1Cor 10 | BxrBBL2024 | STEP | Аха дүүнэр, Моисейе дахажа ябаһан үбгэ эсэгэнэртэймнай юунэй болоһые би таанадта һануулха һанаатайб. Тэдэниие бултыень үүлэн хамгаалжа ябаа, тэдэнэр бултадаа Улаан далайе аюулгүй гаталаа.

‏ 1 Corinthians 10

Маанадта үгтэһэн һэргылэмжэ

1 Аха дүүнэр, Моисейе дахажа ябаһан үбгэ эсэгэнэртэймнай юунэй болоһые би таанадта һануулха һанаатайб. Тэдэниие бултыень үүлэн хамгаалжа ябаа, тэдэнэр бултадаа Улаан далайе аюулгүй гаталаа. 2 Үүлэн соо, далай соо тэдэнэр Моисейтэй нэгэдэн, «уһаар арюудхагдаа». 3 Тэдэнэр булта нэгэ адли гайхамшагтай эдеэ эдижэ, 4 нэгэ адли гайхамшагтай унда уужа байгаа. Тэдэнтэй хамта ябаһан гайхамшагтай хабсагайһаа тэдэ уужа байгаа. Тэрэ хабсагай болбол Христоос Өөрөө мүн һэн. 5 Тиигэбэшье тэдэнэй олониинь Бурханда һайшаагдаагүй, тиимэһээ тэдэнэр сүл губида хосороо.

6 Үбгэ эсэгэнэрэйнгээ нүгэлтэ ябадалнуудые дабтаха дураа хүрэхэгүйн тула эдэ бүхэн бидэндэ һэргылэмжэ болоно. 7 Тэдэнэй зариманиие һажаажа онгонуудта бү шүтэгты. «Хүн зон эдихэ, уухаяа һууба, найрлажа нааршаажа оробо», – гэжэ Нангин Бэшэг соо бэшээтэй байдаг. 8 Тэдэнэй зариманиинь янхараад, нэгэ үдэр соо хорин гурбан мянган хүн үхөө. Тиимэһээ бидэ тэдээндэл адли янхарха ёһогүйбди. 9 Тэдэнэй зариманиинь Христоосые туршаад, хорото могойнуудта хадхуулан үхөө. Тиимэһээ бидэ тэдэндэл адли Эзэниие туршаха ёһогүйбди. 10 Тэдэнэй зариманиинь гэмэрэлдээд, Үхэлэй Эльгээмэлээр амяа һүнөөлгөө. Тиимэһээ бидэ тэдэндэл адли гэмэрэлдэхэ ёһогүйбди.

11 Тэдэ гай гасалангууд бусад зониие һэргылхын тула үбгэ эсэгэнэртэймнай тохёолдоо, тиин бүхы юумэнэй эсэсэйнь ерэхэ сагта ажамидарһан бидэниие һэргылхын тула бэшэгдээ.

12 Тиимэһээ батаар зогсоноб гэжэ өөр тухайгаа бодожо байһан хүн унашахагүйн тула болгоомжотой байг. 13 Таанадай дабаһан ямаршье туршалганууд юрэ хүнүүдтэ тулгардаг бэрхэшээлнүүд юм. Гэхэтэй сасуу Бурхан амалһан юумэеэ дүүргэжэ, даахын аргагүй туршалгануудые таанадта тулгаруулхагүй, тиигээд туршахадаа, тэсэжэ гараха хүсэ шадал таанадта үгэхэ.

Онгонуудта бү шүтэгты

14 Тиимэһээ, инаг хайрата аха дүүнэрни, онгонуудта шүтэхэһөө зайсажа байгты. 15 Би таанадые бодомжолхо аргатай хүнүүд гэжэ тоолон хэлэнэб, тиимэһээ хэлэһэн юумэнүүд тухаймни өөһэдөө бодооройгты. 16 Бурханда баяр хүргэдэг, Тэрэнэй үхэлые дурасаһан аягаһаа уухадаа, бидэ Христоосой шуһанда хабаатай болонобди. Хилээмэ хухалаад эдихэдээ, бидэ Христоосой бэедэ хабаатай болонобди. 17 Хилээмэн ори ганса юм, тиимэһээ ори ганса хилээмэ хубаалсажа байхадаа, бидэ олоороо ганса бэе гээшэбди.

18 Үргэлэй юумые эдижэ байһан израильшуудые хараад үзэгты, тэдэнэр үргэлэй газарта Бурханда алба хэхэдэ хабаадалсана бэшэ гү? 19 Онгонууд гү, али онгонуудта үргэгдэһэн юумэнүүд үнэндөө ямар нэгэн ушартай юм гэжэ хэлэхэ һанаатай гүб? 20 Үгыл даа, бусад арадуудай онгонуудта үргэдэг юумэнүүд Бурханда бэшэ, харин ада шүдхэрнүүдтэ зорюулаатай гэжэ би хэлэхэ һанаатайб. Тиимэһээ таанадай ада шүдхэрнүүдтэй нэгэдэхые хүсэнэгүйб. 21 Таанад Эзэнэй аягаһаа ба ада шүдхэрэй аягаһаа нэгэ зэргэ уужа шадахагүйт, Эзэнэй шэрээдэ ба ада шүдхэрэй шэрээдэ нэгэ зэргэ хоол барижа шадахагүйт. 22 Али бидэ Эзэнэй уур сухал хүргэхэмнай гү? Өөһэдыгөө Тэрээнһээ хүсэтэйбди гэжэ тоолоно гүбди?

Һүзэглэгшэдэй эрхэ сүлөө

23 Бидэ ямаршье юумэ хэхэ эрхэтэйбди гэжэ зарим хүнүүд хэлэдэг, гэхэтэй сасуу бүхы юумэн һайн бэшэ. «Бидэ ямаршье юумэ хэхэ эрхэтэйбди», гэхэтэй сасуу бүхы юумэн аша туһатай бэшэ. 24 Нэгэнтнайшье өөрынгөө һайн һайханай түлөө бү оролдог, харин бусадай аша тулада оролдожо байг.

25 Худалдаа наймаанай газарһаа абаһан ямаршье юумэн тухайгаа һанаагаа зобонгүй, асуултагүйгөөр эдижэ байгты. 26 «Дэлхэй болон тэрээн дээрэ байгааша хамаг зүйл Эзэнэй», – гэжэ Нангин Бэшэг соо бэшээтэй.

27 Хэрбээ һүзэглэдэггүй хүнэй таанадые урихада, таанад ошохо гэжэ шиидэбэл, һанаагаа зобонгүй, ямаршье асуултагүйгөөр урдатнай табиһан бүхы юумэнүүдые эдижэ байгты. 28 Харин хэн нэгэнэй: «Энэ эдеэн онгонуудта үргэгдөөтэй», – гэжэ таанадта хэлэбэлнь, тэрэ хэлэһэн хүнэй аша туһада, бусадай һанаае зобоохогүйн тула тэрэ эдеэнһээ бү амсаарайт. 29 Би танай һэшхэл тухай бэшэ, харин бусад зоной һэшхэл тухай бодон хэлэнэб. Минии эрхэ сүлөө бусад зоной һэшхэлээр бү шүүмжэлэгдэһэй гэжэ хүсэнэб. 30 Хэрбээ үгтэһэн хоолой түлөө Бурханда баяраа хүргэбэлни, баяр хүргэһэн эдеэнэймни түлөө яахадаа намайе хүн шүүмжэлхэб? 31 Тиихэдээ эдинэ гүт, али ууна гүт, али ямаршьеб даа ондоо юумэ хэнэ гүт, бүхы юумые Бурханай алдарай түлөө хэжэ байгты. 32 Иудейнүүдтэшье, бусад арадай зондошье, Бурханай һүзэглэгшэдэй бүлгэмдэшье ямаршье гомдохол түрүүлэнгүй ажамидарагты. 33 Ямаршье юумэ хэхэдээ, би өөрынгөө аша туһада бэшэ, харин бүхы хүнүүдэй абарагдахын тула, тэдэнэй аша туһада оролдодогби.