‏ 1 Corinthians 16

Һүзэглэгшэ аха дүүнэртэ үзүүлхэ туһаламжа

1Мүнөө дуталдажа байһан Иудей можын Бурханай хүнүүдтэ алта мүнгэ суглуулжа туһалха талаар хэлэһүүб. Галаадай һүзэглэгшэдэй бүлгэмүүдтэ юу хэхыень захяа һэнби. Таанадшье тэрэ захяа дүүргэгты. 2Воскресени бүхэндэ булта шадалайгаа зэргээр оролгоһоон мүнгэ гаргаад, тэрэнээ хадагалжа байг. Тиигэбэлтнай, ерэхэдэмни, алта мүнгэ суглуулха хэрэг гарахагүй. 3Би ерэхэдээ, шэлэжэ абаһан хүнүүдтэтнай бэшэгээ үгөөд, бэлэгүүдтэйнь Иерусалим ябуулхаб. 4Хэрбээ тэдэнтэй суг ябалсаха хэрэгтэй байбал, хамта ябуужаб.

Һүүлшын заабаринууд

5Би Македонёор дайраад, һүүлээрнь таанадта ерэхэб. Македонёор дайраха ёһотой хүнби. 6Нэгэ хэды саг соо таанадтай байхаб, үбэлжэжэшье магадгүйб, һүүлээрнь таанад намайе замдамни суглуулаарайт. 7Би таанадтай халта уулзаад лэ хахасахаяа һананагүйб. Хэрбээ Эзэнэй үршөөбэл, таанадтайгаа удаан байһайб гэжэ хүсэнэб.

8Эндэ Эфестэ би Табидахи үдэрэй һайндэр болотор байхаб. 9Эндэ эсэргүүсэгшэдэй олон байгаашье һаань, агууехэ шухала хэрэг бэелүүлхэ боломжо гараад байна.

10Хэрбээ Тимофейн таанадта ошобол, танай дунда айлта зоболтогүй байха тухайнь бодооройт, тэрэ намдал адли Эзэнэй аша туһада ажаллана. 11Хэншье тэрэниие доогуур бү хараг. Тэрэнэй намда бусажа ерэхэ замайнь амгалан байха тухай бодон, тэрэниие үдэшөөрэйт. Би тэрэниие һүзэглэгшэ аха дүүнэртэйгээ ерэхыень хүлеэнэб.

12Мүнөө манай һүзэглэгшэ нүхэр Аполлос тухай хэлэһүүб. Би тэрэниие таанадта һүзэглэгшэ аха дүүнэрээр хамта ошохыень ехэл гуйһан байгааб. Теэд тэрэ мүнөө таанадта ошохо аргагүй байна, гэхэдэ боломжо гарабал, тэрэ таанадта заабол ошохо.

13Һэргэг байгты. Һүзэгөө алдангүй, зоригтой, хатуу байгты. 14Ямаршье юумэ хэхэдээ, дуратайгаар хэжэ байгты.

15Таанад Стефан ба тэрэнэй гэр бүлэ тухай мэдэнэт, тэдэнэр Ахайяын зоной дундаһаа анха түрүүн Эзэндэ һүзэглэһэн, Бурханай хүнүүдэй алба хэхэдэ өөһэдыгөө бүрин зорюулаа юм. Аха дүүнэрни, 16тиимэл хүнүүдэй ба тэдэнтэй ажаллажа, алба хэжэ байһан хүнүүдэй хүтэлбэри доро ябагты гэжэ таанадые гуйнаб.

17Стефан, Фортунат, Ахаик гурбанай ерэһэндэ би аргагүй ехээр баярланаб, тэдэнтэй байхадаа, таанадай үгы байһые ойлгонгүй үнгэрбэб. 18Тэдэнэр намайешье, таанадыешье баярлуулаа. Тиимэ зониие хүндэлжэ байгты.

19Аси можын һүзэглэгшэдэй бүлгэмүүд таанадта мэндые хүргэнэ. Ааквила Прискиилла хоёр, тэдэнэй гэртэ суглардаг һүзэглэгшэдэй бүлгэм таанадта Эзэндэ һүзэглэгшэдэй халуун мэндые хүргэнэ. 20Таанадта эндэхи һүзэглэгшэ аха дүүнэр булта мэндые хүргэнэ. Бэе бэеэ арюун дотоноор таалажа мэндэшэлээрэйт.

21Энэ мүрнүүдые өөрын гараар бэшэнэб: Павел таанадта амар мэндые хүргэнэ. 22Эзэндэ дурагүй байһан хүнэй толгой дээрэ хараал бууг. Манай Эзэн, ерыт даа!

23Эзэн Иисүүсэй үршөөл хайра таанадтай байһай! 24Минии хайра дуран Иисүүс Христоос соо та бүхэнтэй оршохонь болтогой!