1Ki 20 | BxrBBL2024 | STEP | Араамай хаан Бэн-һадаад бүхы сэрэгээ суглуулба. Гушан хоёр хаашуул морин сэрэгтэеэ, дайшалхы тэргэнүүдтэеэ тэрэнэй тала баримталан, бултадаа Самариие бүһэлэн добтолбо.

‏ 1 Kings 20

Израильда Араамай анха удаа добтолго

1 Араамай хаан Бэн-һадаад бүхы сэрэгээ суглуулба. Гушан хоёр хаашуул морин сэрэгтэеэ, дайшалхы тэргэнүүдтэеэ тэрэнэй тала баримталан, бултадаа Самариие бүһэлэн добтолбо. 2 Бэн-һадаад Израилиин хаан Ахаабта хото руунь элшэнэрые ябуулжа, 3 иигэжэ хэлэхыень захирба: «Алта мүнгэеэ, һамгадаа болон шадал шандааһатай хүбүүдээ дамжуулан үгэ гэжэ Бэн-Һадаад хаан шамда эрилтэ табина». 4 Израилиин хаан иимэ харюу үгэбэ: «Танай хэлээшээр болохонь болтогой, эзэн хаамни. Би болон минии бүхы юумэн танай болог». 5 Элшэнэр дахин тэрээндэ ерэжэ, иигэжэ дуулгаба: «Бэн-Һадаад иигэжэ хэлэнэ – алта мүнгэеэ, һамгадаа, хүбүүдээ намда дамжуулхат. 6 Тиимэһээ үглөөдэр энэ сагта би түшэмэлнүүдээ шам руу эльгээхэдэм, тэдэ шинии ордон, түшэмэлнүүдэйш гэрнүүдые урбуулан бэдэржэ, бүхы үнэтэй зүйлнүүдыеш хуряан абаашаха».

7 Израилиин хаан орон нютагайнгаа бүхы удамаршадые суглуулаад, иигэжэ хэлэбэ:

– Харыт, Бэн-Һадаад урдаһаамнай муу хэрэг түсэблөөд байна. Һамгадыем, хүбүүдыем, алта мүнгыем хуряан абахам гэхэдэнь, би арсаагүй бэлэйлби!

8 Бүхы удамаршадынь, арад зониинь:

– Тэрэнэй үгэ бү дуула, бү зүбшөө, – гэлдэбэ.

9 Тиихэдэнь тэрэ Бэн-Һадаадай элшэнэртэ:

– Эзэн хаандам дамжуулыт: танай богоол болохо нам руу элшэнэрые түрүүшынхиеэ ябуулжа дурадхаһан зүйлнүүдыетнай бэелүүлхээр бэлэмби, харин мүнөө хэлээшыетнай дүүргэхэ аргамгүй, – гэжэ дамжуулхыень захиба. Элшэнэр ошожо, харюуень дуулгаба. 10 Бэн-Һадаад иигэжэ харюу дамжуулба:

– Угаа олон сэрэг таанад руу дахуулан асархадам, һандаргагдаһан Самариин үнэһэн шорой тэдэ асаруулааша зондом бултандань альган соонь хүртэхэгүй. Энээниие бэелүүлээгүй һаам, бурхад намда гай гасалан ушаруулаг лэ!

11 Израилиин хаан харюу эльгэбэ:

– Юушье хээгүй аад, һайрхаха гээшэ үлүү. Хэрэгэй эсэстэ һайрхаһан дээрэ.

12 Энээниие дуулахадаа, хаашуултай хамта майхангууд соо үзэмэй дараһан архи уужа байһан Бэн-Һадаад сэрэгэй түшэмэлнүүдтээ захирба:

– Хотодо добтолхоо бэлдэгты!

Тэдэнь хотодо добтолхоо бэлдэбэ.

13 Тэрэ үедэ Израилиин Ахааб хаанда нэгэ лүндэншэ дүтэлжэ, иигэжэ хэлэбэ:

– Эзэн иигэжэ айладажа байна: «Иимэ ехэ сэрэг харана гүш? Үзэхэш, намайе Эзэн гэжэ ойлгохыншни тула Би мүнөөдэр шамда илалта үршөөхэб!»

14 – Хэнээр энээниие хүүлэхэб? – гэжэ Ахааб асууба.

– Можонуудай ноёдой захиралта доро байгааша залуу сэрэгшэдээр гээд Эзэн айладаа, – гэжэ тэрэ харюусаба.

– Хэн байлдаае ударидахаб? – гэжэ Ахаабай асуухада,

– Та, – гэжэ тэрэ харюу үгөө һэн.

15 Можонуудай ноёдой ударидалга доро ябадаг залуу сэрэгшэдые хаан хамта суглуулжа тоолобо: хоёр зуун гушан хоёр гээд элирбэ. Удаань Израилиин арад зониие тоолоходонь, долоо мянга гээд эли болобо. 16 Үдын тэн багаар тэдэ хотоһоо хүдэлэн гараба.

Энэ үедэ Бэн-Һадаад хамтарагша гушан хоёр хаашуултаяа хамта майхангууд соо шал һогтуу байгаа. 17 Можонуудай ноёдой залуу сэрэгшэд түрүүлэн байлдаа эхилээ. Бэн-Һадаадай эльгээһэн тагнуулшад ерэжэ, «Самариһаа зон гараад, ерэжэ ябана!» гэжэ дуулгаба.

18 – Амидыгаар тэдэниие барижа асарагты! Амгалан тайбаншье хэрэгээр ябаа һаань, дайлахаяашье ябаа һаань, – гэжэ Бэн-Һадаад захирба. 19 Залуу сэрэгшэд Израилиин сэрэгые дахуулан, байлдаанда оробо. 20 Байлдаан-хюдалдаан боложо, Араамай сэрэг тэрьедэжэ эхилбэ, израильшууд хойноһоонь намнаба. Араамай хаан Бэн-Һадаад нэгэ хэды зонтой хамта мори унаад зугадаба. 21 Израилиин хаан сэрэгээрээ хойноһоонь гараад, моридые, дайшалхы тэргэнүүдые хуряан абаба. Иигэжэ Араамай сэрэгые тэдэ угаа олоор усадхаба.

22 Лүндэншэ Израилиин хаанда дүтэлөөд, иигэжэ хэлэбэ:

– Амаржа, хүсөө суглуула, юу хэхэеэ түсэб зохёо, юуб гэбэл, ерэхэ жэлэй эхиндэ Араамай хаан шамда добтолхо, – гэбэ.

Израильда Араамай хоёрдохёо добтолго

23 Араамай хаанай түшэмэлнүүд хаандаа иигэжэ хэлэбэ:

– Израилиин бурхад хадаа хада уулын бурхад, тиимэһээ тэдэ маанадые диилээ. Харин тала газарта тэдэнтэй тулалдаа һаа, заабол диилэхэбди. 24 Гушан хоёр хаашуулые шэрээһээнь буулгагты, орондонь өөрынгөө зониие зонхилогшодоор табигты. 25 Хэды сэрэгшэднай алдалан унааб, тэды сэрэгшэдые, хэды морид, тэды моридые, хэды дайшалхы тэргэнүүд, тэды тэргэнүүдые дахин һэргээн байгуулая. Тиигээд тала газарта тэдэнтэй тулалдабал, заабол илахабди.

Тэрэ үгыень дуулажа, хэлээшээрнь бүтээбэ. 26 Удаадахи жэлэй эхиндэ Бэн-Һадаад Араамай сэрэг суглуулжа, Израильтай дайлалдахаяа Апээк руу ерэбэ. 27 Израилиин сэрэгшэдшье сугларжа, хүнэһэ хоолоо абаад, урдаһаань ерэбэ. Тиигээд израильшууд хотон хүреэнээрээ урдань тогтобо. Израилиин сэрэг тэдэнэй урда ямаадай хоёр багахан һүрэг мэтээр харагдаба, харин Араамай сэрэг бүхы орон нютаг бүрхөөн байгаа һэн.

28 Бурханай хүн Израилиин хаанда дүтэлжэ, иигэжэ хэлэбэ:

– Эзэн иигэжэ айладана: «Намайе тала газарай бэшэ, хада уулын бурхан гэжэ араамшуудай хэлэһэндэнь Би шамда илалта үршөөхэб, ши иимэ ехэ сэрэг диилэхэш. Таанад Намайе Эзэн гээд ойлгохот».

29 Долоон хоногой туршада тэдэ урда урдаһаа харан, хотон хүреэнээрээ зогсобо. Долоодохи үдэр байлдаан эхилжэ, израильшууд нэгэ үдэрэй туршада Араамай зуу мянган ябаган сэрэг усадхаба. 30 Үлөөшэ сэрэгынь Апээк руу зугадаба, теэд тэндэ хотын хана хэмхэрэн, хорин долоон мянган сэрэгшыень даража унаба.

Бэн-Һадаад мүн лэ хэрэм хото руу тэрьедэн ерээ. Тэндэ тэрэ нэгэ гэрэй саада таһалга соо хоробо. 31 Түшэмэлнүүдынь тэрээндэ:

– Израилиин хаашуул энэрхы сэдьхэлтэй гээд бидэ дуулаабди. Шэрүүн таар хубсаһа нарин матаргайдаа тойруулаад, олоһо хүзүүндээ уяад, Израилиин хаан руу ошохыемнай зүбшөөгыт. Тиихэдэмнай тэрэ танай ами наһа хайрлажа магад, – гэбэ. 32 Тэдэ шэрүүн таар хубсаһа нарин матаргайдаа тойруулаад, олоһо хүзүүндээ уяад, Израилиин хаанда ерэжэ, иигэжэ хэлэбэ:

– Танай богоол болохо Бэн-Һадаад «ами наһыем хайрлыт» гэнэ.

– Тэрэ амиды мэндэ юм аал? Тэрэ болбол минии дүү бшуу, – гэжэ Ахааб дуугарба. 33 Бэн-Һадаадай зон энээниие һайн тэмдэг гэжэ тоолоод, хэлээшыень дабтан:

– Танай дүү Бэн-Һадаад, – гэлдэбэ. Ахааб хаан:

– Ошожо, тэрэниие асарагты, – гэбэ. Бэн-Һадаад тэрээн руу ерэбэ. Ахааб тэрэниие морин тэргэдээ һуулгаба. 34 Бэн-Һадаад тэрээндэ:

– Минии эсэгын танай эсэгэһээ абаһан хотонуудые би бусаажа үгэхэб. Мүн Самарида минии эсэгын байгуулһан шэнги худалдаа наймаанай гудамжануудые та Дамааскда байгуулха эрхэтэйт, – гэжэ хэлэбэ. Ахааб харюу үгэбэ:

– Иимэ хэлсээ баталбал, би шамайе табихаб.

Тиигээд тэрээнтэй хэлсээ баталаад, сүлөө табиба.

Ахаабай хосорхо тухай лүндэншэ зүгнэнэ

35 Эзэнэй захирһанай ёһоор, нэгэ лүндэншэ нүгөөдэ лүндэншэдэ:

– Намайе сохи! – гэбэ. Теэд тэрэнь сохихоёо арсаба. 36 Тиихэдэнь тэрэ:

– Эзэнэй үгэ дуулаагүйншни түлөө намһаа холодон ошоходош арсалан шамайе барижа алаха, – гэбэ. Тэрэнэй ошоходонь, арсалан дайралдажа, тэрэ хүниие алажархиба. 37 Тэрэ лүндэншэ ондоо хүниие олоод:

– Намайе сохи, – гэбэ. Тэрэ хүн өөрыень сохижо, шархатуулба. 38 Лүндэншэ нюураа боолтоор орёогоод, харгы руу ошожо, хаанай тэрээгүүр гарахые хүлеэбэ. 39 Хаанай хажуугаарнь гаража байхада, тэрэ хаанда хашхарба:

– Үндэр түрэлтэ хаан, би дайнда ябааб. Нэгэ сэрэгшэ баряанда абтаһан дайсаниие нам руу асараад, «энэ хүниие харууһалан бай. Зугадаа һаань, ши өөрөө алуулхаш, үгышье һаа, гурбан мянган хэһэг мүнгэ түлэхэ ёһотой болохош» гэжэ хэлээ. 40 Теэд минии ондоо хэрэг хэжэ байхада, тэрэ дайсан зугадаал.

Израилиин хаан тэрээндэ иигэжэ хэлэбэ:

– Шиидхэбэри ямар байхаб гэжэ ши өөрөө хэлэжэ байнаш.

41 Боолтоёо тайлахадань, хаан тэрэниие лүндэншэ хүн гэжэ таниба. 42 Лүндэншэ тэрээндэ:

– Эзэн иигэжэ айладажа байна: «Минии алаха гэжэ зарлигтаһан хүниие табиһанайнгаа түлөө ши тэрэнэй орондо үхэхэш, арад зоншни тэрэнэй арадай орондо хосорхо!»

43 Израилиин хаан ехэ һанаагаа зобонхой, уруу дуруу юумэн гэртээ, Самари руу бусаба.