1 Corinthians 8
Онгонуудта үргэгдэһэн хоол
1Мүнөө онгонуудта үргэгдэһэн эдеэн тухай асуудалаар хөөрэлдэе. Бидэ булта мэдэлгэтэйбди гэжэ тэдэнэй хэлээшэ үнэн зүб юм. Гэхэдэ тиимэ мэдэлгэ хүниие омог бардам болгодог, харин хайра дуран бэхижүүлдэг юм. 2Ехэ юумэ мэдэнэб гэжэ бодоһон хүн үнэндөө болбол юушье мэдэдэггүй. 3Тиихэдэ Бурханда дуратай хүниие Бурхан мэдэхэ. 4Онгонуудта үргэгдэһэн хоол бариха тухай хэлэбэл, онгонууд юуншье бэшэ, зүбхэн ори ганса Бурхан бии юм гэжэ бидэ мэдэнэбди. 5Тэнгэри дээрэ гү, али газар дээрэ бурхад гэжэ нэрлэгдэдэг юумэнүүдэй байбашье, олон түрэлэй бурхадай, эзэдэй байбашье, 6бидэндэ ори гансал Эсэгэ Бурхан, ори ганса Эзэн Иисүүс Христоос бии. Эсэгэ Бурхан бүхы юумые бүтээгээ, бидэ Тэрэнэй ашаар ажамидарнабди; бүхы юумэн Эзэн Иисүүс Христоосой ашаар бүтээгдээ, бидэ Тэрэнэй ашаар ажамидарнабди. 7Энэ үнэн юумые зарим зон мэдэдэггүй. Зариман мүнөө болотор онгонуудта үргэгдэһэн хоол эдихые онгонуудые тахиһантай адляар урдынхяараа сэдьхэдэг. Тиин тэрэ эдеэ амсан, бирагүйхэн һэшхэлээ бузарлуулдаг. 8Эдеэ хоол бидэниие Бурханда ойртуулдаггүй, тиимэһээ тэрэ эдеэ амсаагүй һаа, бидэ юушье алдахагүйбди, тэрэ эдеэ амсаа һаа, бидэ юушье олохогүйбди. 9Гэхэтэй сасуу танай алишье хоол шэлэхэ эрхэтэй байһантнай бирагүйхэн һүзэгтэй зониие нүгэлдэ бү оруулуужа. 10Тиимэ бирагүйхэн һүзэгтэн онгонуудта шүтэдэг газарта юумэ мэдэрһэн шинии эдеэлхыешни хараад, онгонуудта үргэгдэһэн эдеэ амсахаяа һанахагүй гү гэжэ бодоод үзөөрэй. 11Тиигэжэ мэдэлгэһээшни боложо ахир һүзэгтэй аха дүүшни хосорхол. Харин Христоос тэрэнэй түлөө ами наһаяа үргөө юм. 12Тиигэжэ таанад һүзэглэгшэ аха дүүгэйнгээ урда нүгэл абахадаа, бирагүйхэн һэшхэлыень доройтуулжа, Христоосой урда нүгэл хэнэт. 13Тиимэһээ аха дүүемни эдеэн нүгэлдэ оруулха байбал, аха дүүгээ нүгэлдэ оруулхагүйн тула би дахин хэзээшье мяха эдихэгүйб.
Copyright information for
BxrBBL2024