‏ 1 Samuel 18

Давид Ёнатаан хоёр нүхэсэнэ

1Давидай Саултай хөөрэлдэжэ дүүргэхэдэ, Ёнатаан тэрээнтэй танилсан нүхэсэбэ, тиигээд өөртөө мэтээр Давидта угаа ехээр хайра дуратай болобо. 2Саул тэрэ үдэрһөө Давидые хажуудаа байлгажа, эсэгынь гэртэ табяагүй бэлэй. 3Ёнатаан Давидта өөртөө мэтээр дурлаһан тула Давидтай хэлсээ баталба. 4Тэрэ үмдэжэ байһан гадар хубсаһаяа тайлажа, мүн хуягаа, һэлмэеэшье, һурша номоошье, бүһэеэшье Давидта үгэбэ. 5Иигэжэ Давид Саулай эльгээһэн газар бүридэнь ябажа, амжалта туйладаг байгаа. Саул тэрэниие сэрэгэй ноён болгобо. Энэнь бүхы арад түмэндэ болон Саулай зарасанарта һайшаагдаа бэлэй.

Саул Давидта атаархана

6Давидай үнөөхи пилишт хүниие усадхаһанай һүүлээр бүгэдөөрөө бусан ерэжэ ябахадань, эхэнэрнүүд Израилиин бүхы хотонуудһаа гаража, хэнгэрэг, хэсэ дуугарган, дуу дуулажа, хатаржа, баяртайгаар Саул хааниие угтаба. 7Эхэнэрнүүд хүгжэм наадан:

– Саул мянган хүниие алажа, Давид түмэниие алаба, – гэжэ дуулалдаба. 8Тиихэдэнь энэ үгын Саулай дура гутааһан тула тэрэ ехэ уурлан:

– Давидта түмэниие үгэжэ, намда мянгые үгэбэ. Тэрээндэ гансал хаан түрэ дуталдана бэшэ гү? – гэжэ хэлэбэ. 9Тэрэ үдэрһөө хойшо Саул Давидые һэжэглэн харадаг болобо.

10Үглөөдэрынь Бурханһаа ерэһэн муу һүлдэ Саулые хүсэтэй дайража, Давидай урдандаал адли ятаг гартаа абажа, наадажа байхадань, Саул гэр соогоо галзууржа байгаа. Тэрэнэй гартань жада байгаа һэн. 11Тэрэ «Давидые ханада хадахам» гэжэ һанаад, жада шэдэбэ. Теэд Давид тэрээнһээ хоёр удаа зайлаба.

12Саул Давидһаа айжа эхилбэ. Юуб гэхэдэ, Эзэн Саулһаа зайлажа, Давидтай хамта байгаа. 13Тиимэһээ Саул Давидые өөрһөө холодуулжа, мянган сэрэгэй даргаар табиба. Давид зониие байлдаануудта ударидан ябаа. 14Эзэнэй Давидтай хамта байһан ушарһаа тэрэ бүхы хэрэгүүдтээ амжалта туйлагша һэн. 15Давидай амжалта туйлажа байһые хаража, Саул тэрээнһээ угаа ехээр айжа байгаа. 16Харин бүхы Израиль болон Иуда Давидта дуратай һэн. Юуб гэхэдэ, тэрэ илалта туйладаг бэрхэ жанжин байгаа.

Давид Саулай басага һамга абана

17Саул Давидта:

– Энэ хадаа минии ехэ басаган Мэрааб. Тэрэниие шамда һамган болгон үгэхэб. Гансал минии түлөө зоригтой байжа, Эзэнэй байлдаануудта тулалда, – гэбэ. Ушарынь гэхэдэ, Саул «Минии гарһаа бэшэ, харин пилиштүүдэй гарһаа Давид хосорог» гэжэ һанаа бэлэй. 18Гэбэшье Давид Саулда:

– Би хэн гээшэбиб? Минии ами наһан, эсэгымни гэр бүлэшье Израильда юун гээшэб? Би яажа хаанай хүрьгэн болохобиб? – гэбэ. 19Саулай басаган Мэраабые Давидта үгэхэ сагай ерэхэдэнь, тэрэниие Мэхолаадай Адриһээлдэ һамган болгон үгэбэ.

20Теэд Саулай нүгөө басаган Михаал Давидта дуратай болобо. Энээн тухай Саулда мэдээжэ болоходонь, тэрэ дуратай байба. 21Саул: «Михаал Давидта урьха болохо, пилиштүүдэй гарһаа тэрэнэй хосорхын тула Михаалые тэрээндэ үгэхэмни», – гэжэ бодобо. Тиимэһээ Саул Давидта:

– Мүнөө ши хүрьгэмни болохо хоёрдохи арга боломжотойш, – гэбэ. 22Тиигээд Саул зарасанартаа:

– Давидта нюусаар хөөрэлдэжэ, иигэжэ хэлэгты: «Харагты. Хаан танда талархай, зарасанаршье бултадаа танда дуратай. Тиимэһээ хаанай хүрьгэн бологты» гэгты, – гэжэ захирба. 23Иигэжэ Саулай зарасанар бүхы эдэ үгэнүүдые Давидта дуулгаба. Гэбэшье Давид:

– Би үгытэйб, һайн угайшье хүн бэшэб. Иимэ хүндэ хаанай хүрьгэн болохонь хүнгэн гээд һанана гүт? – гэбэ. 24Саулай зарасанар Давидай хэлэһэн үгэнүүдые Саулда дуулгаба. 25Тиихэдэнь Саул:

– Таанад Давидта иигэжэ хэлэгты: «Хаан дайсадһаа үһөөгөө абахын тула зуун пилишт хүнэй отологдоһон бэлгэнүүдһээ бэшэ юушье энжэ болгон абахаяа һананагүй» гэгты, – гэбэ. Саул Давидые пилиштүүдэй гараар алахые бодожо байгаа. 26Саулай зарасанарай эдэ үгэнүүдые Давидта дуулгахадань, хаанай хүрьгэн болохо энэ боломжо тэрээндэ һайшаагдаба. 27Тогтооһон хугасаагай үнгэрөөдүй байхада Давид бодожо, хүнүүдтэйгээ хамта ябажа, пилиштүүдэй дундаһаа хоёр зуун хүниие сохижо алаа һэн. Давид тэдэнэй бэлгын арһа асаржа, хаанай хүрьгэн болохын тула тэдэниие тоо ёһоорнь хаанда үгэбэ. Иигэжэ Саул Михаал басагаяа Давидта һамган болгожо үгөө бэлэй.

28Эзэнэй Давидтай хамта байһые, мүн өөрынь басаган Михаалай Давидта дуратайе Саул хаража мэдээд, 29Давидһаа улам ехээр айба. Бүхэли наһандаа Саул Давидай дайсан болобо.

30Пилиштүүдэй ноёдой дайлалдахаар ерэхэдэ, Давид Саулай бүхы сэрэгэй түшэмэлнүүдһээ үлүү амжалтануудые туйлан, тэрэнэй нэрэнь улам ехээр алдаршаба.