1Sa 16 | BxrBBL2024 | STEP | Эзэн Самуилда айладхан: – Би Саулые Израилиин хаан байлгахаһаа татагасааб. Ши хэды болотор Саулай хойноһоо гашуудаха юмши? Эбэрээ оливын тоһоор дүүргээд яба. Би шамайе Бэтлэһээмэй Ишай гэдэг хүндэ эльгээхэм. Юуб гэхэдэ, тэрэнэй хүбүүдэй дундаһаа Өөртөө хааниие шэлээб,

‏ 1 Samuel 16

Давид хаан болохоор шэлэгдэбэ

1 Эзэн Самуилда айладхан:

– Би Саулые Израилиин хаан байлгахаһаа татагасааб. Ши хэды болотор Саулай хойноһоо гашуудаха юмши? Эбэрээ оливын тоһоор дүүргээд яба. Би шамайе Бэтлэһээмэй Ишай гэдэг хүндэ эльгээхэм. Юуб гэхэдэ, тэрэнэй хүбүүдэй дундаһаа Өөртөө хааниие шэлээб, – гэбэ. 2 Харин Самуил хэлэбэ:

– Би яагаад ябахабиб? Саул энээн тухай дуулаад, намайе алахал.

Эзэн айладхаба:

– Ши эмэ хашараг абажа, «Эзэндэ үргэл үргэхэеэ ерээб» гэжэ хэлэ. 3 Үргэл хэхэдээ, Ишайе дуудаарай. Юу хэхыешни шамда заажа үгэхэб. Ши Минии зааһан хүнэй толгойдо оливын тоһо түрхеэрэй.

4 Иигэжэ Самуил Эзэнэй айладхал бүтээжэ, Бэтлэһээм руу ерэбэ. Хотын аха захатан тэрэниие угтахаяа шэшэрэлдэн гаража:

– Та амгалан тайбан хэрэгээр ерээ гүт? – гэжэ асууба. 5 Самуил:

– Амгалан тайбан хэрэгээр. Эзэндэ үргэл үргэхэеэ ерээб. Бэеэ арюудхаад, намтай хамта үргэл үргэхэеэ ерэгты, – гэбэ. Тэрэ мүн Ишай гэгшые, тэрэнэй хүбүүдые арюудхан, тэдэниие үргэл үргэхыень уриба. 6 Тэдэнэй ерэхэдэнь, Самуил Элиаабые хараад, «Эзэнэй тоһолһон хүн энэ байжа магадгүй» гэжэ бодоо бэлэй. 7 Теэд Эзэн Самуилда айладхан:

– Тэрэнэй түхэл маяг болон нюргаар үндэрыень бү хара. Би тэрэниие тоохогүйб. Юуб гэхэдэ, Эзэн хүндэл адляар харадаггүй. Хүн нюурыень лэ харадаг, Эзэн зүрхэ сэдьхэлыень харадаг гээшэ, – гэбэ. 8 Тиигээд Ишай Абинадаабые дуудан, Самуилай урдуур ябуулба. Самуил:

– Эзэн энэ хүниие мүн лэ шэлээгүй, – гэбэ. 9 Ишай Шаммаае урдуурнь ябуулба. Самуил:

– Эзэн энэшье хүниие мүн лэ шэлээгүй, – гэбэ. 10 Иигэжэ Ишай долоон хүбүүдээ Самуилай урдуур ябуулаа, гэбэшье Самуил Ишайда:

– Эзэн эдэниие шэлээгүй, – гээ бэлэй. 11 Самуил Ишайда:

– Шинии хүбүүд бултадаа эндэ байна гү? – гэхэдэнь, Ишай:

– Одхон хүбүүмни үлөө. Харагты, тэрэ хонидоо адуулжа байна, – гэбэ. Тиихэдэнь Самуил Ишайда:

– Хүниие эльгээжэ, тэрэ хүбүүе асара. Тэрэнэй эндэ ерэтэр бидэ эдеэлхэеэ һуухагүйбди, – гэбэ. 12 Ишай хүниие ябуулжа, тэрэниие асаруулба. Тэрэ ягаа улаахан, һайхан нюдэтэй, һайхан түһөөтэй хүбүүн байба. Эзэн айладхан:

– Бодожо, тэрэниие тоһоло. Энэ болбол тэрэ хүн мүн, – гэбэ. 13 Самуил эбэртэй тоһо абажа, аханарайнь дунда тэрэниие тоһолбо. Тэрэ үдэрһөө эхилжэ Эзэнэй һүр һүлдэ Давид дээрэ хүсэтэй буугаа һэн.

Самуил бодожо, Рамаа руу бусаба.

Давид Саулай таһалга соо

14 Эзэнэй Һүлдэ Саулһаа эрьен ошобо. Эзэн муу һүлдэ тэрээндэ эльгээжэ, айлган һүрдүүлбэ. 15 Саулай зарасанар тэрээндэ:

– Харагты, Бурханһаа ерэһэн муу һүлдэ таниие айлган һүрдүүлжэ байна. 16 Эзэмнай, өөрынгөө урда байгаа зарасанартаа захирагты. Иигэжэ тэдэ ятаг дээрэ наадажа шадаха хүниие бэдэрэг лэ. Бурханһаа ерэһэн муу һүлдын танда ерэхэдэнь, тэрэ ятаг дээрэ наадаха. Тиихэдэнь танда һайн болохо, – гэлдэбэ.

17 Саул зарасанартаа:

– Һайнаар наададаг хүниие оложо, намда асарагты, – гэбэ. 18 Нэгэ зарасань:

– Харагты, би Бэтлэһээмэй Ишай гэгшын хүбүүе хараа һэм. Тэрэ наадажа шададаг, зоригтой, дайшалхы хүн, үгэдөө ухаалиг, һайхан түһөөтэй. Эзэншье тэрээнтэй хамта байна, – гэбэ. 19 Саул Ишайда элшэнэрые эльгээжэ:

– Өөрынгөө хони адуулдаг Давид хүбүүе намда эльгээ, – гэбэ. 20 Ишай элжэгэ абажа, нэгэ талха, нэгэ тулам үзэмэй дараһан архи, нэгэ эшэгэ ашаад, өөрын хүбүүн Давидаар тэдэниие Саул руу эльгээбэ. 21 Давид Саулда ерэжэ, тэрээндэ алба хэбэ. Саулда тэрэ ехэ һайшаагдажа, Давид Саулай зэр зэбсэг баряад ябагша болобо. 22 Саул Ишайда хүниие эльгээжэ:

– Давид намда алба хэг, тэрэ намда ехэ һайшаагдаа, – гэбэ. 23 Бурханай муу һүлдын Саулда ерээд байхадань, Давид ятаг абажа, наададаг бэлэй. Тиихэдэнь Саулда тэнхээ тамир бусажа, зохид боложо, муу һүлдэ тэрээнһээ зайлажа ошодог һэн.