1Sa 13 | BxrBBL2024 | STEP | Саул гушатайдаа хаан шэрээдэ заларжа, хоёр жэл соо Израилиие зонхилбо.

‏ 1 Samuel 13

Пилиштүүдтэй дайн эхилбэ

1 Саул гушатайдаа хаан шэрээдэ заларжа, хоёр жэл соо Израилиие зонхилбо. 2 Тэрэ Израильһаа гурба мянган хүниие шэлэн абажа, хоёр мянганиинь тэрээнтэй хамта Михмаашта болон Бэт-Ээлэй хада уулата нютагта байба, нүгөөдэ нэгэ мянганиинь Ёнатаантай хамта Бэньямиинэй обогой газар дайдын Гибаада байба. Үлөөшэ зониие тэрэ гэр руунь эльгээбэ.

3 Ёнатаан Гээбэдэ байһан пилиштүүдэй харуулай бүлэг бута сохибо. Пилиштүүд энээн тухай дуулаба. Тиигэхэдэнь Саул бүхы орон дотор эбэр бүреэ үлеэн дуугаргажа:

– Еврейнүүд шагнаг лэ! – гэбэ. 4 Пилиштүүдэй харуулай бүлэг Саулай бута сохиһон, мүн пилиштүүдэй Израилиие үзэн ядадаг болоһон тухай дуулахадаа, арад зон Гилгаалда байһан Саулда дуудагдан сугларба.

5 Пилиштүүд Израильтай дайлалдахаар сугларба: гуша мянган тэргэ, зургаа мянган морин сэрэг ба далайн эрьеын элһэн мэтэ тоо томшогүй ябаган сэрэг олон байгаа. Тэдэ ерэжэ, Бэт-Аавэнэй зүүн талада, Михмаашта хотон хүреэнээр тогтобо. 6 Израилиин улад зон хашуулһанаа мэдэжэ, аюулай ушарһые хараад, агы нүхэнүүдтэ, хадын хабшалаар, хабсагайн дундуур, газар дорохи нүхэн, худагуудаар хоргодобо. 7 Зарим еврейнүүд Иорданиие гаталжа, Гаад болон Галаадай нютагта ошобо. Харин Саул Гилгаалда байһаар лэ байгаа. Тэрээнтэй байһан бүхы зон айн шэшэржэ байгаа һэн.

Саул захяал заабариие эбдэнэ

8 Саул Самуилай хэлэһэн долоон хоног соо хүлеэбэ, теэд Самуил Гилгаалда ерэбэгүй. Зон Саулые орхин таража эхилбэ. 9 Иигэжэ Саул:

– Түгэс шатаалта болон амгалан байдалай түлөө үргэлнүүдые намда асарагты, – гэжэ хэлэбэ. Тиигээд тэрэ түгэс шатаалта үргэл үргэбэ. 10 Түгэс шатаалта үргэл үргэжэ дүүргээд байхадань, Самуил ерэбэ. Саул тэрэниие угтан мэндэшэлхэеэ гараба. 11 Харин Самуил:

– Ши юу хээбши? – гэжэ асууба. Саул:

– Улад зоной намайе орхижо, таража эхилһые, танайшье хэлэһэн хугасаадаа ерээгүйе, пилиштүүдэй Михмаашта сугларжа байһые би хараа һэм. 12 Тиимэһээ би «Пилиштүүд мүнөө Гилгаалда минии урдаһаа дайлан ерэхэнь, харин би Эзэнһээ хайра гуйгаагүйб» гэжэ һанаад, түгэс шатаалта үргэл үргэхэеэ шиидээ һэм, – гэжэ харюусаба. 13 Самуил Саулда:

– Ши бодолгүй юумэ үйлэдэбэш. Эзэн Бурханайнгаа шамда захиһан захяа заабариие дүүргээгүйш. Тиигээгүй һаашни, Эзэн одоо Израильда шинии хааншалал хэтэ мүнхэдөө бэхижүүлхэ бэлэйл. 14 Теэд мүнөө шинии хааншалал тогтохогүй. Эзэн Өөртөө Өөрынгөө һанаа сэдьхэлдэ таарама хүниие олохо, тэрэ хүндэ улад зоной ударидагша байхые захирха. Юуб гэхэдэ, Эзэнэй захирһан юумэ бэелүүлээгүйш, – гэбэ.

15 Самуил бодожо, Гилгаалһаа Бэньямиинэй обогой газар дайдын Гибаа руу ошобо. Саул өөртэйнь хамта байһан хүнүүдые тоолобо, зургаан зуугаад хүн байба. 16 Саул болон тэрэнэй хүбүүн Ёнатаан, мүн тэдэнтэй хамта байһан хүнүүд Бэньямиинэй обог зоной газар дайдын Гээбэдэ байба. Пилиштүүд Михмаашта хотон хүреэнээр байгаа һэн. 17 Пилиштүүдэй хотон хүреэнһөө гурбан бүлэг хюдагшад гараад, нэгэ бүлэгынь Опраа руу харгыгаар, Шуһаал газар руу шэглэбэ. 18 Нүгөөдэ бүлэгынь Бэт-Һороон руу шэглэбэ, гурбадахи бүлэг элһэн сүл губидахи Цэбоһиим нюруугай хилэ руу шэглээ һэн.

19 Израилиин бүхы нютагуудта хаанашье түмэршэ дархан байдаггүй бэлэй. Юуб гэхэдэ, еврейнүүд һэлмэ, жада хэжэ болохо гэжэ пилиштүүд түбэгшөөдэг байгаа. 20 Тиимэһээ бүхы Израиль анзаһа, түмэр хүрзэ, һүхэ, хадуураа хурсадуулхын тула пилиштүүд руу ошохо ёһотой байгаа. 21 Анзаһа, түмэр хүрзэ, аса, һүхэ, мүн хадхуур заһахын тула ехэ үнэтэй үнэ сэн – шээкэлэй гурбанай хоёр хуби тус тустань түлэхэ хэрэгтэй һэн. 22 Тиимэһээ байлдаанай үдэр Саул болон Ёнатаантай хамта байһан арад зоной хэнэйньшье гарта һэлмэ, жада байбагүй. Гансал Саул болон тэрэнэй хүбүүн Ёнатаанда байгаа.

23 Пилиштүүдэй сэрэгэй бүлэг Михмааш гаталхаяа гаража ерээ бэлэй.