‏ 1 Kings 16

(2 Уг 14:2-3; 15:16–16:6, 11-14)

Баһашаагай удам хаан шэрээһээ бууха гэжэ Еһүү лүндэншэ зүгнэнэ

1Эзэн Ханааниин хүбүүн, лүндэншэ Еһүүгээр дамжуулан Баһашаада иигэжэ айладаһан байна: 2«Ши хэншье бэшэ байгааш, харин Би шамайе Израиль арадайнгаа удамарша болгоо һэм. Харин ши Еробоһаамай жэшээ даган, Минии арад болохо Израилиие нүгэлдэ оруулжа, Намайе уурлуулбаш. 3Набаадай хүбүүн Еробоһаамай гэр бүлэтэй юу хээ һэмбиб, тон тиимэ юумэ шинии гэр бүлэтэй хэхэб, шатаан үгы хэхэб. 4Гэр бүлыншни хэн нэгэн хото соо наһа бараа һаа, нохойнуудта һэень эдюулэгдэхэ; хэн хүдөө үхэбэл, огторгойн жэгүүртэндэ тоншуулан үгы хэгдэхэ». 5Баһашаа гэгшын бусад хэрэгүүд, баатаршалганууд Израилиин хаашуулай угай бэшэг соо бэшээтэй. 6Баһашаа наһа баража, Тирцаада элинсэгүүдэйнгээ булашада хүдөөлүүлэгдэбэ. Орондонь Элаа хүбүүниинь хаан шэрээдэ заларба. 7Баһашаа гэгшын гэр бүлэ тушаа, Эзэнэй урда ямар нүгэл хэһэн тушаань, Еробоһаамай бүлэдэл адли хэрэгүүдээрээ Эзэниие уурлуулдаг тухайнь, мүн юундэ усадхагдаһан тушаань Ханааниин хүбүүн, лүндэншэ Еһүүгээр дамжуулан Эзэн айладхаа.

Израилиин хаан – Элаа

8Иудын хаан Асаа гэгшын хорин зургаадахи жэлээ хааншалан байхада, Баһашаагай хүбүүн Элаа Израилиин хаан боложо, Тирцаада хоёр жэл зонхилоо. 9Түшэмэлынь, тэрэнэй тэргэтэ сэрэгэй хахадыень захирдаг жанжин Зимрии урдаһаань нюуса хэлсээ ябуулба. Нэгэтэ Тирцаада хаанай ордоной түлөө харюусадаг Арцаа гэгшын гэртэ Элаа хаанай үзэмэй дараһан архи уужа һогтоод байхада, 10Зимрии орожо ерээд, тэрэниие алажархиба. Тиигээд тэрэ орондонь хаан шэрээдэ һууба. Энэ болбол Иудын хаан Асаа гэгшын хорин долоодохи жэлээ хааншалан байхада болоо бэлэй. 11Зимрии хаан болоходоо, Баһашаа гэгшын бүхы гэр бүлэ дууһан усадхаба. Бүхы эрэгтэй зониинь, түрэлхидынь, нүхэдыньшье алуулаа бэлэй. 12Еһүү лүндэншөөр дамжуулан, Баһашаа тушаа Эзэнэй айладхалай ёһоор, Зимрии бүхы гэр бүлынь хюдаа һэн. 13Баһашаагай, Элаа хүбүүнэйнь хэһэн нүгэлэй, Израилиин уладые нүгэлдэ оруулһанайнь түлөө, онгонуудаараа Израилиин Эзэн Бурханиие уурлуулһанайнь түлөө эдэ бүгэдэ тохёолдоо. 14Элаа гэгшын бусад хэрэгүүд Израилиин хаашуулай угай бэшэг соо бэшээтэй.

Израилиин хаан – Зимрии

15Иудын хаан Асаагай хорин долоодохи жэлээ ханшалан байхада Зимрии хаан шэрээ эзэлжэ, долоон хоногой туршада Тирцаада хааншалаа. Израилиин сэрэг Пилиштын Гиббэтооной урдаһаа хотон хүреэнээр бүһэлэн буугаад байгаа. 16Зимрии нюуса хэлсээ ябуулжа, хааниие алаа гэжэ дуулахадаа, тэдэ бултадаа сэрэгэй жанжин Омриие тэрэл үдэртөө, хотон хүреэн соогоо Израилиин хаан болгобо. 17Омрии болон Израилиин сэрэг Гиббэтоониие орхижо, Тирцаа руу ошожо, добтолбо. 18Хотын эзэлэгдэһые Зимрии мэдэхэдээ, хаанай ордоной саада таһалга руу ороод, хаанай ордон галдан шатаажа, өөрөө тэрэ галда үхэбэ. 19Юундэ энэ болооб гэхэдэ, тэрэ нүгэл хэжэ, Еробоһаамай жэшээ даган, Израилиин улад зониие нүгэлдэ оруулжа, Эзэндэ таагүй хэрэгүүдые үйлэдөө. 20Зимриигэй бусад хэрэгүүд, ябуулһан нюуса хэлсээниинь Израилиин хаашуулай угай ном соо бэшээтэй.

21Тиигээд Израилиин арад түмэн хоёр хэһэг болон хубаарба: хахадынь Гинаадай хүбүүн Тибнии гэгшые, нүгөөдэ хахадынь Омриие хаан болгохо дуратай байба. 22Омриин түлөө байһан хахадынь диилэбэ. Тибнии хосорбо, Омрии хаан болобо.

Израилиин хаан – Омрии

23Иудын хаан Асаа гэгшын гушан нэгэдэхи жэлээ хааншалан байхада Омрии Израилиин хаан боложо, арбан хоёр жэлэй туршада хааншалба. Түрүүшын зургаан жэл тэрэ Тирцаада хааншалаа. 24Тэрэ зургаа мянган хэһэг мүнгөөр Самариин хадые Сээмэр гэжэ хүнһөө худалдан абажа, хада бүхэлэн, хото баряад, хадын эзэн байһан Сээмэрэй нэрээр тэрэ хотые Самария гэжэ нэрлэбэ. 25Омрии Эзэндэ таагүй хэрэгүүдые хэдэг байба, урдань байгааша зонһоо бүри муу үйлэ хэрэгүүдые ябуулба. 26Набаадай хүбүүн Еробоһаамай жэшээ даган, тэрэ Израилиин уладые нүгэлдэ оруулжа, онгонуудые бүтээжэ, Израилиин Эзэн Бурханиие уурлуулаа. 27Омриин бусад хэрэгүүд, баатаршалгануудынь Израилиин хаашуулай угай ном соо бэшээтэй. 28Омрии наһа баража, Самарида элинсэгэйнгээ булашада хүдөөлүүлэгдэбэ. Орондонь Ахааб хүбүүниинь хаан шэрээ эзэлбэ.

Израилиин хаан – Ахааб

29Иудын хаан Асаа гэгшын гушан наймадахи жэлээ хааншалан байхада Омриин хүбүүн Ахааб хаан болоһон байна. Тэрэ хорин хоёр жэлэй туршада Израилиие Самарида зонхилон байгаа. 30Омриин хүбүүн Ахааб урдань байгааша зонһоо бүри таагүй хэрэгүүдые Эзэнэй урда хэдэг байгаа. 31Набаадай хүбүүн Еробоһаамай нүгэлые даган байхань багадаад, тэрэ Сидооной хаан Этбаалай басаган Изээбэлые һамга абажа, Баалда мүргэдэг болобо. 32Тэрэ Самарида Баалда мүргэдэг байшан барижа, Баалда зорюулһан үргэлэй шэрээ тэрээн соо байгуулба. 33Ахааб Ашэраа бурханай дүрсэ бүтээбэ. Урдань байгааша Израилиин хаашуулһаа бүри үлүүгээр тэрэ Израилиин Эзэн Бурханиие уурлуулаа һэн. 34Ахаабай хаан байха үедэ Бэт-Ээлэй Хиһээл Ерихоон хотые дахин бариба. Ерихооной үндэһэ һуури табижа байхадаа, тэрэ Абираам гэжэ ууган хүбүүгээ алдаба, ажалай эсэстэ, хотын хаалгануудые дүүргэжэ байхадаа, тэрэ Сэгүүб ▼

▼ Хара Нүүн 6:25.

гэжэ одхон хүбүүгээ алдаба. Иигэжэ Нүүнэй хүбүүн Иисүүсээр дамжуулһан Эзэнэй айладхал бэелбэ.