‏ 1 Kings 4

Соломооной түшэмэлнүүд

1Соломоон бүхы Израилиие хааншалан зонхилдог һэн. 2Тэрэнэй түшэмэлнүүд гэбэл: Цадоогой хүбүүн Азаарияа – санаартан; 3Шишаагай хүбүүд Элихоорэп ба Ахияа – бэшээшэд; Ахилүүдэй хүбүүн Ёшапаат – гүрэнэй данса хадагалагша; 4Ёядаагай хүбүүн Бэнайяа – сэрэгэй жанжин; Цадоок болон Абиатаар – санаартад; 5Натаанай хүбүүн Азаарияа – можонуудай ноёдые хинагша; Натаанай хүбүүн Забууд – санаартан, мүн хаанай зүбшэгшэ; 6Ахишаар – хаанай ордонгой эгээл ехэ түшэмэл; Абдаагай хүбүүн Адонираам – ясагай түлөө харюусагша бэлэй. 7Хаанай ордониие эдеэ хоолоор хангаха уялгатай арбан хоёр можо ноёдые Соломоон томилжо, тэдэ тус тустаа нэгэ һарын туршада өөрын нютаг можоһоо эдеэ хоол асардаг бэлэй. 8Тэдэ ноёдые нэрлэбэл, хада уулата Эпрааим нютаг можодо Хуурай хүбүүн зонхилоо. 9Макаац, Шаалбиим, Бэт-Шээмэш, Элоон (Бэт-Ханаан) хотонуудта Бэн-Дээкэрэй хүбүүн ударидаа. 10Аруббоот, Сохоо хотонуудай, мүн Хээпэр орон нютагай түлөө Хээсэд гэгшын хүбүүн харюусалгатай һэн. 11Абинадаабай хүбүүн бүхы Напаат-Доорой түлөө харюусадаг, тэрэ Соломооной Тапаат басагатай гэрлэнхэй, Соломооной хүрьгэн бэлэй. 12Ахилүүдэй хүбүүн Баһанаа Таанаах, Мэгиддоо хотонуудай, Царэтаан хотын хажуудахи, Езрээлһээ доошоо, Бэт-Шэһаанһаа Абээл-Мэхолаа, Ёкмэһаамай нүгөө тала хүрэтэр нэмжыдэг дайдын түлөө харюусалгатай байгаа. 13Бэн-Гээбэрэй хүбүүн Галаадтахи Рамоот хотые, Мэнашшээ гэгшын хүбүүн Яһиирай обог һууринуудые зонхилдог, мүн хэрэм ханатай, гуулин шэбхэнүүдтэй жаран хотонуудтай Башаандахи Аргооб нютаг можые захирдаг бэлэй. 14Иддоогой хүбүүн Ахинадааб Маханааим нютаг дайдын түлөө харюусагша һэн. 15Ахимаац Напталии можо нютагые зонхилдог, Соломооной басаган Басэмаат һамгатай байгаа. 16Хушай гэгшын хүбүүн Баһанаа Ашээр можо нютагта, мүн Бэалоодто захирагша һэн. 17Паруаахай хүбүүн Ёшапаат Иссахаар можо нютагта зонхилоо. 18Элаагай хүбүүн Шимэй Бэньямиинэй можо нютагта захиран һуугаа. 19Үрии гэгшын хүбүүн Гээбэр эмоор яһатанай хаан Сиһооной, мүн Башаанай хаан Оогой ажаһуугша Галаад нютагта зонхилоо. Нэгэл тушаалтан орон нютагай түлөө харюусагша бэлэй.

Соломооной хан түрын һүр жабхалан

20Иуда болон Израилиин арад зон тэрэ үедэ далайн эрьеын элһэн мэтэ тоолошогүй олон болотороо үдэжэ, баян садхалан, жаргалтай хүхюу ажаһуугаа.

21Евфрат мүрэнэй болон Пилишт орон нютагай хоорондуур оршодог, Египет хүрэтэр нэмжыгшэ дайдануудай хан түрэнүүдые Соломоон зонхилон ажаһуугаа. Тэдэ хан түрэнүүд Соломооной амиды мэндэ сагта үргэлжэ ясаг түлэжэ байгаа. 22Соломооной хүреэлэнгэй үдэр бүриин хүнэһэн гэбэл, гушан кооро сагаан талхан, жаран кооро хара талхан, 23талха таряагаар тэжээһэн арбан, бэлшээреэр адуулһан хорин эбэртэ бодо мал, зуун хонин, буга, зээрэн, гүрөөһэнүүд, тарган тобир галуу тахяанууд бэлэй. 24Евфрат мүрэнэй зүүн эрьеын бүхы хан түрэнүүдые, Типсаахһаа эхилээд, Гааза хүрэтэр бүхы газар дайдые тэрэ зонхилжо, тойроод байгааша орон нютагуудтаяа эбтэй эетэй ажамидараа. 25Даанһаа Бэһээр-Шээбэ хүрэтэр нэмжыдэг газар дайдатай Иудын болон Израилиин зон Соломооной амиды байгаа сагта ажана амгалан, өөрын үзэмэй модоной һөөгүүд, инжир модод дороо ажаһуугаа. 26Соломоондо дүшэ мянган хүллэдэг морид, арбан хоёр мянган унаха морид бии һэн.

27Можо нютагай ноёд өөр өөрын һарада Соломоон хаанда бүхы эдеэ хоолынь дутамаггүй асардаг бэлэй. 28Моридыень ешмээн, һолоомоор тэдэ жэншэдгүй хангаа.

Соломооной агууехэ мэргэн ухаан

29Бурханай хайраар Соломоон сэсэн мэргэн, угаа ехэ эрдэмтэй, хизааргүй ухаатай байгаа. 30Зүүн зүгэй сэсэн мэргэшүүлһээ, Египедэй сэсэшүүлһээ тэрэ һураггүй дээгүүр мэргэн ухаатай һэн. 31Эзраахай Этаанһаа, Махоолой хүбүүд Һэмаан, Халкоол, Дардааһаа, юрэдөө, бүхы зонһоо тэрэ сэсэн мэргэн, хаяа хадхаад ажаһуугша орон нютагуудай уладта тэрэ алдаршаад байгаа. 32Соломоон гурба мянган мэргэн үгүүлэл бэшээ, мянгаад дуу зохёогоо. 33Ургамал модон тушаа – Ливаанай үнэтэ хуша модонһоо эхилээд, хана дээгүүр ургадаг ногоон тухай, амитад, жэгүүртэн, мүлхидэг хорхой, загаһа жараахай тухайшье тэрэ үгүүлэгшэ һэн. 34Дэлхэйн хаашуул тэрэнэй сэсэн мэргэн тушаа дуулажа, мэргэн үгэнүүдыень шагнахыень хүнүүдые зорюута эльгээдэг бэлэй.