1Sa 19 | BxrBBL2024 | STEP | Саул өөрын хүбүүн Ёнатаанда болон бүхы зарасанартаа Давидые алаха тухай хэлэдэг байгаа. Теэд Саулай хүбүүн Ёнатаан Давидта ехэ дуратай һэн.

‏ 1 Samuel 19

Давид Саулда харшалуулна

1 Саул өөрын хүбүүн Ёнатаанда болон бүхы зарасанартаа Давидые алаха тухай хэлэдэг байгаа. Теэд Саулай хүбүүн Ёнатаан Давидта ехэ дуратай һэн. 2 Тиимэһээ тэрэ Давидта:

– Минии эсэгэ Саул шамайе алахаяа һанажа байна. Тиимэһээ үглөөдэр болгоомжотой байжа, далда газарта хоргодо. 3 Би гаража, шинии байһан тала газарта эсэгынгээ хажууда зогсон, шам тухай эсэгэтэеэ хөөрэлдэхэб. Ямар нэгэ юумэ мэдээ һаа, би шамда дуулгахаб, – гэбэ.

4 Удаань Ёнатаан Саул эсэгэдээ Давидые һайшаан хэлэжэ:

– Тэрэ танай урдаһаа нүгэл хээгүй, хэрэгүүдынь танда ехэ ашаг туһатай. Тиимэһээ та, хаан, өөрын богоол болохо Давидай урдаһаа нүгэл бү үйлэдыт. 5 Тэрэ ами наһаяа хайрлангүй пилишт Голиафые усадхажа, Эзэн бүхы Израильда агууехэ абарал буулгаа. Та тэрэниие хараад, баясаа бэлэйт. Теэд юундэ ямаршье шалтагаангүйгөөр Давидые алажа, гэмгүй хүнэй шуһанай нүгэл үйлэдэхэ гэжэ байнабта? – гэбэ.

6 Саул Ёнатаанай хэлэһые шагнаад, тангариглан:

– Эзэнэй нэрээр тангаригланаб, тэрэ алуулхагүй, – гэбэ. 7 Тиигээд Ёнатаан Давидые дуудажа, бүхы эдэ үгэнүүдые тэрээндэ дуулгаба. Ёнатаан Давидые Саул руу дахуулан абаашаад, Давид урдандаал адли Саулда алба хэбэ.

8 Дахин дайн эхилжэ, Давид гараад, пилиштүүдтэй тулалдан, тэдэниие олоор хюдаба. Тэдэ Давидһаа тэрьедэн гүйлдөө һэн.

9 Эзэнһээ ерэһэн муу һүлдэ Саулые дайража, Саул гэр соогоо гартаа жада барин һуужа, Давид ятаг дээрэ наадажа байба. 10 Саулай жадаар Давидые ханада хадаха гэхэдэ, Давид Саулһаа халба һүрэжэ, Саулай жада ханада зоогдошобо. Давид тэрэ һүниндөө тэрьедэн, бэеэ абарһан байна.

11 Саул Давидай гэр руу элшэнэрые эльгээн, тэрэниие амадажа, үглөөгүүр алаха гэбэ. Теэд Давидай һамган Михаал Давидта:

– Энэ һүни ши ами наһаяа абараагүй һаа, үглөөдэр алуулхаш, – гэбэ. 12 Иигэжэ Михаал тэрэниие сонхоор буулгажа, тэрэ газаашаа гараад, зугадажа зайлаба. 13 Михаал гэрэй онгониие абаад, орон дээрэ табижа, толгой дээрэнь ямаанай нооһо хэжэ, тэрэниие хубсаһаар хушаба. 14 Давидые барихаар Саулай элшэнэрые эльгээхэдэ, Михаал:

– Тэрэ үбдэнхэй, – гэбэ. 15 Саул Давидые харахаяа элшэнэрые мүн лэ эльгээжэ:

– Тэрэниие оро дэбисхэртэйнь хамта намда асарагты. Би тэрэниие алахаб, – гэбэ. 16 Элшэнэрэй ерэжэ харахада, толгой дээрээ ямаанай нооһотой гэрэй онгон орон дээрэ байба. 17 Саул Михаалда хэлэбэ:

– Юундэ ши намайе иигэжэ мэхэлжэ, дайсаниием табижа, тэрьедүүлбэш?

Михаал Саулда хэлэбэ:

– Тэрэ «намайе таби. Үгы һаашни, би шамайе алахаб» гэжэ хэлээ.

Давид Рамаа руу Самуилда ерэнэ

18 Давид тэрьедэжэ, Рамаа руу Самуилда ерэжэ, Саулай тэрээндэ хэһэн юумэ бултыень Самуилда хөөрэбэ. Тиигээд Самуилтай хамта тэрэ Найһоот руу ошожо байрлаба. 19 Нэгэ хүн Саулда:

– Давид Рамаагай Найһоодто байна, – гэжэ дуулгаба. 20 Тиигээд Саул Давидые барихаяа элшэнэрые эльгээбэ. Гэбэшье лүндэншэдэй бүлэгэй абарал буулгажа, Самуилай тэдэниие ударидажа байхые элшэнэр хараад, Бурханай һүлдэ тэдээндэ буужа, тэдэ мүн лэ адли айладал табин байба. 21 Саулда энээн тухай дуулгахадань, тэрэ ондоо элшэнэрые эльгээбэ. Тэдэшье мүн лэ адли абарал буулгажа эхилбэ. Иигэжэ Саул гурба удаа элшэнэрые эльгээжэ, тэдэнь мүн лэ абарал буулгадаг болоо һэн. 22 Саул өөрөө Рамаа руу ошожо, Сээхүдэ байдаг нэгэ томо худаг руу ерэбэ.

– Самуил ба Давид хаана байнаб? – гэжэ Саулай асуухадань, нэгэ хүн:

– Тэдэ одоо Рамаагай Найһоодто байна, – гэбэ. 23 Саул тэндэһээ Рамаагай Найһоот руу ябажа, тэрээндэ Бурханай һүлдэ буужа, Рамаагай Найһоот хүрэтэрөө тэрэ Бурханай үгэ айладажа ябаа. 24 Тэрэ мүн хубсаһаа тайлажа, Самуилай урда унатараа абарал буулгаба, үнжэн хонон нюсэгэн хэбтээ.

Тиимэһээ «Саулшье баһал лүндэншэ юм гү?» гэдэг болоһон байна.