‏ 1 Corinthians 4

Христоосой элшэнэр

1Бурханай нюуса тайлбарилжа байхаар табигдаһан юрэ Христоосой зарасанар байһыемнай таанад ойлгохо ёһотойт. 2Тиимэ зарасанар булта эзэндээ үнэн шударга байха ёһотой. 3Таанадай гү, али ондоо хүнүүдэй намайе шүүмжэлхэ шүүбэрилхэнь намда ямаршье хамаагүй, би өөрөөшье өөрыгөө шүүбэрилдэггүйб. 4Сэдьхэлни арюуншье һаа, үнэхөөрөө ямаршье гэмгүй байһамни энээгээр баталагданагүй, юундэб гэбэл, гансал Эзэн минии заргаша мүн. 5Тиимэһээ тогтоогдоһон сагай болоогүйдэ хэнииешье бү шүүбэрилэ. Эзэн ерэхэдээ, шэб харанхыда хоргодоһон юумэнүүдые гэрэлтүүлхэ, хүнүүдэй далда һанаа зорилгые элирүүлхэ, тиихэдэ хүн бүхэн хэһэн зэргээрээ Бурханайл магтаалда хүртэхэ.

6Аха дүүнэр, таанадайл аша туһада би эдэ бүхэниие Аполлос бидэ хоёрой жэшээ дээрэ харуулбаб. Хүн бүхэнтнай Бурханай һургаалые гүйсэдхэжэ байһай гэжэ хүсэнэб. Хэнтнайшье нэгэ хүнөө хүндэлөөд, нүгөөдэеэ баһаад бү ябаһай. 7Хэн таанадые бусадһаа дээгүүр табяаб? Таанадта байһан бүхы юумые Бурхан лэ таанадта үгөө бэшэ аал? Тиихэдээ танда байһан бүхы юумэнүүд дээрэһээ үгтэһэн бэлэг бэшэ мэтээр бодон, яахадаа ямбархаа хүмта?

8Зай, тиихэдээ таанад бэеэ ханаба гүт? Баяжаба гүт? Таанад бидэнгүй хаанууд болообди гэжэ һананат. Үнэхөөрөө таанадай хаан шэрээдэ һуухые хүсэнэб, тиигэбэл бидэшье таанадтай хамта захирха һэмди. 9Бүлэг зоной урда үхэхэ табилантай зондол адли Бурхан элшэнэр бидэндэ хамагай һүүлэй һууринуудые үгөө гэжэ намда һанагдадаг. Эльгээмэлнүүдэйшье, хүнүүдэйшье, бүхы юртэмсэ дэлхэйн урда үзэсхэлэн болоо ха юмбибди. 10Бидэ Христоосой түлөө тэнэг болообди, зүгөөр таанад Христоостой хамтаран сэсэн мэргэн болобот! Бидэ ахир һулабди, тиихэдэ таанад хүсэтэй болобот! Бидэнэй нэрые гутаагаа, харин таанад алдар солодо хүртэбэт! 11Мүнөө болотор бидэ үлэн хооһон, амаа ангажа, үмхирһэн хахарһан хубсаһатай ябанабди, маанадые сохино, бидэ нэгэ газарһаа нүгөө газарта тэнэжэ ябанабди. 12Бидэ хүшэр хүндэ ажал хэжэ хүлһөө гоожуулнабди. Маанадые хараалда хүртөөхэдэ, бидэ үреэнэбди, маанадые хашан мүрдэхэдэ, бидэ тэсэбэритэй байнабди, 13маанадые хардахадань, бидэ энхэргэн үгэнүүдээр харюусанабди. Бидэ энэ дэлхэйн хаягдал гээшэбди, бидэ мүнөө болотор газарай хог болоод байнабди.

14Эшээхэ улайлгаха зорилготойгоор энээниие таанадта бэшэнэ бэшэб, харин инаг хайрата үхибүүдээ һургаһандал адляар таанадта ухаа заанаб. 15Яажа Христоостой ажамидархаб гэжэ таанадые һургадаг үй түмэн хүтэлэгшэд байхаданьшье, таанадта гансал эсэгэ байна. Христоос Иисүүстэй нэгэдэхэдэтнай би таанадта Һайн Мэдээсэлые хүргэн, эсэгэтнай болооб. 16Тиимэһээ намайе һажаажа ябагты гэжэ таанадые ехэтэ гуйнаб. 17Тиимэл зорилготойгоор Эзэндэ үнэн сэхэ Тимофейе таанадта эльгээнэб. Тэрээндэ би Хүбүүндээл адли дуратай хүнби. Хаанашье ябахадаа, һүзэглэгшэдэй бүхы бүлгэмүүдые һургадаг байһан тухаймни – Христоос Иисүүстэй нэгэдэһэн ажамидаралдаа баримталдаг юумэнүүд тухаймни – таанадта тэрэ һануулха.

18Таанадые би эрьежэ ошохогүйб гэжэ бодон заримантнай хамараа үргэшэбэ. 19Гэбэшье Эзэнэй үршөөбэл, би һаядаа таанадта ошохоб, тиигээд тэрэ хамараа үргэһэн зоной хэлэһэн юумэнүүдыень бэшэ, харин оюун ухаанайнь хүсые туршажа мэдэхэб. 20Ушарынь гэхэдэ, Бурханай хаан орондо үгэнүүд бэшэ, харин һүр хүсэн шухала. 21Минии таанадта ташууртай ерэхыемни хүсэнэ гүт, али энхэргэн зөөлэн, хайра дурын һүлдэтэй ерэхыемни хүлеэнэ гүт?
Copyright information for BxrBBL2024