадаг юумэнь хүнүүдэй ухаанһаа сэсэн юм, Бурханай бирагүй һула гэжэ һанагдадаг юумэнь хүнүүдэй хүсэ шадалһаа хүсэтэй юм.

Бурхан яажа шэлэжэ абадаг бэ?

26Аха дүүнэр, Бурханай таанадые дуудахада таанад ямар байһанаа һаныт: хүнүүдэй хэмжээгээр харабал, үсөөнтнайл сэсэн ухаантай, хэдыхэнтнайл һүр хүсэтэй, хэдыхэнтнайл дээгүүр уг изагууртай байгаа. 27Тиимэһээ Бурхан энэ дэлхэйн сэсэн мэргэниие номгоруулхын тула ямаршье удхагүй гэжэ тоологдодог юумэнүүдые шэлэжэ абаа, энэ дэлхэйн һүр хүсые сарахын тула хүнүүдэй дундаһаа ахир һула гэжэ тоологдодогуудыень шэлэжэ абаа. 28Бурхан энэ дэлхэй дээрэ шухала гэжэ тоологдодог юумые болюулхын тула хүнүүдэй дундаһаа ямаршье уг изагуургүй, дарлагдаһануудыень шэлэжэ абаа. 29Эдэ бүхэн Бурханай урда нэгэшье хүн һайрхахагүй гэһэн удхатай. 30Юуб гэбэл, Бурхан лэ таанадые Христоос Иисүүстэй нэгэдүүлээ, Христоосые манай сэсэн ухаан болгоо. Христоосой ашаар бидэ үнэн сэдьхэлтэнгүүд, Бурханай нангин хүнүүд, сүлөөтэй хүнүүд болообди. 31«Һайрхагша нэгэн Эзэнэй бүтээһэн лэ юумээр һайрхаг лэ», – гэжэ Нангин Бэшэг соо хэлэгдэһэнэй ёһоор бүхы юумэн бүтэжэ байг лэ.