‏ 1 Kings 3

(2 Уг 1:3-12)

1Соломоон Египедэй фараоной басага һамга абажа, фараонтой холбоо батадхаба. Өөрынгөө ажаһууха ордон, мүн Эзэнэй Һүмэ, тиихэдэ Иерусалимые бүһэлэн хэрэм хана бодхоотороо тэрэ һамгаяа Давидай хото соо байхыень асараа бэлэй.

Гибэһоондохи обоо

2Эзэнэй Һүмын баригдаадүй байха үедэ арад зон мүргэлэй обоонууд дээрэ үргэл хэдэг байгаа. 3Соломоон Давид эсэгынгээ захяа заабаринуудые сахин, Эзэндэ угаа дуратай һэн. Теэд бусадтал адли тэрэшье мүргэлэй обоонууд дээрэ үргэл, уталгануудые хэдэг бэлэй.

4Нэгэтэ хаан үргэл хэхэеэ Гибэһоон руу ошобо. Тэндэ эгээл ехэ мүргэлэй обоон байдаг байгаа. Соломоон тэрэ үргэлэй шэрээ дээрэ мянган түгэс шатаалта үргэл үргэбэ.

Соломоон Эзэнһээ сэсэн мэргэн ухаа гуйна

5Гибэһоондо тэрэл һүниндөө Эзэн Соломоондо зүүдэндэнь үзэгдэжэ:

– Юун шамда хэрэгтэйб, Намһаа гуйхадаш болохо, – гэжэ Бурхан айладхаба. 6Соломоон:

– Минии эсэгэ, Танай богоол Давидта Та ехэ энэрэл хайра үзүүлээт. Тиигээдшье тэрэ Танда үнэн сэхэ, зүб шударгы, сэхэ сэбэр хандадаг бэлэй. Тэрэ ехэ энэрэл хайраяа үргэлжэлүүлэн, хан шэрээдэ мүнөө һуужа байгша хүбүү тэрээндэ үршөөгөөт. 7Эзэн Бурхамнай, минии хэды залуушье һаа, яагаад ударидахые мэдэхэшьегүй һаам, Та намайе Давид эсэгым удаа хаан болгон табяат. 8Танай шэлэгшэ, тооложо барамаар бэшэ үй түмэн арад зонойтнай дунда би байнаб. 9Һайн муу хоёрые илгаруулан ойлгохо, арад зонииетнай шүүхэ сэсэн ухаа Та намда үршөөгыт. Намһаа бэшэ хэн Танай тоо томшоггүй арад зониие зонхилжо шадахаб? – гэжэ хандаба.

10Соломооной иигэжэ гуйһаниинь Эзэн Бурханда ехэ һайшаагдаба. 11Тиимэһээ тэрээндэ Бурхан:

– Өөртөө ута наһа эрибэгүйш, баялиг хогшол эреэ бэшэш, дайсадыш усадхахыем гуйгаа бэшэш, гансал зарга шүүбэри гүйсэдхэхэдэ хэрэгтэй сэсэн мэргэн ухаа гуйбаш, 12зай, тиимэһээ шинии гуйһанай ёһоор хэрэг ябуулхам: сэсэн мэргэн, бүхы юумэ ойлгохо ухаа шамда үршөөнэб. Шамдал адли ухаатай иимэ хүн байгаагүй, шинии удаашье тиимэ хүн мүндэлхэгүй. 13Шинии гуйгаагүй юумэ мүн лэ үгэнэб: баялиг, алдар соло үршөөнэб. Иимэ бэшэ ондоо хаан байхагүй. 14Өөрын эсэгэ Давидтал адли, Намайе шүтэн, ёһо гуримуудыем, захяа заабаринуудыем сахин байбалшни, ута наһа шамда бэлэглэхэб, – гэжэ айладхаба.

15Соломоон нойрһоо һэрижэ, зүүдэндэнь Бурханай үзэгдэһые ойлгобо. Тиигээд тэрэ Иерусалим руу ошожо, Эзэнтэй хэлсээ баталһан ханзын урда зогсожо, түгэс шатаалта үргэл, амгалан байдалай түлөө үргэл үргэбэ. Удаань бүхы түшэмэлнүүдтээ найр наада эмхидхээ бэлэй.

Соломооной сэсэнээр зарга шүүлгэ

16Нэгэтэ хоёр янхан эхэнэр хаанда ерэжэ, урдань зогсобо. 17Нэгэ эхэнэрынь:

– Үндэр түрэлтэ хаан эзэмни, би энэ эхэнэртэй нэгэ гэртэ байдагби. Тэрэнэй байһаар байтар би үхибүү түрөө һэм. 18Түрэһэнэйм удаа гурбадахи үдэр энэ эхэнэр мүн лэ үхибүү түрөө. Маанадһаа бэшэ хэншье тэрэ гэртэ байгаагүй, бидэ хоюулаал бэлэйбди. 19Энэ эхэнэр унтажа байтараа һүниндөө үхибүүгээ даража, тэрэнь гээгдэбэ. 20Тиигээд энэ эхэнэр һүни дунда бодоод, бүхөөр унтажа байхадамни хүбүүемни абаад, өөрынгөө үбэртэ хээ, харин өөрын үхэһэн хүбүүгээ минии хажууда хэһэн байгаа. 21Үглөөгүүр һэрижэ, хүбүүгээ хүхүүлхэ гэхэдэм, тэрэ үхэһэн, харин һайнаар харахадам, тэрэ минии түрэһэн хүбүүн бэшэ байба, – гэбэ. 22Харин нүгөөдэ эхэнэрынь:

– Үгы, амидынь минии хүбүүн, харин үхэһэниинь шинии! – гэжэ хэлэбэ.

– Үгы! Шинии хүбүүн үхэһэн, харин минии хүбүүн амиды! – гэжэ түрүүшын эхэнэр һөөргэдэнэ. Иигэжэ тэдэ хаанай урда хэрэлдэжэ арсалдажа зогсобод. 23Хаан:

– Амиды хүбүүхэн минии, харин үхэгшэ хүбүүн шинии гэжэ хүн бүхэнтнай хэлэнэ. 24Намда һэлмэ асарагтылши, – гэжэ захирба. Хаанда һэлмэ асарба. 25Тиихэдэнь хаан:

– Амиды байһан энэ хүүгэдые хоёр хэһэг болгон сабшагты! Тиигээд нэгэ хэһэгые нэгэ эхэнэртэ, нүгөөдэ хэһэгые нүгөө эхэнэртэ үгэгты, – гэжэ захирба. 26Амиды хүбүүнэй үнэхөөр эхэнь зүрхэ сэдьхэлээ доһолгон, хүбүүгээ угаа хайрлажа:

– Үндэр түрэлтэ эзэн хаамни! Үхибүүе бү алыт! Тэрээндэ үгэгты! – гэбэ. Харин нүгөөдэ эхэнэр:

– Шамдашье, намдашье энэ үхибүүн бү хүртэг, хоёр болгон сабшагты! – гэжэ хэлэбэ. 27Тиихэдэнь хаан:

– Үхибүү бү сабшагты! Түрүүшын эхэнэртэ үгэгты, юуб гэхэдэ, тэрэ үнэхөөр эхэнь, – гэжэ хэлээ һэн.

28Израилиин бүхы улад зон хаанай яажа энэ хэрэг шиидхэһые дуулахадаа, үнэн зүбөөр зарга хэрэгүүдые шиидхэхэ сэсэн мэргэн ухаа Бурхан тэрээндэ үршөөгөө гэжэ ойлгожо, хааниие ехэ хүндэлжэ эхилбэ.