1Cor 6 | BxrBBL2024 | STEP | Та, һүзэглэгшэд, хоорондоо заргалдахадаа, яахадаа Бурханай хүнүүдтэ ошонгүй, харин һүзэггүй зоноор заргаяа шиидхүүлнэбта?

‏ 1 Corinthians 6

Һүзэглэгшэд хоорондоо заргалдаха ёһогүй

1 Та, һүзэглэгшэд, хоорондоо заргалдахадаа, яахадаа Бурханай хүнүүдтэ ошонгүй, харин һүзэггүй зоноор заргаяа шиидхүүлнэбта? 2 Бурханай хүнүүд энэ дэлхэйн зониие шиидхэхэ гэжэ таанад мэдэхэгүй аалта? Хэрбээ таанад энэ дэлхэйн зониие шиидхэхэ ушартай аад, жэжэ асуудалнуудаар шиидхэбэри гаргаха аргагүй аалта? 3 Бидэ эльгээмэлнүүдтэшье шиидхэбэри гаргахабди гэжэ таанад мэдэхэгүй аалта? Тиихэдэ энэ дэлхэйн хэрэгүүдые бүришье бэлээр шиидхэхэ бэшэ аалта? 4 Харин таанад заргалдаанай хэрэгүүдые шиидхэхэдээ, һүзэглэгшэдэй бүлгэмдэ ямаршье хабаагүй хүниие яахадаа заргашанаар табижа, тэрээндэ заргаяа үргэнэбта? 5 Ай, эшхэбтэр юумэ байна! Һүзэглэгшэдэй хоорондохи арсалдаае шиидхэхэ аргатай сэсэн ухаантай нэгэшье хүн таанадай дунда олдобогүй гээшэ гү? 6 Харин тиихэдэ һүзэглэгшэ хүн һүзэглэгшэ аха дүүгэйнгээ урдаһаа зарга барижа, үшөө тиихэдэ һүзэггүй зоноор асуудалаа шиидхүүлжэ байна.

7 Хоорондоо заргалдаһан ушартнай таанадай илагдаһые харуулна. Гомдохуулһан, мэхэлүүлһэн байбалтнай дээрэ байха бэшэ һэн гү? 8 Тиигэхын орондо таанад өөһэдөө бэе бэеэ, һүзэглэгшэ аха дүүнэрээ гомдохоонот, мэхэлнэт. 9 Харата хэрэг үйлэдэгшэд Бурханай хаан орониие залгамжалхагүй гэжэ таанад мэдэхэгүй аалта? Бү эндүүрэгты: забхайралдагшад, онгонуудта шүтэгшэд, нүхэртөө, али эхэнэртээ урбагшад, эрэшүүлтэй гүйлдэдэг эрэ хүнүүд, 10 хулгайшад, алта мүнгэндэ шунагшад, архиншад, хардагшад, мэхэшэд, эдэнэй али нэгэньшье Бурханай хаан орониие залгамжалхагүй. 11 Танай заримантнай урдань тиимэл нүгэлтэн байгаа. Гэхэдээ таанад нүгэлнүүдһээ арилгагдаһан, Бурханда зорюулагдаһан, Эзэн Иисүүс Христоосой ба манай Бурханай Һүлдын ашаар Бурханай урда сагааруулагдаат.

Эзэндэ зорюулһан бэе

12 Бидэ ямаршье юумэ хэхэ эрхэтэйбди гэжэ зарим хүнүүд хэлэхэ, теэд бүхы юумэн таанадта аша туһатай бэшэ. Би ямаршье юумэ хэхэ эрхэтэйб гэжэ хэлэхэб, теэд би алишье юумэнэй барлагынь болохогүйб. 13 Эдеэн ходоододол орохын тула байдаг, харин ходоодо хоол барихын тула юм гэжэ зарим хүнүүд хэлэхэ. Гэхэдэ Бурхан али алинииеньшье үгы болгохо. Махабад бэе ташаяан хурисалай тулада бүтээгдээ бэшэ, харин Эзэндэ алба хэхээр бүтээгдээ, тон тиигэжэл Эзэншье бэеые хаража анхаржа байдаг. 14 Бурхан Эзэниие амидыруулаа, тиин бидэнииешье һүр хүсөөрөө амидыруулха.

15 Танай бэе Христоосой бэеын хэһэгынь юм гэжэ таанад мэдэхэгүй аалта? Тиихэдээ би Христоосой бэеын хэһэгые абажа, янханай бэеын хэһэг болгохо аалби? Үгыл даа! 16 Янхан эмэтэй ниилэһэн хүн тэрээнтэй нэгэ бэе болоно гэжэ таанад мэдэхэгүй аалта? «Хоёр хүн ганса бэе болон эблэрхэ», – гэжэ Нангин Бэшэг соо элеэр бэшээтэй. 17 Харин Эзэнтэй ниилэһэн хүн һүнэһэ һүлдөөрөө Тэрээнтэй нэгэдэдэг.

18 Ташаяан хурисалһаа зайсажа байгты. Хүнэй үйлэдэдэг бусад нүгэлнүүд бэеые ехэ гэмдэ оруулдаггүй, харин янхаржа байһан хүн өөрынгөө бэеые ехэл гэмдэ оруулна. 19 Бэетнай Бурханһаа таанадта үгтэһэн зосоотнай оршодог Арюун Һүлдын һүмэ юм гэжэ мэдэхэгүй аалта? Таанад өөһэдынгөө дураар бэшэт, Бурханай мэдэлдэ байнат. 20 Бурхан таанадые үнэтэй сэнгээр худалдажа абаа. Тиимэһээ бэеэрээ Бурханиие алдаршуулжа байгты.