‏ 1 Kings 2

(1 Уг 29:26-28)

1Давид наһа бараха сагайнгаа дүтэлхэдэ, Соломоон хүбүүндээ иимэ һургаал заабари хэлэбэ:

2– Бултанай мордохо замаар миниишье мордохо саг дүтэлбэ. Ши хадаа бата найдамтай, эрэ хүндэл бай. 3Юушье хэбэл, хаанашье ябабал, амжалта туйлахын тула Өөрын Эзэн Бурханиие шүтэн ябаарай. Моисейн хуули соо бэшэгдэһэн Эзэнэй хуули ёһо, зарлигуудые, тогтоол, һургаалнуудые сахин байгаарай. 4Тиигэбэлшни, «үри һадаһадшни Намда үнэнхэ зүрхэнһөө шүтэн, бүхы шадалаараа Минии һургаал заабаринуудые дүүргэн байгаа гээшэ һаа, Израилиин хан шэрээ хододоо эзэлдэг байха» гэжэ намда айладаһан найдуулгаяа Эзэн бэелүүлхэ. 5Үшөө Нээрэй хүбүүн Абнээр, Етээрэй хүбүүн Амасаа гэгшэдтэ – Израилиин хоёр жанжинда Цэруяагай хүбүүн Ёһаабай юу хэһые һанана ёһотойш. Амгалан тайбан байдалай тогтоод байхада тэрэ дайнай үедэ мэтэ тэдэниие алаа бэлэй. Гарынь тэдэнэй шуһанда зууралданхай. 6Тиимэһээ ши мэргэн ухаагаараа бодожо, өөрын үхэлөөр тэрэниие бү үхүүлээрэй. 7Галаад нютагай Барзиллай гэдэг хүнэй хүбүүдтэ хайра үзүүлжэ, шамтай хамта эдеэ хоол баридаг зоной дунда һуулгаарай. Абшалоом ахаһааш тэрьедэн байха үедэм тэдэ намда туһалһан юм. 8Бэньямиин обогой Бахуриим хотын Гэраагай хүбүүн Шимэй гэдэг үшөө бии. Минии Маханааим ошожо ябахада, тэрэ намайе хараажа байгаа һэн. Гэбэшье Иордан гол дээрэ нам руу ерэхэдэнь, би тэрээндэ «Шамайе усадхахагүйб» гэжэ Эзэнэй нэрээр тангариглаа һэм. 9Харин ши сэсэн ухаатай хүнши, тиимэһээ тэрэниие миин бү табяарай, усадхаха хэрэгтэй гэжэ мэдэжэ байнаш.

10Иигэжэ Давид наһа баража, Давидай хото соо хүдөөлүүлэгдөө һэн. 11Давид дүшэн жэлэй туршада Израилиин хаан байгаа: долоон жэл соо Хэброондо, гушан гурбан жэл – Иерусалимда. 12Соломоон Давид эсэгынгээ хаан шэрээ эзэлжэ, хаан засагаа бахим бариба.

Адонияае хюдалга

13Нэгэтэ Хаггиидэй хүбүүн Адонияа Соломооной эхэ Бат-Шээбэдэ ерэбэ.

– Һайе һанажа ерэбэ гүш? – гэжэ Бат-Шээбэ асууба.

– Амгалан һайе, – гэбэ тэрэ, – 14Тантай би нэгэ хэрэг тухай хөөрэлдэхэ һанаатай ерээб.

– Теэд хэлыш тэрэнээ, – гэбэ Бат-Шээбэ.

15– Хан түрэ минии болохо ёһотой гэжэ Израилиин зон һанажа, намайе ерээдүй хаан гээд тоолодог байгаа. Харин ондоогоор хэрэг эрьежэ, минии дүү хүбүүн хаан болобо. Энэ хадаа Эзэн иигэжэ шиидээ! 16Мүнөө би нэгэл юумэн тухай гуйха һанаатайб, – гэжэ Адонияа үгүүлбэ.

– Хэлэ, – гэбэ Бат-Шээбэ.

17– Шүнээмэй Абишаагые намда һамган болгожо үгэхэ тухай Соломоон хаантай хөөрэлдэжэ үгыт, тэрэ танда арсахагүй шуу, – гэбэ тэрэ.

18– Зай, би шинии гуйлта тушаа хаанда дуулгахаб, – гэжэ Бат-Шээбэ харюусаба.

19Иигэжэ Адонияа тухай хөөрэлдэхэеэ Бат-Шээбэ Соломоон хаанда ерэбэ ха. Хаан урдаһаань бодожо, доро дохёод, хан шэрээдээ һууба. Хаанай эхэдэ мүн лэ шэрээ асарагдажа, Бат-Шээбэ Соломооной баруун талада һууба. 20Бат-Шээбэ:

– Би нэгэ жаахан гуйлтатайб, намда бү арсыш, – гэбэ. Хаан:

– Эжымни, гуйгыт, би танда арсахагүйлби, – гэбэ ха. 21Бат-Шээбэ:

– Шүнээмэй Абишаагые Адонияа ахадаа һамган болгон үгыш даа, – гэбэ. 22Соломоон харюудань:

– Адонияада Шүнээмэй Абишаагые үгэхэ тухай юундэ гуйбат?! Минии аха һэн тулань нэгэ мүртөө тэрээндэ хаан түрыешье гуйгыт! Абиатаар санаартан, Цэруяагай хүбүүн Ёһаабшье тэрэнэй тала барина бэшэ аал?! – гэжэ хэлэбэ. 23Удаань Соломоон хаан Эзэнэй урда тангариглан:

– Иимэ үгэнүүдые хэлэхэдээ, Адонияа өөрынгөө ами наһанда өөрөө харша юумэ хээгүй һаань, Бурхан намайе шиидхүүжэг! – гэбэ, – 24Минии эсэгэ Давидай хан шэрээ дээрэ Эзэн намайе бата найдамтайгаар заларуулаа, айладхалайнгаа ёһоор хан түрые намда үршөөгөө. Амиды мэндэ Эзэнэй нэрээр тангаригланаб – Адонияа энэ дары үхэхэ ёһотой!

25Тиигээд Соломоон хаан Ёядаагай хүбүүн Бэнайяа гэгшые эльгээжэ, тэрэнь Адонияае усадхаба.

Абиатаарые сүлэлгэ

26Абиатаар санаартанда хаан:

– Анатоот хото руу, таряалан руугаа яба! Үхөө һааш, зохистой байгаа, гэбэшье мүнөө шамайе алахагүйб, юуб гэхэдэ, минии эсэгэ Давидтай хамта ябахадаа, Эзэн Бурханай ханза харууһалжа ябааш, эсэгэтэймни хамта гай гасалангуудые амасааш, – гэбэ. 27Иигэжэ Соломоон Абиатаарые Эзэнэй урда тахил үргэлнүүдые хэдэгһээ болюулжа, Эзэнэй Элиин үри һадаһад тушаа Шилоодо айладхаһаниинь гүйсэбэ.

28Энээн тушаа Ёһааб дуулажа, Эзэнэй Һүмэ руу гүйдэлөөрөө ошоод, үргэлэй шэрээгэй эбэрнүүдтэ аһалдаба (тэрэ Абшалоомой бэшэ, Адонияагай тала баридаг байгаа бшуу). 29Ёһаабай Эзэнэй нангин майхан руу тэрьедэжэ ошоһон, үргэлэй хажууда байһан тушаа Соломоон хаанда дуулдаба. Ёядаагай хүбүүн Бэнайяа гэгшые Соломоон эльгээжэ:

– Ошожо, тэрэниие усадха, – гэбэ. 30Бэнайяа Эзэнэй нангин майхан руу ерэжэ:

– Хаан шамайе гара гээд захирна, – гэбэ ха. Ёһааб:

– Үгы, би эндэ үхэхэб, – гэжэ хэлэбэ. Бэнайяа Ёһаабай хэлээшые хаанда дамжуулба. 31Хаан тэрээндэ:

– Хэлэһэнэйнь ёһоор хэ, тэрэниие алажа, хүдөөлүүлэ. Ёһаабай гэмгүй зониие алаһанай түлөө би, мүн Давидай бэшэшье үри һадаһад иигэжэ гэм зэмэгүй болохобди. 32Давид эсэгымни мэдээгүй байтар Ёһааб ямаршье зэмэгүй, өөрһөөнь һураггүй эрхим хоёр хүниие – Нээрэй хүбүүн, Израилиин жанжин Абнээрые, мүн тиихэдэ Етээрэй хүбүүн, Иудын жанжин Амасаае һэлмээр сабшан алаа һэм шуу. Эзэн энэ шуһые өөрынь толгой дээрэ буулгаха. 33Тэрэ шуһан Ёһаабай болон үри һадаһанайнь толгой дээрэ хэтэ мүнхэдөө тудан байхань болтогой! Харин хан шэрээ эзэлдэг Давидай үри һадаһадта Эзэн хэтэ мүнхэдөө амгалан байдал үршөөхэнь болтогой! – гэбэ.

34Иигэжэ Ёядаагай хүбүүн Бэнайяа ошожо, Ёһаабые алаба. Тэрэ элһэн сүл губида оршогшо гэртээ хүдөөлүүлэгдөө бэлэй. 35Соломоон хаан Ёядаагай хүбүүн Бэнайяа гэгшые Ёһаабай орондо сэрэгэй жанжин, Абиатаарай орондо Цадоогые ахамад санаартан болгобо.

Шимэйе алалга

36Тиигээд хаан хүниие эльгээжэ, Шимэй гэгшые дуудан:

– Иерусалим соо өөртөө гэр барижа, тэндээл ажамидара. Хотоһоо бү гараарай. 37Гаража, Кидроон горхо гаталаа һаа, заабол хосорхош – энээниие мэдэжэ бай. Өөрөөл зэмэтэй болохош, – гэбэ. 38Шимэй хаанда:

– Үндэр түрэлтэ эзэн хаамни, ойлгооб, танай захирһанай ёһоор байхаб, – гэбэ. Иигэжэ тэрэ Иерусалим соо удаан сагта ажамидарба.

39Гурбан жэлэй удаа Шимэйн хоёр богоол Гаадай хаан, Маһахаагай хүбүүн Ахииш руу зугадан тэрьедэбэ. Энээн тушаа зон Шимэйдэ дуулгаба. 40Шимэй зэһэжэ, элжэгэндээ мордоод, Гаат руу Ахиишта богоолнуудаа бэдэрэн ошобо. Тэдэнээ олоод, Гаатһаа асаржа һөөргөө Шимэйн бусахадань, 41зон энээн тушаа Соломоондо дуулгаба. 42Хаан хүниие эльгээжэ, Шимэй гэгшые дуудаад:

– Иерусалимһаа гарабал, заабол тэрэ үдэртөө үхэхэш гэжэ би шамда Эзэнэй нэрээр тангариглан соносхоо бэшэ аалби? «Зай» гэжэ ши намда хэлээ бэлэйш. 43Эзэнэй урда тангариглан хэлэһэн захиралтануудыемни юундэ дүүргээгүйбши? – гэбэ. 44Хаан Шимэйдэ иигэжэ хэлэбэ:

– Минии эсэгэ Давидта хэһэн бүхы муу муухай хэрэгүүдээ мэдэнэш, сүм ойлгонош. Эзэн муу муухай хэрэгүүдыеш толгой дээрэш бусаан буулгаг! 45Харин би үреэлдэ хүртэхэм болтогой! Давидай хан шэрээ Эзэнэй урда хэтэ мүнхэдөө оршохонь болтогой!

46Иигэжэ хаан Ёядаагай хүбүүн Бэнайяа гэгшэдэ захиржа, тэрэнь ошоод, Шимэй гэгшые усадхаба. Соломоон иигээд бахим гэгшээр хаан түрэеэ бариба.