‏ 1 Samuel 21

Давид Саулһаа тэрьедэнэ

1Давид Нооб руу Ахимээлэх санаартанда ошобо. Ахимээлэх Давидтай уулзахадаа, һалганан айжа, тэрээндэ:

– Юундэ ши хэнтэйшье бэшэ, гансаараабши? – гэжэ асууба. 2Давид Ахимээлэх санаартанда:

– Хаан намда нэгэ хэрэг даалгажа, иигэжэ хэлээ: «Минии шамайе эльгээһэн, даалгаһан хэрэг тухаймни хэндэшье хэлэжэ болохогүй». Би зоноо нэгэ газарта орхёод ерээб. 3Зай, даб гээд үгэжэрхихөөр бэлэн юун шамда байнаб – табан хилээмэншье һаань, олдоһон юумэ намда үгэ, – гэбэ. 4Санаартан Давидта харюусажа:

– Намда юрэ бусын хилээмэн үгы. Гэбэшье арюудхаһан хилээмэн бии. Һаяар эхэнэрнүүдтэй унтаагүй эрэшүүл эдижэ болохо, – гэбэ. 5Давид санаартанда харюусан:

– Гараһанһаамнай хойшо мүнөө хүрэтэр эхэнэрнүүд маанадтай байгаагүй. Сэрэгшэдэй бэень бузартаагүй. Хэрэг үүргэмнай мүнөө хүндэ, тиимэһээ эхэнэрнүүд тухай һанаха сүлөө үгы, – гэжэ хэлэбэ. 6Тиигээд санаартан тэрээндэ арюудхаһан хилээмэ үгэбэ. Тэрэниие Эзэнэй үмэнэһөө абаад үгөө, орондонь Эзэнэй урда халуун хилээмэ табиха ёһотой бэлэй. Энээнһээ бэшэ ондоо хилээмэн тэрээндэ байгаагүй бшуу.

7Тэрэ үдэр Саулай зарасанарай нэгэн тэндэ Эзэнэй урда байгаа бэлэй. Тэрэ эдоом хүн, нэрэнь Доһээг. Тэрэ хадаа Саулай хонишодой ахалагшань һэн.

8Давид Ахимээлэхтэ:

– Даб гээд үгэмөөр жада, һэлмэ танда үгы гү? Би өөрынгөө һэлмэ, ондоо зэр зэбсэгээшье абаагүйб, юуб гэхэдэ, хаанай даабаринь яаралтай байгаа, – гэбэ. 9Санаартан:

– Элаагай хүндыдэ танай алаһан пилишт хүн Голиафай һэлмэ бии. Тэрэ эфодой саана, хубсаһанда орёолтотой байна. Хэрбээ һанаа һаа, тэрэниие өөртөө абагты. Эндэ тэрээнһээ ондоо юумэн байхагүй, – гэбэ. Давид:

– Тэрээнһээ дээрэ һэлмэ байхагүй. Тэрэниие намда үгэ, – гээ һэн.

Давид пилиштүүдтэ Гаат ерэнэ

10Иигээд Давид зэһэжэ, тэрэ үдэр Саулһаа зугадан, Гаадай хаан Ахиишта ошобо. 11Ахиишта зарасанарынь:

– Энэ хүн тэрэ нютаг ороной Давид хаан гэдэгынь бэшэ гү? Тэрээн тухай «Саул мянгые алажа, Давид үй түмэниие алаба» гэжэ дуулан бүжэглөө һэн бэшэ гү? – гэлдэбэ. 12Давид эдэ үгэнүүдые шагнан түбэгшөөжэ, Гаадай хаан Ахиишһаа ехэ һүрдэбэ. 13Тэрэ тэдээнһээ һаруул ухаагаа нюужа, ухаа муутай хүн мэтэ болон, хотын хаалга үүдэнүүдые сараалан зуража, һахал руугаа шүлһөө гоожуулан байба. 14Ахииш зарасанартаа:

– Харана гүт, тэрэ ухаа муутай хүн. Юундэ тэрэниие намда асараабта? 15Намайе ухаа муутай хүнөөр дуталдаа гээд иимэ хүнэй ааша үзэхыемни минии урда тэрэниие асараа гүт?! Энэ хүниие гэртэмни оруулха гээ гүт?! – гэжэ зандарба.
Copyright information for BxrBBL2024