1Sa 1 | BxrBBL2024 | STEP | Эпрааимай хадалиг газартахи Цүүпэй Раматааһим хотодо эпрааим угай нэгэ хүн байдаг байгаа. Тэрэнэй нэрэнь Элканаа, тэрэ хадаа Ероһаамай хүбүүн, Элиһүүгэй аша, Тоохугай гуша, Цүүпэй дүшэ һэн.

‏ 1 Samuel 1

Элканаа гэр бүлэтэеэ Шилоодо байна

1 Эпрааимай хадалиг газартахи Цүүпэй Раматааһим ^{▼▼ 19-дэхи шүлэгтэ Элканаагай гэр бүлэ Рамаа хотодо ажаһуугаа гэжэ хэлэгдэнэ.} хотодо эпрааим угай нэгэ хүн байдаг байгаа. Тэрэнэй нэрэнь Элканаа, тэрэ хадаа Ероһаамай хүбүүн, Элиһүүгэй аша, Тоохугай гуша, Цүүпэй дүшэ һэн. 2 Тэрэ хоёр һамгатай байгаа: нэгэнь Ханнаа, нүгөөдэхинь Пэниннаа гэжэ нэрэтэйнүүд бэлэй. Пэниннаа үхи хүүгэдтэй, харин Ханнаа хүүгэдгүй һэн. 3 Энэ хүн жэл бүри түрэл хотоһоо гаража, Түмэн Сэрэгтэ Эзэндэ мүргэхэеэ, үргэл хэхэеэ Шилоо руу ошодог бэлэй. Тэндэ Элии гэгшын хоёр хүбүүд – Хопнии ба Пинэһаас Эзэнэй санаартад байгаа. 4 Элканаа үргэл хэһэн үдэртөө Пэниннаа һамгандаа, хүбүүд, басагадтаа үргэлһөө хубинуудые хүртөөдэг һэн. 5 Харин Ханнаада хоёр дахин ехэ хуби үгэдэг байгаа, юуб гэхэдэ, Эзэнэй тэрээндэ үхибүү үршөөгөөгүйшье һаань, Ханнаада тэрэ угаа дуратай бэлэй. 6 Ханнаагай үхибүү түрэдэггүй ушарһаа боложо, Пэниннаа тэрэниие доромжолдог, Эзэнэй умайень хааһан ушарта гомдон голхоруулхые оролдодог һэн. 7 Жэл бүхэн Эзэнэй һүмэ ошохо бүринь нэгэнь нүгөөдэеэ голхоруулдаг, нүгөөдэнь уйлажа, эдеэ хоолһоо гарадаг бэлэй. 8 Элканаа үбгэниинь тэрээндэ:

– Ханнаа, юундэ ши бархирнабши, юундэ эдеэлнэгүйбши, ямар ушарһаа зүрхэншни гажарнаб? Би шамда арбан хүбүүдһээ дээрэ бэшэ аалби? – гэжэ хэлэдэг байба.

Ханнаа ба Элии

9 – 10 Нэгэтэ Шилоодо эдеэлжэ ууһанай удаа Ханнаа бодожо, сэдьхэлэйнгээ ехэ гажарһанда угаа гашуудалтайгаар уйлан, Эзэндэ һүгэдэн мүргэбэ. Энэ үедэ Элии санаартан Эзэнэй һүмын үүдэнэй хажууда, һандали дээрэ һуужа байгаа. 11 Ханнаа дашаа тангариг үгэжэ, иигэжэ хэлэбэ:

– Түмэн Сэрэгтэ Эзэн, Танай шэбэгшэ болохо минии гай гашуудалые хаража, нам тушаа һанажа, мартангүй, хүбүү үршөөгөө һаатнай, тэрэниие бүхы наһаараа Танай мэдэлдэ үгэхэб. Толгойнь үһые хайша хүрэхэгүй ^{▼▼ Үһэеэ хайшалангүй байха гээшэ Эзэн Бурханда бэеэ зорюулһанай тэмдэг бэлэй.}.

12 Тэрэ удаан сагта Эзэндэ зальбараа. Элии амыень гэтэн байгаа һэн. 13 Теэд Ханнаа досоогоо шэбшэн зальбаржа, гансал уралынь хүдэлжэ, абяаниинь дуулдабагүй. Тиимэһээ Элии тэрээниие һогтуу гэжэ һанаба. 14 Элии тэрээндэ:

– Хэды болотор һогтуу эндэ зогсохобши? Ошожо тэлэрэ! – гэжэ хэлэбэ.

15 Гэбэшье Ханнаа:

– Үгы даа, эзэн. Би сэдьхэлээ гажаржа байһан эхэнэрби. Үзэмэй дараһан архи, шара ундашье уугаагүйб, харин Эзэнэй урда сэдьхэлэйнгээ шарха элирхэйлжэ байнаб. 16 Танай шэбэгшэ болохо намайе муу һамган гээд бү һанагты. Ушар юуб гэбэл, угаа ехэ уйдхар гашуудалһаа боложо би мүнөө болотор зальбаржа байгааб, – гэжэ харюусаба.

17 Элии тэрээндэ:

– Амгалан һайн ябыш даа. Израилиин Бурхан шинии гуйһан гуйлтые бэелүүлхэнь болтогой! – гэбэ.

18 Ханнаа:

– Юрөөл тогтог! – гээ һэн.

Тиигээд тэрэ бусажа, эдеэндэ орожо, нюур шарайнь урданайхидал адли гунигтай байхаяа болёо бэлэй.

Самуил мүндэлбэ

19 Удаань тэдэ үглөөгүүр бодожо, Эзэндэ мүргөөд, һөөргөө Рамаада байдаг гэртээ бусаба. Элканаа Ханнаа һамгантаяа унтажа, Эзэн Ханнаагай гуйлта анхараа бэлэй. 20 Иигэжэ тэрэ хээлитэй боложо, нэгэ жэл үнгэрхэдэ хүбүү түрэбэ.

– Би энэ хүбүүе Эзэнһээ гуйжа абааб, – гэжэ хэлээд, тэрэ Самуил ^{▼▼ Еврей хэлэн дээрэ «Бурхан шагнаг» гэһэн удхатай.} гэжэ нэрэ тэрээндээ үгэбэ. 21 Тиигээд дахин Шилоо руу ошожо, Эзэндэ жэл бүриин үргэл болон тангариглан хэлэһэн тусхай үргэлөө үргэхэ сагынь Элканаада ба гэр бүлэдэнь тудаба ха. 22 Теэд Ханнаа ошобогүй. Тэрэ үбгэндөө:

– Үхибүүнэй хүхэнһөө гарахадань би тэрэниие Эзэнэй урда абаашахаб, тиигээд тэрэ тэндээ хэтэдээ үлэхэ, – гэбэ ха.

23 Элканаа үбгэниинь:

– Һанаһаараа боло даа. Хүхөөрөө тэрэнээ тэнжээтэрээ гэртээ бай. Эзэн үгэеэ бэелүүлхэнь болтогой! – гэжэ тэрээндэ харюусаа һэн.

Иигэжэ һамганиинь үлэжэ, хүбүүнэйнгээ хүхэнһөө гаратарынь хүхүүлжэ тэжээбэ. 24 Тэрэнэйнгээ хүхэнһөө гарахадань тэдэ хамта Шилоо руу ошобо. Тэдэ гунан буруу, нэгэ эфаа гурил болон нэгэ арһан тулам үзэмэй дараһан архи абаад ошоо һэн. Хүбүүниинь үшөө нялха наһандаа ябаа. 25 Тиигээд тэдэ буруугаа үүсэлжэ үргэбэ, хүбүүгээ Элиидэ дүтэлүүлбэ. 26 Ханнаа тэрээндэ иигэжэ хэлэбэ:

– Эзэн! Ута наһатай, удаан жаргалтай ябахатнай болтогой! Би эндэ, танай хажууда зогсожо, Эзэндэ мүргэн зальбаржа байгааша үнөөхи эхэнэр гээшэлби даа. 27 Энэ үхибүүнэй түлөө мүргэн зальбаржа байгаа бэлэйб. Гуйһан гуйлтыемни Эзэн бэелүүлээ. 28 Тиимэһээ хүбүүгээ Тэрээндэ зорюулан үгэнэб. Энэ хүбүүн бүхы наһаараа Эзэндэ алба хэжэ байха.

Элии Эзэндэ һүгэдэн мүргэбэ.