1Ki 7 | BxrBBL2024 | STEP | Соломоон хаан өөрынгөө ордониие арбан гурбан жэлэй туршада баряа бэлэй.

‏ 1 Kings 7

Хаанай ордон барилга

1 Соломоон хаан өөрынгөө ордониие арбан гурбан жэлэй туршада баряа бэлэй. 2 – 3 Зуун тохой утатай, табин тохой үргэнтэй, гушан тохой үндэртэй энэ ордониие тэрэ Ливаанай үнэтэй хуша модоор баряа һэн. Арбан табан хуша модон бахананууд нэгэ шугам бүридүүлжэ, дүн хамта иимэ дүрбэн шугам, бүхыдөө дүшэн табан бахана, ордоной хуша модон хушалта баряад байгаа. 4 Гурбан шугам сонхонууд, табсангууд тала бүхэндэ бии һэн. 5 Тала бүхэндэ гурбан үүдэн байгаа, тотогонуудынь дүрбэн табсантай бэлэй. 6 Ордон руу орохо талада баханануудые һарабшатайнь хамта тэрэ хээ, ордон руу ороходо, табин тохой утатай, гушан тохой үргэнтэй заал тэрэ баряа. 7 Соломооной хан шэрээ нүгөөдэ заал соо һэн. Тэндэ һуужа, тэрэ зарга хэрэгүүдые шиидхэдэг байгаа. Тэрэ таһалга досоогоо булта үнэтэ хуша модоор хушагданхай бэлэй. 8 Соломооной ажаһуудаг таһалганууд зарга хэрэгүүдые шиидхэдэг таһалгаһаа ондоо тээ оршодог, гэбэшье тон адляар баригданхай һэн. Һамгандаа, фараоной басаганда, ордон барихадаа, тэрэ мүн лэ заал мэтээр бүтээгээ һэн. 9 Доодо талаһаа эхилээд хушалта хүрэтэрөө ордонгууд болон гадаада хашаанууд тааралдуулан сабшаһан, мэлигдэһэн үнэтэ эрхим шулуугаар бүтээгдээ. 10 Байшангай һуурида үнэтэй, һайн шанартай найма-арбан тохой ута мантан шулуунууд табигдаа. 11 Дээгүүрнь хэрэгтэй хэмжүүрээр сабшагдаһан үнэтэ шулуунууд болон хуша модон табигдаа. 12 Соломоон ехэ хорёое барихадаа, шулуун гурбан шугам, хуша модоор шугам, тиигээд дахин иигэжэ дабтажа баряа. Эзэнэй Һүмын дотор хорёо, заалай хашаа тон лэ иимээр хэгдээ.

Эзэнэй Һүмэдэ зорюулһан түмэршэ дархан Хираамай бүтээлнүүд

13 – 14 Тиир хотодо гуулин хэрэгсэлнүүдые бүтээхэдээ шадамар нэгэ хүнэй Хираам гэжэ хүбүүн эсэгынгээ наһа барахада дархан дүрыень халан абаһан байгаа. Тэрэнэй эхэнь Напталии обогой бэлэй. Соломоон хаан Тиир хотоһоо тэрэ Хираамые дуудажа, элдэб хэрэгсэлнүүдые бүтээлгэбэ.

Хоёр гуулин бахана

15 Хираам арбан найман тохой үндэртэй, арбан хоёр тохой үргэнтэй хоёр гуулин бахана бүтээбэ. 16 Табан тохой үндэртэй хоёр зузаан хушалта тэрэ бүтээжэ, бахананууд дээрэ табиба. 17 Тэдэ зузаан хушалтанууд гэнжэ мэтээр хэгдэнхэй долоон шугам угалзануудаар шэмэглэгдээ. 18 Угалзанууд дээгүүр хоёр шугам алим мэтэ угалза тэрэ хэбэ. 19 Нангин үргөөгэй үүдэнэй урдахи таһалга соо бахананууд дээрэ дүрбэн тохой үндэртэй бадма сэсэг дүрсэтэй хушалта тэрэ бүтээгээ бэлэй. 20 Эдэ баханануудай оройдохи гэнжын дэргэдэ байгша сахаригуудай хажууда хоёр зуун сэмбэрүү сэсэгээр шэмэглэл тойроод хэгдэбэ. 21 Хираам хоёр бахана Һүмын гол үүдэнэй хоёр талаар табижа, баруун талын баханые Яхиин, зүүн талынхиинь Бооһаз гэжэ нэрлэбэ. 22 Баханануудай оройдо бадма сэсэг шэмэглэл хэбэ. Иигэжэ бахана бодхоохо ажал дүүрэбэ.

Гуулин далай

23 Хираам гуулин түмэрөөр томо түхэреэн амһарта бүтээжэ, Далай гэжэ нэрлэбэ. Утаашаа тэрэ арбан, гүнзэгынь табан, тойруулан гушан тохой хэмжүүртэй һэн. 24 Тэрэ далайн эрмэг тойруулан сэсэгын далбаа мэтэ шэмэглэлнүүд хэгдээ. Арбан тохой хэмжүүртэй далайе тэдэ хоёр шугамаар бүһэлжэ, далайтай нэгэн ниитэ мэтээр шудхаатай байгаа. 25 Тэрэ далай арбан хоёр шудхамал буха дээрэ тодхоотой: гурбаниинь хойто зүг руу, гурбаниинь баруун, үшөө гурбан урда, мүн лэ гурбан зүүн зүгүүд руу харанхай бэлэй. Далай тэдээн дээрэ табяатай, бухануудай уусанууд досоошоо, түб руугаа эрьенхэй байгаа. 26 Далайн амһартын хана альганай шэнээн зузаан, захань аягын эрмэгтэл, һалбарһан бадма сэсэг мэтээр надхаад байна. Тэрэ далай хоёр мянган баата уһанай багтаамжатай байгаа.

Гуулин табюурнууд

27 Удаань тэрэ гуулин арбан табюур хэбэ. Табюур бүхэн дүрбэн тохой ута, тон тиимэ хэмжүүр үргэн, гурбан тохой ута һэн. 28 Табюурнууд забһартай, хүреэлэнгүүдтэй. 29 Тэрэ хүреэлэнгүүд дээрэ арсалан, үхэр, херүүбэй дүрсэнүүд һиилээтэй. Доогуурнь сэсэг угалза һиилээтэй. 30 Табюур бүхэн дүрбэн гуулин мөөртэй, дүрбэн тулгууртай. Угаалгын һабанууд доро сэсэг мэтэ угалзанууд бии. 31 Орой дээрэхи титимэй дотор амһарынь нэгэ тохой, баханын табсандал адли монсогор, нэгэ хахад тохой забһартай, угалзатай. Тэрэ багахан шаар дүрбэлжэн дугы соо оршоно. 32 Мөөрнүүд болон тулгуурнууд тэрээн доро һэн. Мөөрнүүд нэгэ хахад тохой үндэр бэлэй. 33 Мөөрнүүд тэргын мөөртэл адли шудхамал һэн. 34 Табюур бүхэнэй дүрбэн углуугаар – дүрбэн табсан. 35 Табюур бүхэн дээрэ хахад тохой үндэр, монсогор, гэбэшье барюулнуудтай шаар байгаа. 36 Тэрэ шаарнууд, барюулнууд дээгүүрнь тэрэ херүүбүүдые, арсалангуудые, пальмануудые, һалбарһан сэсэг угалзануудые һиилэбэ. 37 Иигэжэ тэрэ арбан табюур бүтээгээ: бултадаа аб адли хэмжүүртэй, түхэл янзатай һэн. 38 Тиигээд тэрэ арбан тогоо гуулин түмэрөөр бүтээбэ. Тогоон бүхэн дүшэн баата уһанай багтахаар, дүрбэн тохой үргэнтэй, тэрэ табюурнууд дээрэ тодхогдоо бэлэй. 39 Һүмын баруун талада табан табюур, зүүн таладань мүн лэ табан табюур, зүүн-урда талада Далай амһарта тэрэ табиба.

Эзэнэй Һүмын хэрэгсэлнүүдэй юрэнхы жагсаал

40 Хираам тогоо, хүрзэхэнүүдые, сүршэхэ аягануудые дархалба. Хираам Соломоон хаанай захиралтаар Эзэнэй Һүмэдэ хэжэ байгааша бүхы ажалаа дүүргээ бэлэй. Тэрэнэй бүтээһэн хэрэгсэлнүүдые онсолон дахин нэрлэбэл: 41 хоёр бахана; бахананууд дээрэ табюур; тэдэ табюурнуудые хушаһан шүүмэр; 42 шүүмэрнүүд дээрэ дүрбэн зуун бамбаруу сэсэг, хоёр шугамаар шүүмэр бүхэн дээрэ; 43 арбан табюур ба тэдээн дээрэ угаалгын арбан һаба; 44 нэгэ далай, мүн далайе тэлэн үргэгшэ арбан хоёр буха; 45 тогоо, хүрзэхэнүүдые, сүршэхэ һабануудые тэрэ хээ. Соломоон хаанай захиралтаар Эзэнэй Һүмэдэ зорюулаатай эдэ бүхы хэрэгсэлнүүдые Хираам гуулин мэлигэр түмэрөөр хээ бэлэй. 46 Иордан голой хажууда, Суккоот Царэтаан хоёрой хоорондо шабар дүрсэнүүд руу гуулин шудхан тэдэ бүтээлнүүд хаанай захиралтаар бүтээгдээ һэн. 47 Эдэ хэрэгсэлнүүд угаа олон һэн, тиимэһээ Соломоон тэдэниие хэмжээгүй, хэды шэнээн гуулин түмэрэй гаргашалагдаһые мэдэхын аргагүй байгаа бэлэй. 48 Эзэнэй Һүмын үшөө бусад хэрэгсэлнүүдые Соломоон хаан дархалуулба: үргэлэй алтан шэрээ, Эзэнэй урда табигдадаг талхан үргэлэй шэрээ; 49 хамагай нангин газарай урда табиха дэнгүүдые (табыень хаалгын баруун талада, табыень хаалгын зүүн талада) сэбэр алтаар; сэсэгүүдые, дэнгүүдые, хабшуурнуудые; 50 сэбэр алтаар аяга табагуудые, хайша, сүршэдэг аяга, уталгын амһарта, бойпуурнуудые, хайруул. Хамагай нангин газар руу ородог дотор үүдэнүүдэй хэрэгсэлнүүдые, мүн Һүмын гол таһалгын үүдэнүүдэй хэрэгсэлнүүд алтаар хэгдэнхэй байгаа. 51 Эзэнэй Һүмэ барилгын ажалай дүүрэһэнэй удаа Соломоон Давид эсэгынгээ Бурханда зорюулан үргэһэн алта, мүнгэ, эд зүйлнүүдые Эзэнэй Һүмын эрдэниин сан руу оруулан хадагалба.