1 Kings 5
(2 Уг 2:1-18)
1Тиирэй хаан Хираам Соломооной эсэгэ Давидтай хододоо нүхэсэжэ байһан юм. Эсэгынь хаан шэрээдэ һуухыень Соломооные тоһоор түрхибэ гэжэ дуулахадаа, тэрэ Соломоон руу өөрынгөө тушаалтадые эльгээбэ. 2Соломоон харюудань Хираамда иимэ мэдээсэл эльгэбэ: 3«Минии эсэгэ Давид тойроод байгша дайсадтаяа дайлалда дайлалдаһаар, Эзэнэй туһаар тэдэнээ хүл дороо гэшхээ, Эзэн Бурханайнгаа Һүмэ бариха гэһэн хүсэлөө бэелүүлжэ үрдеэгүй гээд та мэдэнэт. 4Харин мүнөө Эзэн Бурхамни маанадта ажана амгалан байдал үршөөгөө, дайсад, гасалан үгы гэхэдэ болохо. 5Шинии һүүлээр хан шэрээдэ заларан һууха хүбүүншни Намда зорюулһан Һүмэ барин бодхоохо гэжэ Эзэн Давид эсэгэдэм айладхаһан байна. Зай, тиигээд би мүнөө Эзэн Бурханайнгаа Һүмэ барижа эхилхэм. 6Теэд Ливаанай үнэтэй хуша модон намда хэрэгтэй. Тиимэ ой модо намда үгыт даа. Модо отолхо тухай албатандаа захирыт, юуб гэхэдэ, иимэ ажалда сидоонуудһаа бэшэ дүй дүрэтэй хүнүүд олдохогүй, миниишье албата зон тэрэ ажалда хүдэлүүжэн лэ. Албатанайтнай ажалай түлөө би танай хэлэһэнэй ёһоор мүнгэ түлэхэб». 7Хираам Соломооной үгэнүүдтэ ехэ баясаба, тиигээд иигэжэ хэлэбэ: – Олон тоото арадта захирха иимэ мэргэн ухаатай хүбүүе Давидта заяагша Эзэндэ магтаал үргэе! 8Тиигээд Хираам Соломоондо харюу эльгэбэ: «Шинии гуйлтые анхаралтай шагнабаб. Үнэтэй хуша модод, нарһадые үгэхэб. 9Албатамни тэрэ мододые Ливаанһаа далай хүрэтэр абаашаад, уяжа, һала хээд, танай заагша газар хүрэтэр далайн долгёор эльгээхэ. Обоолходомнай тэндэһээ абана бэзэт. Харин орондонь намда орооһо таряа үгэбэлтнай зохистой бэлэй». 10Хираам үнэтэй хуша модо, нарһадые Соломоондо хэрэгтэй хэмдэнь үгэбэ. 11Соломоон Хираамда жэл бүри хоёр мянган кооро шэниисэ, хорин кооро оливын тоһо үгэжэ байгаа. 12Эзэн найдуулһанайнгаа ёһоор сэсэн мэргэн ухаа Соломоондо үршөөжэ, Хираам Соломоон хоёр хоорондоо хэлсээ баталаад, эбтэй эетэй ажаһууба. 13Һүмэ бариха модо бэлдэхэ ажалда бүхы Израиль сооһоо гуша мянган хүнүүдые суглуулха тухай Соломоон захирба. 14Тиигээд һара бүри арба мянган зониие һэлгүүлэн, Ливаан руу ажалда эльгээдэг байба. Иигэжэ тэдэ ажалшад нэгэ һара Ливаанда ажал хээд, хоёр һарын туршада гэртээ амардаг һэн. Тэдэниие Адонираам захиран зонхилоо. 15Хада уулын шулуу сабшаха ная мянган, тэрэ хүндэ шулуун ашаа зөөхэ дала мянган хүн Соломоондо бии бэлэй. 16Ажал хүдэлмэриие хинаха гурба мянган гурбан зуун хүниие Соломоон томилон табяа һэн. 17Һүмын һуури табиха сабшаатай мантан, үнэтэй шулуун хабтануудые асарха тушаа хаан захираа бэлэй. 18Соломооной, Хираамай барилгаша зон, мүн Гэбаал хотынхид хамта хүдэлжэ, Һүмын һууриин шулуу, модо заһан сабшажа бэлдээ һэн.
Copyright information for
BxrBBL2024