‏ 1 Kings 15

(2 Уг 13:1-2, 22–14:1)

1Набаадай хүбүүн Еробоһаамай арбан наймадахи жэлээ хааншалжа байха үедэ Абияам Иудын хаан болоһон юм. 2Тэрэ гурбан жэлэй туршада Иерусалимда зонхилоо. Эхэнь Абшалоомой басаган Маһахаа бэлэй. 3Абияам эсэгынгээ урид үйлэдэһэн нүгэлнүүдые дабтажа, элинсэг эсэгэ Давидтал адляар Эзэн Бурхандаа үнэн сэхэ байгаагүй. 4Теэд Давидай аша габьяа хараада абан, Эзэн Бурханиинь хааншалха хүбүү тэрээндэ үршөөжэ, Иерусалимые амгалан бата байдалтай болгоод байгаа. 5Ушар юуб гэбэл, Давид Эзэндэ таатай хэрэг үйлэдэдэг, һургаал заабаринуудыень амиды мэндэ сагтаа хододоо сахин ябаа. Нэгэл дахин тэрэ хээт хүн Урияа гэгшэтэй муу юумэ хэһэн ааб даа. 6Рэхобаам Еробоһаам хоёрой амиды мэндэ сагтаа хододоо дайлалдан байгаашань Абияамай үе сагта мүн лэ үргэлжэлөө. 7Абияамай бусад бүхы хэрэгүүд Иудын хаашуулай угай бэшэг соо тунхаглагданхай. Абияам Еробоһаамтай дайлалдаа. 8Абияам наһа баража, Давидай хото соо тэрэниие элинсэг хулинсагуудтайнь хамта хүдөөлүүлбэ. Орондонь Асаа хүбүүниинь хаан шэрээдэ заларба.

Иудын хаан – Асаа

9Израилиин хаан Еробоһаамай хоридохи жэлээ хааншалан байха үедэ Асаа Иудын хаан болоһон юм. 10Дүшэн нэгэн жэлэй туршада тэрэ Иерусалимда хааншалаа. Хүгшэн эжынь хадаа Абшалоомой басаган Маһахаа бэлэй. 11Элинсэг эсэгэ Давидтал адли, Асаа Эзэндэ таатай хэрэгүүдые эрхилэн байгаа. 12Тэрэ янхан эхэнэр болон эрэшүүлые орон нютагһаа үлдэжэ гаргаа, эсэгэнэрэйнгээ бүтээгшэ онгонуудые зайлуулба. 13Ашэраа бурханай хүрэг бүтээлгэһэнэйнь тула Маһахаа гэдэг хүгшэн эжыгээ хатанай нэрэ хүндэһөө буулгаа бэлэй. Асаа тэрэ хүрэгыень бута сабшуулжа, Кидроон горхоной хажууда шатаалгаба. 14Мүргэлэй бүхы обоонуудые үгы хээгүйшье һаа, Асаа бүхы наһандаа Эзэндэ үнэн сэхэ байгаа. 15Өөрөө Бурханда зорюулжа, мүн эсэгынгээ Бурханда зорюулһан мүнгэ, алта болон һүмын хэрэгсэлнүүдые Эзэнэй Һүмэ руу тэрэ оруулжа табяа һэн. 16Иудын хаан Асаа ба Израилиин хаан Баһашаа бүхы наһаараа дайсад байгаа. 17Израилиин хаан Баһашаа Иудын хан түрэдэ добтолон орожо, Асаагай хан түрэ руу хэнэйшье нэбтэрэн орохогүйн, мүн тэндэһээ хэнэйшье гарахагүйн тула Рамаа хото бүхэлжэ эхилбэ. 18Эзэнэй Һүмэ соо болон хаанай ордон соо үлөөшэ алта мүнгэ Асаа абажа, түшэмэлнүүдээрээ Дамааск руу, Араамай хаан, Хэзиһооной аша хүбүүн, Табриммооной хүбүүн Бэн-Һадаадта эльгээжэ, иигэжэ хэлэхые захирба: 19«Танай болон минии эсэгэнэрэй хоорондохи хэлсээндэл адли хэлсээ хоорондоо баталхые дурадханаб. Анхарыт, танда мүнгэ, алта эльгээбэб. Израилиин хаан Баһашаатай хэлсээгээ болюулжа, намһаа һалан ошохыень баадхыт».

20Бэн-Һадаад Асаа хаанай үгэ анхаржа, Израилиин хотонуудта добтолхыень сэрэгэйнгээ дарганарые эльгэбэ. Сэрэгшэдынь Ийон, Даан, Абээл-Бэт-Маһахаа, бүхы Хиннээрэт ба Напталиигай бүхы газар дайда эзэлбэ. 21Энээн тушаа дуулахадаа, Баһашаа Рамаа хотые бүхэлхэеэ болёод, Тирцаа руу бусаба. 22Асаа хаан нэгэшье хүниие үлөөнгүйгөөр Иудын бүхы зониие дуудажа, Баһашаагай Рамаа хото барихадаа хэрэглэжэ байгааша бүхы модо шулууе хотоһоо гаргуулба. Тиигээд тэрээгээр Бэньямиинэй газар дээрэхи Гээбэ хотые ба Мицпаа хотые барюулба. 23Асаа гэгшын бусад хэрэгүүд, бүхы баатаршалганууд, баригша хотонууд тушаань Иудын хаашуулай угай бэшэг соо бэшээтэй. Үбгэн наһандаа тэрэ хүл муутай болоһон бэлэй. 24Асаа наһа баража, элинсэг эсэгэ Давидай хото соо хүдөөлүүлэгдэбэ. Орондонь Ёшапаат хүбүүниинь хаан шэрээдэ заларба.

Израилиин хаан – Надааб

25Иудын хаан Асаа гэгшын хоёрдохи жэлээ хааншалан байхада Еробоһаамай хүбүүн Надааб Израилиин хаан болоһон юм. Тэрэ Израилиие хоёр жэл соо хааншалаа. 26Израилиие нүгэлдэ оруулһан эсэгынгээ нүгэл бүри олошоруулан, Эзэндэ таагүй хэрэг тэрэ хэдэг байгаа.

27Иссахаарай обогой Ахияагай хүбүүн Баһашаа урдаһаань нюуса хэлсээ ябуулжа, Израилиин бүхы зонтой хамта Пилиштын Гиббэтоон бүһэлжэ байхадань Надаабые алажархиба. 28Иудын хаан Асаа гэгшын гурбадахи жэлээ хааншалжа байхада Баһашаа тэрэниие алаһан болоно. Тиигээд тэрэ орондонь хаан шэрээ эзэлбэ. 29Хаан шэрээдэ залархадаа, тэрэ Еробоһаамай бүхы гэр бүлые усадхаба, нэгэшье хүниие амиды үлөөбэгүй. Иигэжэ Өөрынгөө богоолоор, Шилооной Ахияагаар дамжуулан айладаһан Эзэнэй үгэ хүсэлдэбэ. 30Энэ юундэ тохёолдооб гэхэдэ, Еробоһаам Израилиие нүгэлдэ оруулаа, өөрөөшье нүгэл хээ, Израилиин Эзэн Бурханиие ехэ уурлуулаа. 31Надаабай бусад хэрэгүүд Израилиин хаашуулай угай бэшэг соо бэшээтэй. 32Иудын хаан Асаа ба Израилиин хаан Баһашаа амиды мэндэ сагтаа хододоо хоорондоо дайлалдажа байгаа.

Израилиин хаан – Баһашаа

33Иудын хаан Асаа гэгшын гурбадахи жэлээ хааншалан байха сагта Ахияагай хүбүүн Баһашаа бүхы Израилиие зонхилдог болобо, хорин дүрбэн жэлэй туршада тэрэ Тирцаада хааншалаа. 34Эзэндэ таагүй хэрэгүүдые хэжэ, Израилиие нүгэлдэ оруулһан Еробоһаамай жэшээ даган тэрэ ябаа.